Read Mousgoum Pi zi tiki 4 Bible Online

Pi zi tiki 4 - Mousgoum bible

Pi zi tiki 4

¹Adam a fana gaiɗi Eva na munini, te tika fel, te wa Kayin, te muɗa: Gaini EPIƊ-ƊAI mu wa ɗif ktai.

²Te wa Abel na tawalni pra, Abel ɗa a ɗif zi giɗimi adumai, Kayin ɗa a ɗif zi hirim lai.

³Girvudi ktai, Kayin a ka ɓaka n’a zaŋ gaini wazagai na war vuwaini wiini EPIƊ-ƊAI.

⁴Abel ɗe a ka alini adumai n’a wa avut war farani ɗa aŋ ɓaka gaini emelni lai. Arni EPIƊ-ƊAI a yima Abel gaini ɓakani ɗa.

⁵Amma a bunda arni edi sini Kayin gaini ɓakani par lai. Kayin a bunda hi gara arni a yima amai kai.

⁶EPIƊ-ƊAI a miɗini wiini Kayin: Tuku, ku za hiy buri maɗa? Arku a yima amai kai buri maɗa?

⁷Na ɓa ku za pɗem aga ku rɗa amai, na ɓa ku za pɗem kai ɗa, tuwur a na ruɓtuku mini hlaiku, a dara a yimuku, amma a pɗem ɓa ku rɗa amai midini.

⁸Kayin a miɗini wiini Abel na tawalni: Hulumu gunumusi yawwa. Won hlai n’e cû edi war baŋa ɗa, Kayin a faka sini Abel na tawalni, a fuɗaŋ edi.

⁹EPIƊ-ƊAI a miɗini wiini Kayin: Tawalku Abel ɗa aŋ wata ɗa? A waya seŋ a muɗa: Mu sɗa kai, mu ɗif zi giɗimi tawala ɗi?

¹⁰Alaw a muɗa: Ku za ɵa ɗa a maɗa? Felni tawalku a ɗuulasi haa amai sa ta,

¹¹Tiyana par ku tusa li gaini afti n’a mala mini edi aŋ yima felni tawalku na ku fuɗaŋ edi war tuku par ɗa.

¹²Won hlai n’aga ku hirma afti ɗa aga a suku warni kai, aga ku hina blaŋ blaŋ, ku zogo hlai paŋ midini afti.

¹³Kayin a miɗini wiini EPIƊ-ƊAI: Girŋa ɗa a guma gara a kiɗa a luba gaya kai.

¹⁴Na ɓa girna, ku burgaŋa li edi midini afti hanɗa par, arku aga a kiɗa sa kai, aga mu hina aŋ hili blaŋ blaŋ, aga mu zogo hlai paŋ midini afti; asiya ɗi paŋ n’a navaŋa li ɗa aga a fuɗaŋa.

¹⁵EPIƊ-ƊAI a miɗini: Zaw kai, na ɓa a fuɗuku li, a vurguku, e fiɗi ɗai ezuku muguzak. EPIƊ-ƊAI a tika wala zi siŋki midini Kayin ta kapai ɗif n’a navaŋ a fuɗaŋ kai.

¹⁶Kayin a yima sini edi wuzani arni EPIƊ-ƊAI par, a sumna midini afti na Nod, tini Eden war gal na piɗi futi na dawai par.

¹⁷Kayin a fana gaiɗi munini, te tika fel, te wa Henok. Kayin a rga fuŋ n’abai ktai, a sini yikini Henok maini yikini ahini nɵa.

¹⁸Henok a wa Irad, Irad a wa Mehuyaiel, Mehiyaiel a wa Metusaiel, Metusaiel a wa Lamek.

¹⁹Lamek a mula falakai sulu, na ktai yikiɗi ɓa: Ada, na zamai Silla.

²⁰Ada te wa Yabal, ni a epiɗi nagai n’e simni pini gumu gaini farani faraiɗi,

²¹tawalni yikini Yubal, ni a epiɗi nagai n’e ɵiɓi adill gaini nagai n’e yibi algaita.

²²Silla zaw ɗa te wa Tubal Kayin, a ɗif zi gɵi fai fai, a epiɗi nagai n’e gɵi kiya gaini kawai, tawalni na muni yikiɗi Naama.

²³Lamek a miɗiɗi wiiɗi falakaini: Ada gaiɗi Silla ɵini, falakaini Lamek zigi ɵimaki mini seŋ na mu muɗaŋ, na ɓa ɗif a ɵoɗoŋa sa li edi ɗa, mu fuɗa ɗif, ɗif a zaŋa wuruk li ɗa, mu fuɗa arwagwi lai.

²⁴Aftini, Kayin e virgiŋ azi muguzak, amma Lamek azi doogo doogo muguzak pi muguzak.

²⁵Adam a fana gaiɗi munini pra, te wa ahi ktai a sini yikini ɓa: Set, buri ɓa Alaw a saŋasi pinziba zamai ktai war balamni Abel buri Kayin a fuuɗaŋ su.

²⁶Set a wa ahi ktai lai, a sini yiki ɓa: Enos. War mefeŋ ni par, ɗai e tiki piɗi aŋ siiwi Alaw, e yikiŋ ɓa: EPIƊ-ƊAI.