Read Mousgoum Pi zi tiki 49 Bible Online

Pi zi tiki 49 - Mousgoum bible

Pi zi tiki 49

¹Yakob a yikiɗi alini na doogo pi sulu a miɗiɗi: Tipi kapai mu miɗiki wala n’aga a za siki dawai sek ɗa.

²Tipisi, ziɓiri alini Yakob, ziɓiri wala na Izrayel n’epiki a dara a miɗiŋki.

³Ruben, tuku k’ahiya n’abai, ku gdaŋ na wiya, ku na mu wuku war gawlaŋa, kadai tiɓ ku sûwiɗi tawalakaiku gaini hormo gaini spak lai.

⁴Spakku maini yem n’a ka gdaŋ nɵa, amma aga ku hina aŋ abai wuzaɗi tawalakaiku kir kai. Buri ɓa ku fana gaiɗi muniya ktai midini walaŋa zi feŋ, ku bunda hlaiŋa zi feŋ ɗa hi-hir.

⁵Simeyon gaini Levi e ɗi tawalakai, kitini-mi na wiiɗi a na buri a tuura wala,

⁶Mu dara mu tapa gaiɗi war kitini seŋ na wiiɗi kai, mu dara mu firiya war tipi na wiiɗi kai buri war hiy na wiiɗi e fiɗiɗi ɗai edi, war hiini na degai e ɗûkli sirdai n’ezini garakai.

⁷Tuusa aŋ midini hiy na wiiɗi na gdaŋ gara, gaini suwar zi vilimi na wiiɗi! Aga mu ɓirwiɗi edi siɗi marɗi midini afti na wiini Yakob, aga mu ziriɗi edi arbaɗi Izrayel.

⁸Yuda, tawalakaiku aga e kuluku, gawku aga e rivi wuzaku, alini apuku aga e hûrgi azumai wuzaku.

⁹Yuda! ahiya, tuku k’ahini gurnai, n’a fuɗasi wala li a wayasi, a hurga azumai, a fana waŋ maini gurnai nɵa. Maiɗi gurnai na muni nɵa, n’aga a burgaŋ ɗa asiya

¹⁰Amaraŋai zi pai aga te tika edi war Yuda par kai, amaraŋai na wiiɗi abai edi war pinzibani par kaalai, haa Ni n’a epingezaɗi amaraŋai a cosi, na pinzibaɗi ɗai aga e ɵini pini.

¹¹Ni n’a naga ablehöni war vuwai zi luwuŋ zi vin, ahini Ablehöni sini luwuŋ zi vin, a ma sapani arni vin, gumazini arni seyemni ali luwuŋ zi vin lai.

¹²Arni aga a cora tini vin, sesiyeŋni a bunda muɗokokai tini fiyaw lai.

¹³Zabulon, hlaini zi simni aga a za agoɗom wulani yem-ra n’abai, hulomai n’abakai zi sakala aga a yima amai ahani, arni hagani a na haa amai Sidon ta.

¹⁴Isakar a blehe na kiriyim n’a na amlai warni Berɵem na ɵagani sulu.

¹⁵A tala ɓa hlai n’a sumna woni a pɗem, afti ɗa pɗem lai, a zizina duɓani ɗa aŋ liba zak, a hina sini war sda zi bege.

¹⁶Dan aga a ziti sariya wiini pinzibaɗi ɗaini, maini ktai n’arbaɗi pinziba na war Izrayel nɵa.

¹⁷Dan aga a bunda aŋ wala meefeŋ warɗi futi, aŋ makai na warɗi futi na lölö, n’a luma ezini plasai, ɗif na duɓani a kɵa gaini dandaŋai.

¹⁸EPIƊ-ƊAI! mu baiya kûri na wiiku war ɵeɗ.

¹⁹Gad, gorɓolokai aga e sikiŋ aha, aga a faka amai siɗi, a ɵiriɗi edi.

²⁰Simi na pɗamai aga a halasi midini aftini Aser par, aga a sa wazagai na pɗamai buri simini pai.

²¹Neftali a Widre na gaini pili su, na te wa ali na jaafai.

²²Yosef a tini luwuŋ n’a guɗa gara, a tini luwuŋ na ɵimani yem zi ki, na tini a wa haa amai midini ɵaga.

²³Ɗai zi ɵiɓi ɓaraw e piyini mini, e ɵiɓiŋ gaini ɓaraw, e bili gaw sini.

²⁴Amma ɓaraw na wiini a yimaŋ tini gdaŋ, a kiɗa a muguza graŋni gaini tini gaini huwiyi kai, war gdaŋni Alaw zi spak paŋ na wiini Yakob, war yikini ɗif zi giɗimi, fukuni na wiini Izrayel,

²⁵war yikini Alaw na wiini apuku, a za aŋ zinai na wiiku, war yikini Alaw zi Spak paŋ, a ɓukuku! A ɓukuku gaini ɓiki n’amai won hlai n’amai par, A ɓukuku gaini ɓiki n’azumai war huduk n’azumai pin afti par, A ɓikiɗi falakaiku gaini faraiku lai.

²⁶Ɓiki na wiini apuku n’a suwa huwaŋai na gamai par, n’a suwa hagani boŋorai na marai lai, Biki hanɗa a halasi midini Yosef. Midini ni na gai viri edi n’arbaɗi tawalakaini.

²⁷Benyamin a belemke na ɓasa neŋni; gorof par a luma walani n’a yimaŋ, Koskoi a ɓurwa walani n’a navaŋ ɗa.

²⁸Hanɗa e ɗi pinziba na doogo pi sulu na wiiɗi Izrayel. Hanɗa a wala n’epini a miɗiŋɗi won hlai n’a na ɓikiɗi, aŋ sa sini asiya asiya paŋ ɓiki na wiini wiini.

²⁹Asakal par a siɗi gadaini a miɗiɗi: Mu ŋa ta aŋ hala gaiɗi ɗaiŋa, ki piŋa ɵimaɗi tamaiya, warni wovai na sin huwuŋ, war vowai na wiini Efron, na Hitite,

³⁰war waŋ na siɗi huwuŋ na Makpela, wuzaɗi Mamre, midini afti na Kanaan, vowai n’Abraham a wuraŋ tini Efron na Hitite, aŋ zaŋ aŋ hlai na wiini zi pi ɗai.

³¹Abraham gaiɗi munini na Sara e piɗi woni. E pi Isaak gaiɗi Rebekka na munini woni, mu piti Lea woni lai.

³²Vowai gaini waŋ na siɗi huwuŋ n’aŋ woni paŋ, e wiriŋ tiɗi alini Hek par.

³³Won hlai na Yakob a vada gaini gadai n’a siŋɗi wiiɗi alini, a mula ezini amai midini liyni, suŋfani a wa edi, e tipiŋ gaiɗi tamaini n’e mri ɗa.