Read Mousgoum Pi zi tiki 42 Bible Online

Pi zi tiki 42 - Mousgoum bible

Pi zi tiki 42

¹Won hlai n’a tala ɓa algama a na aha warɗi Egipte, Yakob a miɗiɗi wiini alini: Na ki zi sa aŋ tili arɗi marki na ɗa a maɗa?

²A ɗuula a muɗa: Mu ɵina ɓa algama a na aha war Egipte, hili woni, wurumusi woni par kapai mu kurɗumu, mu murumu kai.

³Tawalakaini Yosef doogo e hili aŋ wirisi algama war Egipte par.

⁴Amma Yakob a ɵina Benyamin na tawalni Yosef gaiɗi tawalakaini kai, a hiina ɓa kapai wala na meefeŋ a za sini kai.

⁵Alini Izrayel e hilisi aŋ wûri algama maiɗi marɗi na zamai ɵa lai, buri wiyamai te za midini afti na Kanaan,

⁶Yosef a nafu aŋ Lawan na midini afti ni ɗa, a sikilaŋ algama edi wiiɗi ɗai paŋ. Tawalakaini Yosef e cûsi e hûrgi azumai wuzani, arɗi azumai tiɓ tiɓ,

⁷Yosef a tiliɗi tawalakai, a siɗiɗi ɓa, amma a firiya a siŋkiɗi sini kai, a miɗiɗi gaini wûle na gdaŋ. A muɗa: Ki hilisi wata par ɗa? E wiyi seŋ e miɗini: Midini afti na Kanaan par, aŋ wûri wala zi simi.

⁸Yosef arni siɗi tawalakaini ca, amma nagai e siɗiŋ kai.

⁹Nɵa Yosef, midini a kɵa gaini weseŋ n’a pɵaŋ gaiɗi a miɗiɗi: Tiki ki ɗi ɗai zi tili ezini hlai, ki hilisi na aŋ Tili baŋani hlai ka.

¹⁰E wiyini seŋ: Zaw kai epin-gezaiyi, tiyi bagakaiku mi hilisi buri mi wûri wala zi simi.

¹¹Tiyi kafa mi ɗi alini ɗif ktai, miɗi ɗai na rhai waryi kai, bagakaiku e ɗi ɗai n’e tili ezini hlai kai.

¹²A wiyiɗi seŋ a miɗiɗi: Zaw kai, ki hilisi buri ki tili ɗa ezini hlai.

¹³E wiyi e miɗi pra: Tiyi bagakaiku mi ɗifu tawalakaiɗi maryi doogo pi sulu, alini ɗif ktai midini afti na Kanaan, n’agwi n’asakal aŋsi girna aha gaini epiyi, ktai arbaɗi par aŋ kai.

¹⁴Yosef a ɗuula a muɗa: Mu miɗiki edi gaglai ɓa, ki ɗi zi tili ezini hlai ɗa!

¹⁵Aga mu sɗa jreki war seŋ hanɗa, gaini pai Faraw zaŋ. Aga ki niyi edi woni na par kai, sai na ɓa tawalki n’agwi a halasi li woni na.

¹⁶Slini ktai arbaki par aŋ kasi tawalki, tiki na ki hini ɗa ki ɗi daŋgai kapai mu sɗa jreni seŋki na ki miɗiŋŋa ɗa, na ɓa nɵa kai ɗa gaini pai Faraw zaŋ, tiki ki ɗi ɗai n’e tili ezini hlai jre jre.

¹⁷A pûkûɗi warɗi daŋgai puk haa meefeŋ hu.

¹⁸Mefeŋ n’ag'aŋ hu, Yosef a miɗiɗi: Kapai suŋfaki a kora ɗa, aga ki zi maini na mu na miɗiŋki nɵa: Ta mu ɗif na mu huna Alaw.

¹⁹Na ɓa ki ɗi ɗai na jreki a na ɗa, a pɗem ɓa ktai arbaki par a hiŋaka war daŋgai dam, tiki na zamai ɗa ki ki wala zi simi aha buri wiyamai.

²⁰Asakal par ki kiŋasi tawalki n’agwi ɗa, seŋki na ki miɗiŋ aga a za edi aŋ jre lai, tiki aga ki mri kir kai, e zi hanɗa lai.

²¹E miɗi arbaɗi marɗi: Ah, tumu mu zumu meefeŋ sini tawalmu Won hlai na mu tulumu gir na wiini, a zilbumu buri mu zunumu yum, amma mu ɵunumu seŋni kai, gir hanɗa a za sumu na buri hanɗa.

