Read Mousgoum Pi zi tiki 41 Bible Online

Pi zi tiki 41 - Mousgoum bible

Pi zi tiki 41

¹Amma buza a vuga li sulu, Faraw lai weseŋ a pɵaŋ. A tala sini agoɗom wulani yem-ra Nil.

²A tala ɵaakai na pɗamai muguzak, gaini liki ɗup ɗup; ayir sini hiniŋ hiniŋ lai, a niyasi amai agoɗom warni yem-ra Nil par, a tika pini a suma kuzum n’amai wulani daŋ.

³Asakal par ɵaakai zamai muguzak a niyasi amai war yem-ra Nil par lai, a tala maafanai, gaini hûgû, a ɗiya ɵimani n’avut amai wulani yem-ra na Nil sa lai.

⁴Slaakai na muguzak n’a tala maafanai gaini hûgi lai a luma ɵaakai na muguzak na tala pɗamai gaini liki ɗup ɗup ɗa, nɵa Faraw a ɵiya amai.

⁵A waya a kala weseŋ pra, weseŋ a pɵaŋ azi n’ag'aŋ sulu pra. A tala midini yawni wai ktai, yaw a pasi midini muguzak, abakai, muku a ruvuku sini.

⁶Asakal par midini wai zamai muguzak n’agogoi gaini siiti tini smer z'afu na piɗi futi na dawai par a diyasi lai.

⁷Midini wai n’agogoi a rɓa na muguzak n’abakai na pɗamai, nɵa Faraw a ɵiya amai. A tala ɗa a pɵaŋ ɗa a weseŋ.

⁸Gorof par Faraw hangalni a tuura a yikiɗisi ɗai zi hiila gaiɗi ɗai na yalakai n’Egipte ɗa paŋ, a virniɗi weseŋ n’a pɵaŋ paŋ, amma ɗif ktai a kiɗa aŋ siŋkini ezini seŋ hanɗa edi wiini Faraw kai.

⁹Nɵa, ɗif n’a sini wala zi ci wiini Faraw a miɗini: Jaamus, girna aga mu muɗa midini meefeŋŋa n’a vugasi edi wuzaku.

¹⁰Mefeŋ ktai pai a za hiy siɗi ɗaini zi sda, ta gaini abaiɗi ɗai n’e zi peŋ, e yimiyi, e miliyi warɗi daŋgai ahani abaiɗi ɗai zi gɗam na wiini pai.

¹¹Weseŋ a pɵiyi duvuk ni ktai, ta gaini ni, weseŋ n’a pɵiyi, ezini zi siŋki edi kiini kiini.

¹²Gaw na hebre ktai, bege na wiini abaiɗi ɗai zi gɗam na wiini pai a nafu gaiyi. Mi virnini weseŋ n’a pɵiyi, a siŋkiyi ezini edi ktai ktai paŋ.

¹³Wala a za nɵa kal kal maini n’a siŋkiyi ezini edi nɵa. Ta a wayaŋa war sdaŋa n’avut, maya na ktai e higiŋ amai.

¹⁴Faraw a ɵina aŋ yikasi Yosef, e pirmi aŋ yimiŋsi warɗi daŋgai par, e fiɗini midini edi, a bunda sapa na sini, a hala ahani Faraw.

¹⁵Pai a miɗini wiini Yosef: Weseŋ a pɵaŋa, ɗfi ktai n’a kiɗa a siŋkaŋa ezini edi aŋ kai, amma mu ɵina e ɗa miɗi muduku ɓa, Won hlai na e vurnuku weseŋ zi pɵi li ku kiɗa aŋ siŋ ka ezini edi lai.

¹⁶Yosef a wiyini seŋ wiini Faraw, koo gaya ta kai tekeɗeɗi, Alaw a sɗa aŋ sa wiyini seŋ na pɗem wiini Faraw.

¹⁷Nɵa Faraw a miɗini wiini Yosef: Weseŋ n’a pɵaŋa, mu tala sa agoɗom wulani yem-ra na Nil gaini ɗiyi zaw.

¹⁸Mu tala ɵaakai muguzak gaini liki, a tala pɗamai lai a niyasi amai war yem-ra Nil par, a tika pini aŋ suma kuzum n’a na amai wulani Dan ɗa.

