Read Mousgoum Pi zi tiki 48 Bible Online

Pi zi tiki 48 - Mousgoum bible

Pi zi tiki 48

¹Amma asakalni wazagai hanɗa par, e hilisi e midini wiini Yosef ɓa: Apuku a na veglek, a miliɗi alini na sulu gaini, Efrayim gaini Manase.

²E sini labar wiini Yakob ɓa: Yosef n’ahiku a na halasi suku, Izrayel a pa sini amai a sumna midini walani zi feŋ dam.

³Yakob a miɗini wiini Yosef: Alaw zi spak paŋ a siŋka sini ara a Luz midini afti na Kanaan. A ɓakaŋa,

⁴A muɗaŋa ɓa aga mu bunduku ku sisiɗa viya, ku bunda viya, kapai ku bunda aŋ vokɗi pinzibaɗi ɗai viya. Aga mu siɗi afti hanɗa wiiɗi pinzibaku askal sek aŋ wiiɗi haa kureɗ.

⁵Tiyana ali na sulu na ku wiiɗi midini afti n’Egipte wuzani hlai na mu halasi suku war Egipte kai hai, e ɗi wiya, Efrayim gaini Manase, e ɗi wiya maini Ruben na gaini Simeyon nɵa.

⁶Amma ali na ku wiiɗi asakalɗi nagai par e ɗi wiiku. Nagai aga e nivi yiki gaini galni afti na wiiɗi amlai piɗi tawalakaiɗi.

⁷Ta ɗa, war wiyiŋasi n’edi war Mezopotamiya par, mri na wiiɗi Rakel a nvaŋa warɗi futi, aha midini afti na Kanaan gobi gaini niyi n’aha war Öfrata. Mu piti woni ɵimani futi n’Öfrata a dara a muɗa war Betlehem.

⁸Izrayel a tiliɗi alini Yosef a muɗa: Hanɗa e ɗi miɗi asiya ɗa?

⁹Yosef a wiyini seŋ wiini epini: E ɗi aliyagoi n’Alaw a siɗiŋa aha war Egipte na. Epini a waya a muɗa: Kiɗisi sa gobi kapai mu ɓikiɗi.

¹⁰Arni Izrayel a bunda a tala kruf kruf burini wel, a tala kir kai. Won hlai na Yosef a tûrɗisi li, Izrayel a kɵa amai wulaɗi, a yimiɗi amlai sini.

¹¹Asakal par a miɗini wiini Yosef: Mu hiina ɓa aga mu tala wuzani arku kai, tiya n’Alaw a hinaŋa aŋ tiliɗi aliku gaini ara.

¹²Yosef a miliɗisi edi midini kurnaini epini par, a hurga azumai, a pa arni azumai midini afti.

¹³Asakal par, Yosef a miliɗi alini na sulu, a yima Efrayim war tini na wus, midini graŋni Izrayel na muni, Manase war tini na muni, midini graŋni Izrayel na wus. A tûriɗisi sini.

¹⁴Izrayel a miɗiti tini na wus edi, a tikiti midini Efrayim n’agwi ɗa, a tikiti tini na muni midini Manase. Yosef a bunda tini pla buri Manase ahi n’abai.

¹⁵Yakob a ɓaka Yosef a muɗa: Alaw na tamaiya: Abraham gaini Isaak e piyi wuzani arni, Alaw Ni a ɗif zi giɗimi na wiya, ɗipar haa girna.

¹⁶Sleŋ n’a kotoŋa burini meefeŋ paŋ a ɓikiɗi aliyagoi hanɗa, nagai aga e wii yikiŋa edi, yikiɗi tamaiya: Abraham gaini Isaak a wa edi nɵa lai. E sisiɗi viya viya midini afti.

¹⁷A tala ɗa, epini a tikiti tini na wus midini Efrayim, wala hanɗa a sini firiyi kai, a yimiti tini epini buri a binditi edi midini Manase sek.

¹⁸A miɗini: Apa, ɵa kai, buri n’abai ɗa a hanɗa, tikiti tuku na wus midini.

¹⁹Amma epini a ɗiya kai a muɗa: Mu sɗa ya ahiya, mu sɗa ɓa ni lai aga a bunda aŋ pinzibaɗi ɗai, ni lai aga a bunda abai. Amma tawalni n’agwi aga a bunda abai a suwaŋ, pinzibani aga e zi aŋ piniziba viya.

²⁰A ɓikiɗi, mefeŋni a muɗa: Aliɗi Izrayel aga e ɓiki gaini yikiki maini nɵa: Alaw a bunduku maini Efrayim gaini Manase ɵa a tika Efrayim wuzani Manase.

²¹Izrayel a miɗini wiini Yosef: Aga mu mra, amma Alaw aga a za gaiki, aga a wiyikisi aha midini afti na wiiɗi tamaiki.

²²Ta ɗa, mu sutuku Sikem aŋ gal n’aga ku sûwiɗi tawalakaiku edi gaini, hlai ni ɗa mu tikaŋsi tiɗi Amoritekai par gaini kaɵkar gaini ɓaraw.