Read Mousgoum Pi zi tiki 46 Bible Online

Pi zi tiki 46 - Mousgoum bible

Pi zi tiki 46

¹Izrayel a hala gaini wazagai na wiini paŋ. A ga a Ber-seba a zini ɓaka wiini Alaw na wiini Isaak n’epini woni.

²War wala na siŋ, ka arni war duvuk, Alaw a yika Izrayel: Yakob, Yakob. Yakob a waya seŋ: M'an na!

³Nɵa Alaw a miɗini: Muta m’Alaw, Alaw na wiini apuku, ku huna burini hili na war Egipte ɗa kai, buri woni aga mu bindiɗi pinzibaku aŋ pinziba n’abai.

⁴Ta aga mu hala gaiku azumai war Egipte, aga mu wuyukusi amai woni na muta lai, ku mra li ɗa aga a arku ɗa a Yosef.

⁵Yakob a faka a Ber-Seba par. Alini e tikiŋ war Saret na Faraw a ɵinaŋsi miɗi ɗa, ni gaiɗi tiyakaini gaiɗi falakaiɗi alini lai.

⁶E mili adumaiɗi gaini haakaiɗi gaini wazagaiɗi na e niviŋ midini afti na Kanaan ɗa paŋ. Yakob a hala war Egipte gaini pinzibani paŋ.

⁷A hala gaiɗi alini na maɵagai, gaiɗi tiyakaini na maɵagai, gaiɗi alini na falakai gaiɗi tiyakaini na falakai lai. A kiɗisi pinzibani paŋ gaini war Egipte.

⁸Yikiɗi aliɗi Izrayel n’e hilisi war Egipte a na maini nlza: Yakob gaiɗi alini gaiɗi tiyakaini lai: Ruben ahini Yakob n’a waŋ avut,

⁹gaiɗi alini: Hanok, Pallu, Hesron, Karmi.

¹⁰Simeyon gaiɗi alini: Yemuwel, Yamin, Ohad, Yakin, Sohar, Sawul ahiɗi muni naka naaniya.

¹¹Levi gaiɗi alini: Gerson, Kehat gaini Merari.

¹²Yuda gaiɗi alini: Sela, Peres, Zera. Er gaini Onan e mri midini afti na Kanaan. Peres a wa ali sulu: Hesron gaini Hamul.

¹³Isakar gaiɗi alini: Tola, Puwa, Yob, Simron.

¹⁴Zabulon gaiɗi alini: Sered, Elon, Yaleyel.

¹⁵Hanɗa e ɗi ali na Leya te wiiɗini wiini Yakob midini hlai na plas na Mezopotamiya gaiɗi ahiɗi na Dina lai. Pɵiɗi alini na maɵagai gaiɗi na falakai paŋ, a za paŋ ɗai doogo doogo hu pi hu.

¹⁶Gad gaiɗi alini: Sifiyon, Haggi, Suni, Esbon, Eri, Arodi gaini Areli.

¹⁷Aser gaiɗi alini: Yimna, Yiswa, Yiswi, Beriya gaiɗi tawalɗi na Sera. Beriya te wa ali sulu: Heber gaini Malkiyel.

¹⁸Hanɗa e ɗi pinzibaɗi Zilpa na Laban a sitiɗi wiiɗi ahini na Leya, e ɗi ali na te wiiɗini wiini Yakob, paŋ ɗai doogo pi ɵaara.

¹⁹Aliɗi Rakel munini Yakob e ɗa sulu: Yosef gaini Benyamin.

²⁰Aha midini afti n’Egipte, Yosef a wa ali sulu: Manase gaini Efrayim gaiɗi Asenat n’ahini Poti-Fera pai zi ɓaka na One.

²¹Benyamin gaiɗi alini: Bela, Beker, Asbel, Gera, Naaman, Ehi, Ros, Muppim, Huppim, Arde lai.

²²Hanɗa e ɗi pinzibaɗi Rakel na te wiiɗini wiini Yakob paŋ ɗai doogo pi puɗu.

²³Dan gaini ahini: Hushim.

²⁴Neftali gaiɗi alini: Yaseyel, Guni, Yeser, Sillem.

²⁵Hanɗa e ɗi pinzibaɗi Bilha na Laban a sitiɗi wiiɗi Rakel, e ɗi ali na te wiiɗini wiini Yakob, paŋ ɗai muguzak.

²⁶Pɵiɗi ɗai na wiini Yakob na ni a wiiɗi, n’e hilisi war Egpite, falakaiɗi alini pɵiɗi arbaɗi kai ɗa, e ɗa paŋ ɗai doogo doogo ɵaara pi ɵaara.

²⁷Alini Yosef n’a wiiɗi war Egipte: Ɗai sulu. Pɵiɗi ɗai paŋ n’ahani Yakob n’e hilisi war Egipte e ɗa doogo doogo muguzak.

²⁸Yakob a ɵinaɗi Yuda wuzani sini Yosef buri a zizinaɗi hlai wuzani a Gosen. Won hlai n’e gi midini afti na Gosen,

²⁹Yosef a zizina Saretni a hala amai a Gosen aŋ nava gaini Izrayel n’epini. Won hlai na arni a mula gaini epini, Yosef a kɵa amai wulani, a tuwa amai wulani haa.

³⁰Nɵa Izrayel a miɗini: Tiyana na mu tala wuzani arku li ya ɗa, mu mra wiya maa kal, buri ku na karku hai.

³¹Yosef a miɗiɗi wiiɗi tawalakaini gaiɗi pakataini epini: Aga mu hala mu zini zaida wiini Faraw, aga mu miɗini ɓa: Tawalakaya gaiɗi pakataini apa e ɗisi ka a Kanaan e cûsi ya.

³²Ɗai hanɗa e ɗi ɗai zi giɗimi farai. E ɗi ɗai n’e wili farai. E kisi adumaiɗi, haakaiɗi gaini ɵaakaiɗi gaini wazagaiɗi paŋ aŋ wonni na.

³³Pra, woni hlai na Faraw aga a yikiki buri aga a zilbiki buri sdaki ɗa a maɗi ɗa,

³⁴aga ki wiyini seŋ ɓa: Ɗaiku ɗa e ɗi ɗai zi wili farai, war agogoiɗi par haa tiyana mi ɗi war sda hanɗa maiɗi talaiyi e ɗika warni nɵa. Nɵa aga ki kiɗi aŋ simni midini afti na Gosen buri ɗai n’Egipte paŋ ɗa, e tiliɗi ɗai zi giɗimi farai arɗi haharai.