Read Mousgoum Pi zi tiki 50 Bible Online

Pi zi tiki 50 - Mousgoum bible

Pi zi tiki 50

¹Yosef a kɵa azumai midini epini, a diiɓaŋ gaini tuwi, a goboŋ azumai.

²Asakal par a sa miɗi siɗi doktorai n’e ɗa war ɵeŋni buri e girdi wala sini epini kapai a hofa kai. Doktorai e girdi wala sini Izrayel.

³Girdini wala ɗa a za mefeŋ doogo doogo puɗu, a mefeŋ n’aŋ gai ɗiyi zaw buri girdini wala sini kopoŋ ɗa. Ɗai n’Egipte e tûwiŋ mefeŋ doogo doogo muguzak.

⁴Won hlai na mefeŋ zi tuwi a vada li, Yosef a miɗiɗi wiiɗi ɗai n’ahani Faraw: Na ɓa mu nava yim wuzani arki li, ki zi barka ki miɗini wiini Faraw ɓa:

⁵Apa a haŋa wala ma a muɗa: Tala, aga mu mra, aga ki piŋa war yeɵ na mu ɓulaŋ buriya dama midini afti na Kanaan. Mu dara mu hala tiyana aŋ pa apa, asakal par aga mu waisi.

⁶Faraw a wiyini seŋ: Hala, pa apuku maini n’a huku wala muku ɗa nɵa.

⁷Yosef a hala aŋ pa epini, ɗai zi sda na wiini Faraw paŋ n’abakai n’ahani paŋ gaiɗi n’abakai na midini afti n’Egipte paŋ lai e hili amai gaini.

⁸Ɗai n’ahani Yosef paŋ e zi nɵa lai, tawalakaini gaiɗi n’ahani epini paŋ. E hini ka midini afti na Gosen e ɗi aliɗi n’agogoi gaini haakaiɗi gaini ɵaakaiɗi lai.

⁹Saretai gaiɗi ɗai zi diɓiri plasai viya e hili gaini Yosef lai. Vokɗi ɗai n’e hili aŋ piŋ ɗa abai gara.

¹⁰E cûwar Goren na Atad, anene duɓani Yurdan par, e ziti fet zi tuwi n’amai gara burini Yakob. Yosef a tuwa epini mefeŋ muguzak.

¹¹Ɗai na Kanaan n’e ɗa midini afti hanɗa e tili tuwi hanɗa war Goren na Atad e ɗûûli e miɗi a tûwi n’abai gara buriɗi ɗai n’Egipte. Nɵa lai e sini yiki wiini hlai hanɗa n’aŋsi anene par duɓani Yurdan ɗa ɓa: "Tuwi na wiiɗi ɗai n’Egipte".

¹²Alini Yakob e zi sini pin miɗi n’a miɗiŋɗi.

¹³E libiŋ midini afti na Kanaan, e piŋ warni waŋ na sin huwuŋ na war vowai na Makpela, vowai n’Abraham a wuraŋ tini Efron na Hitite, aŋ hlai zi pi ɗai wuzaɗi Mamre.

¹⁴Asakalni pini epini, Yosef a waisi aha warɗi Egipte. Ni, tawalakaini gaiɗi nagai n’e hili gaini aŋ pi epini paŋ lai.

¹⁵Won hlai n’e tili ɓa epiɗi a mra su, tawalakini Yosef e miɗi arbaɗi marɗi, Yosef a kiɗa a yimumu aŋ gawni, a waya meefeŋ na mu zuŋmu sini paŋ mudumu lai.

¹⁶E sikitini miɗi wiini Yosef maini nɵa: Apuku a muɗa ka seŋ wuzani mrini maini nɵa.

¹⁷Aga ki miɗini wiini Yosef ɓa: Za barka hina hi n’amai midini gadai na wiiɗi tawalakaiku gaini tuwur na wiiɗi tawalakiku n’e ziŋ suku paŋ lai. A jre e zi meefeŋ suku azi viya, amma za barka, hiniɗi hi n’amai midini gadai na bagakai na wiini Alaw na wiini apuku e ziŋ suku ɗa. Won hlai n’e miɗini seŋ hanɗa, Yosef a tuwa.

¹⁸Tawakaini e hili gaini midiɗi dama e bili siɗi azumai wuzani e miɗi: Tiyi mi ɗi bagakaiku.

¹⁹Yosef a wiyiɗi seŋ: Ki hûni duk kai, ta mu bunda war balamni Alaw ɗi?

²⁰Tiki ki firyi ki ziŋa meefeŋ, Alaw a bundaŋ aŋ pɗem. Gaini hanɗa a kora suŋfa na wiiɗi ɗai viya maini n’a va amai girna na nɵa.

²¹Wuzamu sek ɗa ki hûni kai, aga mu tika haŋgala siki gaiɗi aliki paŋ. A tikiɗi agulɗi azumai gainiseŋ na pɗamai hanɗa, a siɗi arai zi pi lai.

²²Yosef a sumna aha war Egipte, ni gaini pinzibani epini paŋ, buzani paŋ miya gai doogo.

²³A tiliɗi pinziba n’ag'aŋ hu na wiiɗi alini Efrayim gaini arni. Pra alini Makir n’ahini Manase a yimiɗi maini alini nɵa, a wûliɗi amai.

²⁴Yosef a miɗiɗi wiiɗi tawalakaini, aga mu mra, Alaw aga a lûwiiki ɗuwal, aga a milkiɗi edi midini afti hanɗa par aŋ kiki amai midini afti n’a ɵina ha midini gaini wala zi hi miy n’a haŋ sini Abraham, sin Isaak, sini Yakob lai.

²⁵Asakal par Yosef a miɗiɗi wiiɗi aliɗi Izrayel buri e hi wala miɗi maini nɵa: Won hlai n’Alaw a luwiyi ɗuwal li, won hlai n’aga mi hili ɗi edi war Egipte na par, aga mi mili keɵkeku tiyi.

²⁶Yosef a mra war buza miya gai doogo. E girdini wala sini kapai a hofa kai, e tikiŋ war kes aha war Egipte.