Read Mousgoum Pi zi tiki 47 Bible Online

Pi zi tiki 47 - Mousgoum bible

Pi zi tiki 47

¹Nɵa Yosef a halasi a zini zaida wiini Faraw a miɗini: Apa gaiɗi tawalakaya e hilisi midini afti na Kanaan par gaini adumaiɗi, haakaiɗi, ɵaakaiɗi gaini wazagaiɗi paŋ lai, tiyana e ɗa edi midini afti na Gosen

²Asakal par arbaɗi tawalakaini a vara ɗai ɵim a kiɗi wuzani Faraw.

³Faraw a zilbiɗi tawalakaini Yosef: Sdaki ɗa a maɗa? E wiyini seŋ: Ɗaiku e ɗi ɗai zi giɗimi farai, tiyi mi ɗa war sda hanɗa maiɗi tamaiyi e ɗika woni nɵa.

⁴E miɗini wiini Faraw: Tiyi mi hilisi aŋ simni midini aftiku, buri hlai zi simi farai na burini adumai na wiiɗi bagakaiku aŋ kir kai, wiyamai te sawa gdaŋ gara midini afti na Kanaan. Tiyana mi siiwuku hiniyi tiyi na bagakaiku mi simni midini afti na Gosen.

⁵Faraw a miɗini wiini Yosef: Apuku gaiɗi tawalakaiku e hilisi suku,

⁶afti n’Egipte aŋ tuku, tika apuku gaiɗi tawalakaiku war hlai na pɗem, n’a suwa paŋ. A pɗem ɓa e simni midini afti na Gosen ɗa. Na ɓa ku sɗa ɗai n’e kiɗi arbaɗi, ku tikiɗi aŋ abakai midini fara na wiya ta dama lai.

⁷Yosef a kasi Yakob n’epini a siŋkiŋni wiini Faraw, Yakob a ɓaka Faraw.

⁸Faraw a zilbaŋ: Buzaku gama ɗa?

⁹Yakob a wiyini seŋ: Buzani jûgûŋa na blaŋ blaŋ ɗa a na miya gaini doogo doogo hu, a wala n’agwi na meefeŋ kadai, a kiɗa gaini buza na tamaiya e ziŋ war jûgûɗi na blaŋ blaŋ ɗa kai.

¹⁰Asakal n’a ɓaka Faraw ya, Yakob a niyasi aha sini par a hala wiini.

¹¹Yosef a mula epini gaiɗi tawalakai azumai, a siɗi hlai na pɗem n’a suwa paŋ midini afti n’Egipte aŋ wiiɗi midini afti na wiini Ramses maini na Faraw a miɗiŋni nɵa.

¹²Yosef a sa wala zi simi wiini epini, wiiɗi tawalakaini gaiɗi ɗai n’ahani epini paŋ lai pini pɵiɗi aliyagoi ɗa.

¹³Wala zi simi midiɗi yai paŋ aŋ kir kai buri wiyamai te riya amai gara ta. Ɗai n’Egipte gaiɗi ɗai na Kanaan, wiyamai te vada gdaŋɗi edi.

¹⁴Yosef a tapa farai war Egipte, war Kanaan paŋ amai gaini sakalani algamani, a ka farai hanɗa aha war dalamni Faraw.

¹⁵Farai na midini afti n’Egipte gaini na Kanaan lai a vada vad, ɗai n’Egipte paŋ e hilisi sini Yosef e miɗini: Siyi wala zi simi, kapai mi mri arku siyi ca buri ɓa farai tiyi kai ɗa maɵa maɵa ɗa?

¹⁶Yosef a waya seŋ a miɗiɗi: Na ɓa farai tiki kai, ki kiŋasi haakaiki gaini ɵaakaiki ɗa, miɗini farai n’a sumaŋ ɗa aga mu siki wala zi simi lai

¹⁷E kinisi faraiɗi wiini Yosef, ni a siɗi wala zi simi midini lai. Plasaiɗi farani adumai, haakai, ɵaakai gaini ablehökai lai, buza hanɗa yosef a siɗi wala zi simi midini faraiɗi.

¹⁸Won hlai na buza hanɗa a vuga li, e hilisi sini war buza na midini par ɗa e miɗini: Mi siɗi aŋ ŋûyi wuzani epingezaki kai ɓa, farai ɗa a vada vad, pra farani faraiyi ɗa a wiini epingezaki, a hina buri mi sini wiini epingezaki zamai tar a siyi gaini vuwaiyi.

¹⁹Kapai mi mri arku siyi ɵa sa maɵa maɵa ɗa? Vuwaiyi gaiyi tiyi kai ɗa a wala kadai. Wiriyi tiyi gaini vuwaiyi paŋ gaini wala zi simi. Tiyi gaini vuwaiyi paŋ aga mi bindi aŋ bagakai na wiini Faraw, siyi seyem kapai mi kûrɗi, mi mri kir kai, vuwaiyi aga a hina edi aŋ basga kadai kai.

²⁰Yosef a wûrini vuwai n’Egipte paŋ wiini Faraw, buri ɗai n’Egipte paŋ e wûri vuwaiɗi edi, buri wiyamai te nafu siɗio gdaŋ gara. Afti paŋ a bunda aŋ wiini Faraw.

²¹Amma ɗai ɗa, a jûgûɗi aha war fuŋ n’abakai. Sini hagani afti na ktai par haa sini na zamai.

²²Amma Yosef a wura vuwaiɗi paakai zi ɓaka kai, buri gadai a nafu buriɗi sini Faraw par. E simi ɗa sini Faraw par, buri nɵa e wûri vuwaiɗi edi kai.

²³Yosef a miɗiɗi wiiɗi ɗai: Tiyana ɗa, mu wiriki li wiini Faraw gaini vuwaiki paŋ aga mu siki seyem, aga ki bili vuwaiki.

²⁴Sini hiɗini seyemki aga ki sini gal n’ag'aŋ ɵim wiini Faraw, na puɗu n’a hina a wiiki burini simiki, gaiɗi nagai paŋ n’e ɗa ahaki, gaiɗi aliki lai.

²⁵E wiyi seŋ e miɗini: Ku kurɗiyi li, mi nivi yum wuzani arni epingezaki li, tiyana par mi ɗi bagakaini Faraw.

²⁶Yosef a ɗiya gadai ktai n’a na suma haa girna: Aha warɗi Egipte, a dewele buri gal n’ag'aŋ na wiini hiɗini seyem a wiini Faraw. Sai afti na wiiɗi paakai zi ɓaka tar.

²⁷Izrayel a sumna midini afti n’Egipte, midini galni afti na Gosen, Izrayelekai e bindi aŋ tamaini afti, e sisiɗi viya, e bindi viya lai.

²⁸Yakob a za buza doogo pi muguzak midini afti n’Egipte. Buzani Yakob paŋ a za miya gaini doogo doogo puɗu pi muguzak.

²⁹Won hlai na mefeŋni Izrayel a ŋasi gobi, a yika ahini na Yosef a miɗini: Na ɓa mu nava yum li wuzani arku ɗa, wa tuku azumai pini ɓalakŋa, siŋka diriku gaini jreku edi sa, ku paŋa war Egipte kai

³⁰Aga mu hala gaiɗi tamaiya, aga ku tikaŋa edi war Egipte par, ku paŋa warni waŋ na wiiɗi ɗa. A waya seŋ a muɗa: Aga mu za maini na ku muɗaŋa nɵa.

³¹Yakob a waya a muɗa: Haŋa wala muku buri aga ku zaŋ. Yosef a hini wala mini, Izrayel a hurga azumai midini walani zi feŋ amai sini midini sek.