¹⁹Asakal par ɵaakai zamai muguzak a niyasi amai duɓani par, gaini hûgi, a tala maafanai gara, komiyeŋ komiyeŋ nɵa, midini afti n’Egipte kafa mu talaka ɵaakai na maafanai maini na hanɗa kaa duk kai.

²⁰Slaakai, n’a komoyeŋai n’a tala maafanai lai a rɓa ɵaakai na muguzak na gaini liki n’avut ɗa.

²¹Won hlai n’a rɓaŋ li, a tala maini na ɓa a rɓa wala kai ɵa, a sini komoyeŋai, maafanai maini n’avut ɗa ɵa, nɵa mu ɵiya amai.

²²Amma mu tala war weseŋ pra, midini wai muguzak n’a pasi amlai par sini yahaw ktai, abakai, muku a ruvuku sini.

²³Asakal par midini wai zamai muguzak gaini siiti agogoi gaini hûûli tini smer z'afu na piɗi futi na dawai par a diyasi asakalni par.

²⁴Midini wai n’agogoi a rɓa na pɗamai na muguzak ɗa, mu miɗiɗi wiiɗi ɗai zi hiila gaini, amma ɗif ktai maa a kiɗa a zaŋa gaglai midini kai.

²⁵Yosef a wiyini seŋ wiini Faraw: Weseŋ na wiini Faraw a wala ktai, Alaw a zini ɗa a zaida wiini Faraw burini wala n’aga a zaŋ.

²⁶Saakai na pɗamai na muguzak a buza muguzak, midini wai na muguzak a buza muguzak, weseŋ zi pɵi hanɗa a wala ni ktai.

²⁷Slaakai na komiyeŋai muguzak n’a tala maafanai, n’a niyasi amai asakal a buza muguzak; midini wai na muguzak na siita gaini yi tini smer z'afu na piɗi futi na dawai par a siŋka midini buza muguzak na wiiɗi wiyamai.

²⁸Seŋ na mu dara mu miɗiŋni wiini Faraw a hanɗa: Alaw a siŋkini wiini Faraw ɗa a wala n’aga a zaŋ.

²⁹Buza aga a halasi muguzak, wazagai zi simi midini afti n’Egipte paŋ aga a za viya.

³⁰Asakal par buza zi wiyamai muguzak aga a luɓasi. Ɗai midiɗi aga a wula gaini der na viya n’a naka midini afti n’Egipte, wiyamai aga a vada gdaŋɗi ɗai na midini afti ɗa edi,

³¹der na viya n’a naka midini afti, ɗai aga e siɗiŋ kir kai burini wiyamai n’aga te halasi asakal par, aga te za gdaŋ gara.

³²Na ɓa weseŋ zi pɵi hanɗa a za azi sulu sini Faraw ɗa, a na buri ɓa wala hanɗa a halasi sini Alaw par, Alaw aga a baiya kai aŋ vaŋ amai.

³³Tiyana ɗa a pɗem ɓa Faraw a paya ɗif ktai zi siɗi, na yel aŋ tikaŋ amai midini afti n’Egipte.

³⁴A pɗem ɓa Faraw a miliɗi ɗai n’abakai midini afti ɗa ca ca aŋ yimi gal n’ag'aŋ ɵim na wiini hiɗi na midini afti n’Egipte paŋ aŋ tar, haa buza na muguzak na der aŋ warni a vada.

³⁵Aga e tipisi wazagai zi simi paŋ na e niviŋ war buza na muguzak hanɗa, e tipi algama paŋ war vre, pai a mula arni midini maini godi nɵa war fuŋ n’abakai.

³⁶Hanɗa aga a za aŋ godai burini afti burini buza zi wiyamai na muguzak n’aga a halasi midini afti n’Egipte, nɵa wiyamai aga a vidiɗi ɗai na midini afti edi kai.

³⁷Hiini na Yosef a saŋ ɗa a firiya agulni Faraw gaiɗi ɗai zi sda paŋ lai.

