Read Mousgoum Pi zi tiki 43 Bible Online

Pi zi tiki 43 - Mousgoum bible

Pi zi tiki 43

¹Wiyamai te riya amai abai midini afti na Kanaan.

²Won hlai n’e vidi gaini simini algama n’e kiŋɗi aha war Egipte par li, epiɗi a miɗiɗi: Wiyi aŋ wurumusi wala zi simi agwi.

³Yuda a waya seŋ a muɗa: Ɗif ɗa a miɗiyisi edi gaglai ɓa: Na ɓa tawalki aŋ gaiki kai ɗa, mu sɗikisi wuzani ara na kai.

⁴Na ɓa, ku hina tawalyi li ɓa hala gaiyi ɗa, aga mi hili aŋ wurukusi wala zi simi lai.

⁵Amma na ɓa ku hinaŋ kai ɗa, tiyi aga mi hili kai, buri ɓa ɗif a miɗiyisi ɓa: Na ɓa tawalki aŋ gaiki kai ɗa, mu sɗikisi wuzani ara kai.

⁶Izrayel a waya a muɗa: Ki sini labar wiini ɗif ɓa tawalki zamai a na buri maɗa? Ki ziŋa na ɗa a meefeŋ wiya.

⁷E wiyi seŋ e miɗi: Ɗif ɗa a piɵiyi gaini zilbi, na midiyi tiyi war suŋfaii gaini pakataiyi a miɗiyi: Epiyi a na karni ɗaai ɗi? Tawalki zamai a na ɗi? Nɵa mi zini gaglai midini wazagai hanɗa. Mi kiɗi mi siɗi ɓa aga a miɗiyi ɓa ki kisi tawalyi wonni na ɗi?

⁸Nɵa Yuda a miɗini wiini Izrayel n’epini: Hina arwagwi a hala gaya, fiki amai hulumu. Na ɓa ki diri ɓa mu murumu kai, tiyi lai, tuku lai, alimu lai mu kuruɗumu ɗa,

⁹Ta mu ɵiɓa dedikŋa li mini seŋ ni ɗa, ku kiɗa ku zilbaŋ war ta. Na ɓa mu wuyuŋkusi kai ɗa, na ɓa mu kuŋkusi wuzani arku kai, meefeŋ na mu zaŋ suku aŋ mada haa kureɗ.

¹⁰Na ɓa mu bumufu hlai kai ɗa aŋ ta ɗa mi wiyisi azi n’ag'aŋ sulu ya.

¹¹Izrayel n’epiɗi a miɗiɗi: Na ɓa ɵa ɗa ki zi maini nɵa, ki miliɗi alini luwuŋ na midini aftimu par war sak na wiiki, ki kiŋ azumai Egipte, ki siŋni wiini ɗif ni ɗa: Emel zi girdi si agwi, emelni ami agwi, sugoi zi ɗûgûdi zi lûgûzi agwi gaini alini luwuŋ pistas gaini amande lai.

¹²Ki mili farai zamai tiki sini n’avut na e wiŋkisi amlai mini sakki z'algama ɗa lai, Ablaŋtaŋkai e wilisi na e wili ɗi.

¹³Yimi tawalki piki hili. Wiyi sini ɗif ni ɗa.

¹⁴Alaw zi spak a binditi agulni ɗif gaini hiinini haw buriki, a ɵasi tawalki na ktai gaini Benyameŋ lai. Ta mu hinafuna ahi ta kai maini ɗif n’a waka ahi duk kai nɵa.

¹⁵Ɗai hanɗa e mili katu tiɗi, e mili farai na zamai tiɗi e yimi Benyameŋ tiɗi lai, e hili e gi war Egipte e siŋki siɗi arni Yosef.

¹⁶Won hlai n’a tala Benyameŋ gaiɗi, Yosef a miɗini wiini ɗif n’abai na midini dalam ɗa: Kiɗi ɗai hanɗa aha, fuɗa wala, da simi lai buri ɗa girvudi ɗai hanɗa aga e simi gaya.