²²Ruben a miɗiɗi: Mu miɗiki ɓa, ki zi wala na meefeŋ ktai sini arwagwi hanɗa kai, ki ɵini seŋŋa kai kai ɗi! Tiyana a zilba tumu na ɗa a felni ɗa.

²³E siɗi ɓa Yosef a na ɵina nɵa e siɗi ɵa kai, buri ɗif zi bindi seŋ a nafu arbaɗi.

²⁴Nɵa Yosef a yima sini edi siɗi par, a tuwa, asakal par a wayasi siɗi a miɗiɗi seŋ. A yima Simeyon arbaɗi par, a sa miɗi ɓa e rgiŋ wuzani arɗi.

²⁵Asakal par Yosef a sa futi buri e vi sakɗi gaini algama, e wiyini dalani asiya ɗi paŋ war sakni sakni, e siɗi wala zi simi tiɗi burini morkoiɗi lai, a za siɗi maini nɵa lai.

²⁶E mili algamaɗi amai duɓani ablehökai e hili wiiɗi.

²⁷Won hlai n’e ɗiyi woni buri feŋ, ktai arbaɗi a mala mini sakni edi aŋ sini simi wiini ablehöni, a tala farai na wiini amai par mini sak ɗa ta,

²⁸A miɗiɗi wiiɗi tawalakaini: E wiyiŋasi faraiŋa wai, a na amlai mini sakŋa zi algama ɗik. Gdaŋɗi a vada edi, hunai te yimiɗi gara. E miɗi arbaɗi marɗi: Alaw a zumu ɵa ɗa a maɗa!

²⁹E cûsi aha sini Yakob n’epiɗi midini afti na Kanaan, e miɗini labar n’a za siɗi paŋ.

³⁰E miɗi: Ɗif n’a na aŋ abaini afti a miɗiyi seŋ na gdaŋ, a yimiyi maiɗi ɗai zi tili ezini hlai nɵa.

³¹Tiyi mi wiyini seŋ: Tiyi, miɗi ɗai zi tili ezini hlai kai, mi ɗi ɗai na rhai waryi kaalai.

³²Mi ɗifu tawalakaiɗi maryi doogo pi sulu, epiyi ktai, ktai arbaɗi par aŋ kai, n’agwi n’asakal tar aŋsi girna aha gaini epiyi midini afti na Kanaan.

³³Nɵa ɗif na abaini afti ɗa a miɗiyi maini nɵa: Aga mu sɗa ɓa ki ɗi ɗai na jreki a na ɗa war seŋ hanɗa: Ki hini ka tawalki ktai gaya, ki mili algama pini kiɗiki, ki kiŋ aha burini wiyamai, hili.

³⁴Nɵa ki kiŋasi tawalki n’agwi, kapai mu sɗa ɓa ki ɗi ɗai zi tili ezini hlai kai, ki ɗi ɗai zi rhai kaalai. Aga mu ɵiki tawalki na ktai ɗa, ki zi sakala midini afti lai.

³⁵Hlai n’e tiki piɗi aŋ mili wazagai na war sakɗi edi, asiya ɗi paŋ a nava faraini n’a saŋ warɗi partami amlai war sakni ɗik ɗik. Gaini epiɗi paŋ, Won hlai n’e tili partami gaini faraiɗi ɗa, hunai a yimiɗi.

³⁶Yakob n’e piɗi a miɗiɗi: Ki diri ɓa ahi a hina ta kai zaw! Yosef ɗa aŋ kir kai, Simeyon aŋ kir kai, Benyamin ki yimiŋŋa kaai lai, hanɗa paŋ a kɵasifuna mada ɗaai.

³⁷Nɵa Ruben a miɗini wiini epini: Na ɓa mu wuyuŋkusi kai ɗa, ku fiɗiɗi aliya na sulu na maɵagai wiiku edi, mu ɵiɓa dedikŋa li mini aga mu wiyuŋkusi lai.

³⁸A waya seŋ a muɗa: Ahiya aga a hala gaiki kai, tawalni a mra su a hina kiini pal, na ɓa wala na meefeŋ a navaŋ li warɗi futi na ki hili warɗi na ɗa, aga ki fiɗiŋa, aga ki piŋa ta na wel hanɗa war marava buri meefeŋ na ki kiŋsi mada.