³⁸Faraw a miɗiɗi: Aga mu nuvumu ɗif na seze na wiini Alaw aŋ midini maini ni nɵa tiɓ ɗi?

³⁹Faraw a miɗini wiini Yosef: Alaw a hitriku ya midini wazagai hanɗa paŋ, ɗif ktai zi siɗi, zi yel lai n’a suwuku aŋ kai.

⁴⁰Tuku aga ku za aŋ ɗif n’abai midini hlaiŋa. Ɗai paŋ aga e ɵini pini gadaiku. Ta aga mu suwuku gaiɗi Paramai zi pai ɗa bas.

⁴¹Faraw a miɗini wiini Yosef: Tala, mu tukuku midini afti n’Egipte paŋ.

⁴²A witisi adoŋai tini par, a witini tini Yosef, a wiini sapa zi leŋ sini, a ɵitini aiduwi zi or wulani lai.

⁴³Asakal par a tikaŋ amai midini Saretni n’ag'aŋ sulu, ɗai e ɗûûli wuzani: Fiki edi, fiki edi. Faraw a tikaŋ nɵa aŋ abai midini afti n’Egipte paŋ.

⁴⁴A miɗini wiini Yosef: Pai muta, amma gaiku kai ɗa, midini afti n’Egipte ɗa paŋ ɗif a muguza kai.

⁴⁵Asakal par Faraw a sini yiki wiini Yosef ɓa: Safnat-paniya. A sitini Asenat n’ahini Poti-Fera pai zi ɓaka na One aŋ muni. Yosef a hala aŋ tala afti n’Egipte

⁴⁶Yosef, buzani a nafu doogo doogo hu, won hlai n’e kiŋsi wuzani Faraw pai n’Egipte, asakal par Yosef a hala aŋ guna afti n’Egipte ɗa paŋ.

⁴⁷War buza na muguzak zi der, afti a za seyem viya.

⁴⁸Yosef a tapa wazagai zi simi na midini afti n’Egipte ɗa paŋ amai, war buza na muguzak n’a vuga pini marni ɗa, a giɗimaŋ warni vrakai war fuŋ n’abakai. A tapasi seyem na e ziŋsi edi war basga n’edi ɵimani par aha war fuŋ n’abakai.

⁴⁹Asakal par Yosef a tapa algama amai viya gara maini kai kai na agoɗom nɵa, haa a ɗiya pɵini zaw buri a kiɗa a pɵa kir kai.

⁵⁰Wuzani buza na wiyamai te cosi sek ɗa, Yosef a wa ali sulu gaiɗi Asenat n’ahini Poti-Fera pai zi ɓaka na One.

⁵¹A sini yiki wiini ahini n’avut ɗa ɓa: Manase, a dara a muɗa: Alaw a hinaŋa, mada a wula gaini girŋa paŋ, gaini dalam na wiini apa paŋ lai.

⁵²N'ag'aŋ sulu a sini yiki ɓa: Efrayim, a dara a muɗa: Alaw a saŋa seyem li midini afti na mu sda gir woni.

⁵³Buza na muguzak zi der na midini afti n’Egipte a daba,

⁵⁴Buza na muguzak na wiini wiyamai a tika pini, maini na Yosef a muɗaŋ wuzani hlai par ɗa nɵa. Wiyamai te za midiɗi yai paŋ, amma midini afti n’Egipte ɗa wala zi simi a na.

⁵⁵Wiyamai te tika piɗi aŋ za midini afti n’Egipte ɗa paŋ lai, ɗai e tiki piɗi e ɗûûli burini wala zi simi sini Faraw. Pai a wiyiɗi seŋ ɓa: Hili piyi Yosef, ki zi wala n’aga a miɗiki midini.

⁵⁶Wiyamai te za midini afti paŋ, Yosef a mala mini vrekai n’e ɗiyiŋ aha war fuŋ n’abakai paŋ edi, a wiriɗi algama edi wiiɗi ɗai n’Egipte. Wiyamai te za gdaŋ a suwa pra midini afti n’Egipte.

⁵⁷Ɗai paŋ e hilisi aha war Egipte aŋ wûri algama tini Yosef par, buri wiyamai te £riya amai gdaŋ gara midiɗi yai paŋ.