¹⁷Ɗif a za wala na Yosef a miɗini midini paŋ, a kiɗi ɗai ahani Yosef.

¹⁸Hunai te yimiɗi buri a kiɗi aha war fuŋni Yosef. E miɗi e zumu nɵa burini farai na e wiyiŋ amlai warni sakmu z'algama war morkoimu n’avut ɗa zaw. E piyi futi na ɓa e yumumu, e zumu gir armu, e zumu aŋ bagakai tumu gaini ablehökaimu paŋ ɗa kaai!

¹⁹E tûrisi sini ɗif n’abai na midini dalamni Yosef aha mini magala sek e miɗini:

²⁰Za barka epingezaki, tiyi mi hilisi woni na azi ktai ya aŋ wûri wala zi simi

²¹Amma Won hlai na mi hili mi ɗiyi woni buri feŋ ɗa, Won hlai na mi mili mini sakyi edi ɗa, ɗif paŋ a nava faraini amlai mini sakni ɗik ɗik, a dala na mi siŋ ɗa ɵa hiyak. Tiyana mi kiŋsi aŋ tiyi.

²²Mi hilisi na gaini farai zamai war tiyi mi aŋ wûri wala zi simi gaini. Mi siɗi ɗif n’a wiyiɗi faraiyi amlai war sakyi ɗa kai.

²³A waya seŋ a muɗa: Simni hiyak, ki hûni kai, a wiiki godai hanɗa amlai war sakki a Alaw na wiiki, a Alaw na wiini epiki. Dalaki mu navaŋ zek. Asakal par a ɵiɗisi Simeyon su.

²⁴Ɗif a kiɗi ɗai hanɗa aha war dalamni Yosef, a siɗisi yem aŋ mi eziɗi, a sini kuzum mini ablehökaiɗi lai.

²⁵Won hlai n’e ɗa biyi Yosef n’aga a cosi girvudi, e zizini siɗi gaini katu na wiiɗi buri e ɵini ya ɓa aga e simi simi na girvudi ɗa gaini.

²⁶Won hlai na Yosef a cosi aha li, e sini like n’a nafu tiɗi amlai warɗi dilimi hanɗa. E hûrgi azumai midini afti wuzani.

²⁷A zilbiɗi midini zam na wiini amur siɗi; asakal par a muɗa: Epiki na wel na ki miɗiŋa gaini a na jam hek ɗi, a na karni tiɓ ɗi?

²⁸E wiyini seŋ e miɗi: Epiyi na ɵeŋku a na jam, a na karni hai. E gûɓi azumai, e hûrgi azumai.

²⁹Won hlai na Yosef a yima arni amai a tala Benyamin na tawalni, n’ahiɗi emini a zilbiɗi a muɗa: Hanɗa a tawalki n’agwi tar na ki miɗiŋa gaini ɗif? Asakal par a miɗini: Ahiya, Alaw a suku yum.

³⁰Yosef, agulni te va gaini hiinini haw won hlai n’a tala tawalni. A purma buri a paya hlai n’a tuwa woni, a niya amlai warɗi delemini, woni a tuwa.

³¹Asakal par a masi arni edi a niyasi anene, a rodo sini a muɗa: Ɓûrwi simi ɗa edi.

³²E sinisi simi na wiini edi kiini, na wiiɗi nagai kiiɗi lai. Ɗai n’Egipte e simi gaini ni edi kiiɗi, buri futi buriɗi ɗai n’Egipte aŋ simi gaiɗi ɗai na hebre t'aŋ kai, buriɗi hanɗa a wala na hi-hir gara

³³Ɗai na hebre e simnisi wuzani par gaini giri midiɗi marɗi sini n’abai par haa sini n’agwi ta, e tili arɗi marɗi war hunai.

³⁴A siɗi a simi a nafu azumai wuzani ni, amma simi na wiini Benyamin pɗemni a suwa na wiiɗi marni na zamai paŋ azi ɵim, e ci e firiyi lai gaini Yosef.