Read Mousgoum Pi zi tiki 44 Bible Online

Pi zi tiki 44 - Mousgoum bible

Pi zi tiki 44

¹Yosef a sini miɗi wiini ɗif n’abai na midini dalamni a muɗa: Va sak na wiiɗi ɗai hanɗa gaini wala zi simi midini kiɗiɗi n’e libiŋ ta ta. Ku wa farai na wiini ɗif paŋ amai mini sakni ɗik ɗik.

²Amai minni sak na wiini arwagwi n’agwi ɗa ku wûti kawai zi ci na wiya mini ɗik, kawai zi ci zi arzaŋ gaini farai na wiini na wura algama gaini lai.

³Ɗif a za wala na Yosef a miɗini midini paŋ. Won hlai na hlai a siɗa edi li, e hiniɗi ɗai hanɗa e hili, nagai gaini ablehökaiɗi.

⁴E fikiɗi aha war fuŋ n’abai par, e hili maa gaigai kai hai; Yosef a miɗini wiini ɗif n’abai na midini dalamni: Faka amai, lawa piɗi ɗai hanɗa, ku niviɗi li ɗa ku miɗiɗi ɓa: Tiki ki wiyi meefeŋ midini pɗem n’a za siki buri ma ɗa?

⁵Kawai zi ci, zi tili hlai gaini wazagai na wuze na wiini epin-geza t'aŋ tiki na kai ɗi? Na ki zi ɵa ɗa a maɗa? Ki zi meefeŋ.

⁶Ɗif n’abai na midini dalamni a co siɗi a miɗiɗi seŋ hanɗa.

⁷E wiyini seŋ e miɗi: Epin-gezayi a siɗa aŋ muɗa seŋ na maini hanɗa nɵa maɵa maɵa ɗa? A tala hi-hir gara na ɓa bagakaiku e zi wala na maini hanɗa nɵa ɗa.

⁸Farai na mi niviŋ amlai min sakyi z'algama ɗik ɗik, mi wuyuŋkusi aha midini afti na Kanaan par kai ɗi? Mi kiɗi mi hili arzaŋ zaw or ahani epin-gezaku par maɵa maɵa ɗa?

⁹Ɗif n’arbaɗi bagakaiku na wala hanɗa a nava li war tini a nava fiɗi n’edi, tiyi na zamai mi bindi aŋ bagakai na wiini epin-gezayi lai.

¹⁰A muɗa: Pɗem, a za maini na ki miɗiŋ na ɵa. Ni na wala a nava li war tini, a bunda aŋ begeŋa, tiki na zamai seŋ miɗiki kai.

¹¹Witaw tar e mili sakɗi azumai, ɗif paŋ na wiini wiini, e miliŋ edi.

¹²Ɗif n’abai na midini dalam a tika pini aŋ waza wazagai, sini n’abai par haa a vada gaini n’agwi. A niviti kawai zi ci war sak na wiini Benyamin.

¹³E ŋirwi sapa na siɗi edi, ɗif paŋ a mula wazagaini amai duɓani ablehoini, e wiyi aha war fuŋ n’abai.

¹⁴Yuda gaiɗi tawalakini e cûsi ahani Yosef. Yosef a nafu dam hai, e pûki siɗi azumai, e pi arɗi azumai wuzani.

¹⁵A miɗiɗi: Wala na ki zi ɵa ɗa a maɗa, ki siɗi ɓa ɗif na maya ta ɵa a tala hlai na wuze gaini wazagai na wuze ki siɗi sa kai ɗi?

¹⁶Yuda a waya seŋ a muɗa: Mi siɗi aŋ miɗini wiini epin-gezayi a maɗa? Seŋ na mi miɗiŋ miyi par a na wata ɗa? Agami siŋki jreyi katawai wuzaku maɵa maɵa ɗa? Meefeŋ na wiiɗi bagakaiku a siŋkaŋsi edi a Alaw koo! Tala, mi ɗi bagakai na wiini epin-gezayi, tiyi lai, ni na kawai zi ci te nafu tini lai.

