Read Mousgoum Pi zi tiki 39 Bible Online

Pi zi tiki 39 - Mousgoum bible

Pi zi tiki 39

¹Won hlai na Yosef a ga azumai Egipte li, Potifar, ɗif zi sda n’abai na wiini Faraw, abaiɗi askarai zi gɗam, a wuraŋ tiɗi Ismaiitekai na e kiŋsi aha war Egipte.

²EPIƊ-ƊAI a za gaini Yosef, a za wazagai paŋ pɗamai, a sumna aha epin-geza n’Egipte.

³Ni a sɗa ɓa EPIƊ-ƊAI a na gaini Yosef, wala n’a yimaŋ tini aŋ zi paŋ a za pɗem.

⁴Yosef a nava yum wuzani arni epin-gezani, a tikaŋ war sdani, Potifar a tikaŋ aŋ n’abaini dalamni lai, a hinini gɗamni wasgaini paŋ war tini.

⁵Amma hlai n’a tikaŋ li amai midini dalamni gaini wazagaini paŋ lai, EPIƊ-ƊAI a ɓaka dalamni ɗif n’Egipte burini Yosef. Ɓiki na wiini EPIƊ-ƊAI a wa tini edi midini wazagai n’aha war dalamni gaini n’edi war vuwaini lai.

⁶Nɵa Potifar a hina wazagaini paŋ war tini, sdani n’a hina tar ɗa a simi n’a sumaŋ tar. Yosef a nafu a tala juf gara,

⁷asakalni wazagai hanɗa, munini epin-gezani te za suuna sini, te midini: Fana gaya.

⁸Amma a ɗiya kai, a miɗiɗi wiiɗi munini epin-gezani: Tala mu na gaini epin-geza, a n’a tika hangalni sini wala ktai aha war dalam na kir kai. A saŋa wazagaini paŋ war ta,

⁹aha war dalam hanɗa maa, ni abai a suwaŋa kai, a ɗalaŋa sini wala ktai maa kai, sna suku tuku na munini. Mu sɗa aŋ za meefeŋ n’abai arni Alaw nɵa maɵa maɵa ɗa;

¹⁰mefeŋ paŋ te miɗini wiini Yosek buri a fana azumai ɵimani, aŋ tapa sini gaiɗi lai, amma a dara a ɵina seŋɗi kai.

¹¹Amma mefeŋ ktai a halasi aha buri a za sda na wiini, bege ktai maa a nafu aha kai,

¹²te yima sapa pini te muɗa: Fana gaya. A hinitiɗi sapaini tiɗi, a pra edi gaini luwi a niyasi anene war dalam ɗa par.

¹³Won hlai na te tala ɓa a hinitiɗi sapaini tiɗi yaw, a pra edi su ɗa,

¹⁴Te yikiɗisi bagakaiɗi te miɗiɗi: Ammaa! e kumusi ɗif na hebre mudumu ta, a yima ɗai maini wala zi dawaŋ ɵa, a halasi ɓa a fana gaya ɗa! Mu ɗuula gaini gdaŋa,

¹⁵won hlai n’a tala ɓa mu na ɗuula, mu na yika lai ɗa, a hiniti ka sapaini azumai ɵima puk, a pra edi gaini luwi, a niyaɗi anene sek.

¹⁶Te militi sapaini Yosef ɵimani ca haa mafaɗi a wayasi aha,

¹⁷te miɗini a seŋ ni dama, te muɗa: Bege na hebre na ku kiŋyisi hanɗa a halasi sa a firiya a ɵa dawaŋ gaya ɗa,

¹⁸Won hlai n’a tala ɓa mu na ɗuula, mu na yika lai a hinitika sapaini azumai ɵima puk, a praɗi anene sek.

¹⁹Won hlai na epin-gezani a ɵina seŋ na munini te miɗiŋni ɓa: Tala sda na begeku a zaŋ sa, a faka gaini hiy n’abai.

²⁰A yima Yosef aŋ ɵaŋ warɗi daŋgai Won hlai n’e miliɗi ɗai zi daŋgai na wiini pai woni. Won hlai n’a na war daŋgai,

²¹EPIƊ-ƊAI a za gaini, a za pɗemni sini a hinaŋ aŋ nava yum arni abaiɗi daŋgai.

²²Abaiɗi daŋgai hanɗa a hiniɗi ɗai zi daŋgai n’e ɗa warɗi daŋgai paŋ war tini Yosef, sda zi zi na woni paŋ a zaŋ ɗa a Yosef.

²³Abaiɗi daŋgai a tala sda n’a siŋni tini Yosef aŋ zaŋ ɗa kir kai, buri EPIƊ-ƊAI a nafu gaini, wala n’a yimaŋ tini aŋ zi paŋ, EPIƊ-ƊAI a vaŋ amai war pɗem.