Read Mousgoum Pi zi tiki 45 Bible Online

Pi zi tiki 45 - Mousgoum bible

Pi zi tiki 45

¹Yosef a kiɗa aŋ rodo sini wuzaɗi nagai paŋ n’e ɗiyi ɵimani gobi kir kai, a ɗuula a muɗa: Birgiɗi ɗaiŋa paŋ anene. Ɗif ktai maa a hina gaini kir kai, nɵa a siŋka sini arɗi tawalakaini.

²A tika pini a tuwa gaini gdaŋ haa ɗai n’Egipte paŋ e ɵini, ɗai n’ahani Faraw paŋ e ɵini paŋ.

³A miɗiɗi wiiɗi tawalakaini: Muta Yosef, apa a na karni tiɓ ɗi? Hunai te yimiɗi tawalakini e ziriyi e siɗi aŋ wiyi seŋ kai.

⁴Yosef a miɗiɗi wiiɗi tawalakini: Tûrisi sa gobi. E tûrisi sini, a muɗa: Muta Yosef, ta na tawalki, ta na ki wiriŋa edi kapai e kiŋa war Egipte.

⁵Amma tiyana ki tûûri hiiniki kai, ki tûrli kai, buri wûri na ki wûriŋasi edi won na ɗa, buri a ɵinaŋasi wuzaki a Alaw, kapai suŋfaki a kurɗa.

⁶Buri ɓa hanɗa a buza n’ag'aŋ sulu na wiyamai te na za midini afti, buza aŋ kai ɵim pra, ɗai aga e hirmi kai, e hiɗi kaalai.

⁷Alaw a ɵinaŋasi wuzaki ɓa kapai pinzibaki a vada edi midini afti hanɗa par paŋ kai, kapai ki siɗi aŋ simni karki. Hanɗa a pli n’edi n’abai.

⁸Nɵa ki ɵiniŋasi won na ki ɗi tiki kai amma a Alaw. A zaŋa aŋ epini Faraw, aŋ epin-gezani dalamni gai hlaini, aŋ Lawan midini afti n’Egipte paŋ lai.

⁹Pirmi witaw aŋ wiyi amai sini apa aŋ miɗini ɓa: Yosef n’ahiku a na muɗa maini nɵa: "Alaw a zaŋa aŋ epin-gezaɗi Egipte paŋ, ku yimasi azuku kai, ku halasi sa witaw,

¹⁰Aga ku sumna midini afti na Gosen, aga ku sumna gobi gaya, tuku aliku, tiyakaiku, haakaiku, ɵaakaiku gaini wazagaiku paŋ.

¹¹Won hlai ni ɗa aga mu suku wala zi simi, kapai simiku a ɗukla kai, tuku, dalamku gaini wazagaiku paŋ, buri buza zi wiyamai a hina katawai ɵim pra.

¹²Ki ɗa tiliŋa gaini arki, Benyamin na tawala a na talaŋa gaini arni lai. Mu miɗiki na muta Yosef gaini ma mal.

¹³Hili ki miɗini wiini apa gaiɗi abai na m’aŋ warɗi aha war Egipte, warɗi na ɗa, gaini wala paŋ na ki kiɗi ki tiliŋ lai, zi witaw aŋ kiŋasi apa azumai won na.

¹⁴Yosef gaini Benyamin na tawalni e kɵi amai wulaɗi marɗi, e tûwi.

¹⁵Yosef a kɵa amai wulaɗi tawalakaini na hanɗa paŋ lai. E tûwi siɗi marɗi, asakal par tawalakaini e hiɗi kalaŋ gaini.

¹⁶Labar a co ahani Faraw ɓa tawalakaini Yosef e cûsi co, amma Faraw gaiɗi ɗaini zi sda a tala arɗi pɗem.

¹⁷Faraw a miɗini wiini Yosef: Miɗiɗi wiiɗi tawalakaiku ɓa e zi maini nɵa "e mili wazagaiɗi duɓani ablehökaiɗi, e wiyi aha midini afti na Kanaan,

¹⁸e milisi epiki gaiɗi ɗaiki asakal par e wiyisi sa kapai mu siɗi wazagai na pɗamai na midini afti n’Egipte, kapai e simi hanɗa lai.

¹⁹Tuku ɗa ku sa miɗi maini nɵa: E yimiɗi saret n’Egipte par piɗi buri e libiɗisi aliɗi, falakaiɗi gaini epiɗi lai kapai e wiyisi.

²⁰E ɵi hama burini wazagaiɗi n’aga a hinasi ka piɗi kai, buri wazagai na pɗamai na midini afti n’Egipte paŋ aga a sa aŋ wiiɗi."

²¹Hanɗa a wala n’alini Izrayel e ziŋ pin miɗi na wiini Faraw. Yosef a siɗi saret gaini wala zi simi na warɗi futi.

²²A sa sini asiya ɗi paŋ sapa zi wi na pɗamai, amma wiini Benyamin a sini arzaŋ sikel miya hu, sapa na pɗamai ɵim lai.

²³Wiini epini buriɗi morkoini, a ɵinini ablehökai na maɵagai doogo gaini wazagai na pɗamai n’Egipte par duɓani, ablehökai na falakai doogo gaini algama duɓani gaini peŋ gaini wazagai zi simi lai.

²⁴Nɵa a hiniɗi tawakaini e hili. Wuzani hiliɗi a miɗiɗi: Ki zi marki warɗi futi kai.

²⁵E niyisi azumai war Egipte par, e cûsi midini afti na Kanaan, ahani Yakob n’epiɗi.

²⁶E miɗini labar na ɓa Yosef a na karni. Tiya n’a bunda aŋ Lawan na midini afti n’Egipte paŋ. Amma hiinini Yakob a bunda kai buri a yima seŋɗi kai.

²⁷E virinini seŋ paŋ na Yosef a miɗiŋɗisi. Asakal par a tala saret na Yosef a ɵinaŋsi miɗi ɗa, hiinini Yakob a tika pini a pla edi.

²⁸Izrayel a ɗuula a muɗa: "Suwi, Yosef n’ahiya aŋ karni hai, sai mu hala mu talaŋ wuzani mriŋa ɓa."