¹⁷Mu siɗa aŋ za wala na maini hanɗa ɵa kai; a tala hi-hir gara. Ɗif n’a nivitisi kawai zi ci war tini ɗa aga a za aŋ begeŋa ɗa a ni, tiki na zamai ɗa wiyi amai sini epiki jam.

¹⁸Yuda a torasi gobi sini a ɗuula a muɗa: Za barka epin-geza! Hina begeku a miɗini seŋ ktai wiini epin-gezani, ku dava sini kai: Tuku gaini Faraw ki ɗi kal kal.

¹⁹Epin-geza a ni n’a zilbiɗi bagakaini ɓa epiɗi a na ɗi? Tawalɗi zamai a na ɗi?

²⁰Tiyi mi wiyini seŋ wiini epin-gezayi ɓa: Epiyi a na, a za wel ta. Ahi n’a waŋ war welni a na agwi kadai, tawalni a mra su. A hina piɗi emini a ni ktai, epini a daraŋ gara.

²¹Nɵa ku miɗiɗi wiiɗi bagakaiku ɓa: Ki kiŋasi aga mu giɗimaŋ.

²²Tiyi mi wiyini seŋ wiini epin-gezayi ɓa: Arwagwi hanɗa a sɗa aŋ ɓurwa gaini epini kai, buri ɓa epini aga a mra na ɓa a hinaŋsi li ɗa.

²³Nɵa ku miɗiɗi wiiɗi bagakaiku ɓa "na ɓa tawalki n’agwiyeŋe a halasi azumai gaiki kai ɗa, mu sɗiki wuzani ara duk kai zaŋ".

²⁴Nɵa won hlai na mi wiyi amai sin ɵeŋku na epiyi, mi miɗini seŋ na wiini epin-gezayi.

²⁵Epiyi a muɗa: Wiyi wurumusi wala zi simi agwi.

²⁶Tiyi mi wiyini seŋ ɓa: Tiyi mi siɗi aŋ hili kai, na ɓa tawalyi n’agwiyeŋe aŋ gaiɗi ɗa, aga mi hili. Na ɓa tawalyi n’agwiyeŋe aŋ gaiɗi kai ɗa, aga e hiniyi wuzani arni ɗif ɗa kai.

²⁷Apa na ɵeŋku a miɗiyi ɓa, tiki ki siɗi ɓa muniya te waŋa ali sulu bas,

²⁸na ktai a yima edi sa par, mu sɗa fakat ɓa a lumaŋ a wazagai n’edi buza, buri mu talaŋ duk kai zaŋ haa girna.

²⁹Ki diri ki yimi na hanɗa edi ta par pra. Na ɓa wala na meefeŋ a za sini li aga ki fiɗiŋa, ki piŋa ta na wel hanɗa na war marava.

³⁰Na ɓa mu co ahani apa na ɵeŋku tiyana, na ɓa arwagwi hanɗa aŋ gaiɗi kai, suŋfaɗi a naga sini marni gara,

³¹a talaŋ ɓ'aŋ kai tar aga a mra. Nɵa tiyi na bagakaiku ɗa, aga mi glisi mri midini epiyi na ɵeŋ na wel hanɗa, aga mi tikiŋ azumai war waŋ sek war marava lai.

³²Sɗa ɓa ta na begeku mu ɵiɓasi didiga min seŋ paŋ n’aga a za sini arwagwi hanɗa wuzani epini. Mu miɗinisi ɓa na ɓa mu wayaɗi arwagwi hanɗa kai ɗa, seŋ aŋ mada wuzani apa haa kureɗ.

³³Tiyana ɗa hinaŋa ta na ɵeŋku mu hina aŋ begeni epin-geza war balamni arwagwi ɗa, ni a waya wiini amai gaiɗi tawalakaini.

³⁴Mu siɗa aŋ waya amai sini apa maɵa maɵa ɗa, na ɓa arwagwi hanɗa aŋ gaya kai ɗa, hinaŋa mu tala gir n’aga aza sini apa gaini ara kai.