Read Mousgoum Pi zi tiki 40 Bible Online

Pi zi tiki 40 - Mousgoum bible

Pi zi tiki 40

¹Mefeŋ yaw asakalni wazagai hanɗa par, ɗif n’abai n’a sini wala zi ci wiini pai gaini ɗif n’abai na midiɗi nagai n’e zi peŋ ɗa lai, e zi meefeŋ sini pai n’Epgpte n’epingezaɗi.

²Farawon a za hiy siɗi ɗaini n’abakai sulu: Ɗif n’abai na sini wala zi ci, gaini n’abai na midiɗi nagai n’e zi peŋ ɗa lai.

³A yimiɗi, a kiɗi ahani abaiɗi askarai zi gɗam warɗi daŋgai na Yosef aŋ warɗi.

⁴Abaiɗi askarai zi gɗam a siɗi Yosef buri a zina piɗ ɗai war ɵeŋ, e simi daŋgai mefeŋ yaw.

⁵War duvuk ktai, ɗif n’abai n’a sini wala zi ci wiini pai n’Egipte gaini abai na midiɗi nagai n’e zi peŋ ɗa, weseŋ a pɵiɗi won hlai n’e ɗa warɗi daŋgai. Ɗif weseŋ a pɵaŋ, weseŋ paŋ a siŋka midini wala kiini kiini lai.

⁶Dawai par Yosef a halasi siɗi, a niviɗi siɗi a yima edi kai.

⁷A zilbiɗi ɗai n’abakai na wiini Faraw n’e ɗa gaini war daŋgai aha war dalamni epin-gezani: Girna siki a tala gaini pili edi kai ɗa buri maɗa?

⁸E wiyi seŋ e miɗi: Weseŋ a piɵiyi, ɗif n’a sɗa aŋ siŋkiyi ezini edi aŋ kai. Nɵa Yosef a miɗiɗi: Siŋka ezini wala edi a Alaw kai ɗi? Vurnaŋa weseŋ hanɗa haw.

⁹Ɗif n’abai n’a sini wala zi ci wiini pai a vurna weseŋ n’a pɵaŋ wiini Yosef, a muɗa: Weseŋ a pɵaŋa mu tala luwuŋ zi vin wuza zaw,

¹⁰tini gaini wi edi hu, a guɗasi amlai par viya, flerni a mala edi, ali na sini sumulni gaini niyi.

¹¹Kawai zi ci na wiini Faraw te nafu ta. Mu yima sumulni luwuŋ zi vin mu supuɗaŋ warni kawai zi ci na wiini Faraw, asakal par mu sitini amai tini ta.

¹²Yosef a miɗini: Weseŋ a siŋka maini nɵa: Tini luwuŋ na hu a mefeŋ hu,

¹³mefeŋ a hina hu pra, Faraw aga a yumuku arku amai, aga a tukuku war sdaku n’avut ɗa, aga ku sitini kawai zi ci war tini Faraw maini na ku naka ku zaŋ avut par, hlai na ku naka war sdani nɵa.

¹⁴Amma won hlai n’e zi pɗem li suku, ku hina muduku a wula gaya kai, mu siiwuku ɓa ku za pɗem sa ta, ku muɗa seŋŋa wiini Faraw ta kapai a ɵaŋaɗi edi war daŋgai par su.

¹⁵Buri ɓa e yimiŋasi na ɗa gaini gdaŋ midini afti na wiiɗi Hebrekai par, woni hlai na ɗe, mu za wala ktai na meefeŋ na kapai mu suma daŋgai pini kaalai.

¹⁶Won hlai n’a tala ɓa Yosef a siŋka ezini weseŋ hanɗa edi pɗem, abaiɗi ɗai na e zi peŋ ɗa a miɗini: Tala lai weseŋ a pɵaŋa, mu tala dologo hu na wiini gamla amai mada ca.

¹⁷Dologoi n’amai par midiɗi marɗi ɗa pinzibani gamla paŋ na e ziŋsi war hlai zi peŋ par, na Faraw a sumaŋ ɗa a nafu warɗi. Wala zi ɗûfli a halalsi a sumaŋ warɗi dologoi n’amai mada ta ɗa par.

¹⁸Yosef a tika seŋ a muɗa: Weseŋku a siŋka maini nɵa: Dologo na hu a mefeŋ hu,

¹⁹mefeŋ a hina hu pra, Faraw aga a ɗukla humokku edi, aga a hukuku amai sini luwuŋ, wazagai zi ɗufli aga a halasi a suma neŋku.

²⁰Maini wala ktai ɵa, mefeŋ n’ag'aŋ hu a mefeŋ a mefeŋ na wiiɗi fet na wiini wii na wiini pai Faraw, a ziti fet n’amai buriɗi ɗai zi sda paŋ, arbaɗi ɗai paŋ, n’a siŋka edi gara ɗa a abai n’a sini wala zi ci wiini pai gaini abaiɗi ɗai n’e zi peŋ ɗa.

²¹A waya ɗif n’abai n’a sini wala zi ci war sdani, ni a tika pini aŋ sini wala zi ci wiini pai.

²²A haga abaiɗi ɗai n’e zi peŋ ɗa amai sini luwuŋ maini na Yosef a siŋkaŋ edi nɵa.

²³Amma ɗif n’abai zi sini wala zi ci wiini pai, a muɗa midini Yosef kai, midini a wula gaini lai.