Read Mousgoum Pi zi tiki 6 Bible Online

Pi zi tiki 6 - Mousgoum bible

Pi zi tiki 6

¹Won hlai na ɗai e tiki piɗi aŋ sisiɗi viya midini afti, e wii ali na falakai lai ɗa,

²alini Alaw na e tiliɗi aliɗi ɗai e ɗa arɗi jafai gara, e miliɗi nagai n’e diriɗi arbaɗi par aŋ falakai.

³EPIƊ-ƊAI a muɗa: Suŋfa na mu siŋni warni ɗif ɗa aga a hina warni ɵa gamai kai, buri ɓa ni a neŋsi kadai. Mefeŋ ktai aga a mra, wuzamu sek ɗa buzani aga a ɗiya miya gaini caaɓa ta.

⁴War mefeŋni ɗa, ɗai na mogokai e ɗika midini afti, e ɗifu yaw hlai n’alini Alaw e hilisi e fini gaiɗi aliɗi ɗai, haa e wii ali gaiɗi, pinzibaɗi e ɗi gaŋgalaŋai na war mefeŋ n’avut, ɗai na yikiɗi a wa gara.

⁵EPIƊ-ƊAI, a tala meefeŋ na wiini ɗif a riya amai midini afti ta, mefeŋ paŋ agulni te yiva aŋ ɵima midini wazagai na maafanai ɵa.

⁶Agulni EPIƊ-ƊAI te lumaŋ, a ɵa hama sini lai buri a rga ɗif midiɗi yai.

⁷EPIƊ-ƊAI a muɗa: Aga mu vidiɗi ɗai na mu rgiɗi midiɗi yai ɗa edi, aga mu vidiɗi ɗai gaini farai, gaini wazagai n’agogoi, gaini wazagai zi ɗifli n’arbani hlai n’amai buri agula te lumaŋa buri mu rgiɗi.

⁸Amma Nowa a nava yum arni EPIƊ-ƊAI.

⁹Pinzibani Nowa a na maini nɵa, Nowa, ɗif na jre ɗikat arbaɗi pinziba n’e ɗika war mefeŋ na wiini, a ɵina mini Alaw.

¹⁰A wa ali hu: Sem, Kam, Yafet.

¹¹Afti paŋ a hofa wuzani arni Alaw, hlai paŋ a va gaini karai.

¹²Alaw a tilitisi yai ɗa, t'aŋ gaini hûfi ta, buri ɗai paŋ e bi payaiɗi na ɗikat edi azumai midiɗi yai.

¹³Alaw a miɗini wiini Nowa: Buriya Ta, dibini wazagai paŋ a cosi li, buri ɓa afti a va gaini karai na tiɗi ɗai ta, mu dara mu vidiɗi edi gaini afti paŋ.

¹⁴Ku zizina hulum n’abai buriku gaini luwuŋ gofer ta, aga ku zizina arni hlai kiini kiini viya, aga ku ɵirɓa warni n’amlai gaini duɓani paŋ gaini gudron.

¹⁵Hulum hanɗa, ku za mogoni kil miya hu, brukni kil doogo doogo ɵim, wilini n’amai sek kil doogo doogo hu lai.

¹⁶Aga ku zizina wala midini hulum hanɗa, ku za baŋa arbani gaini midini hulum kil ɗaw, arbani amai mogo a suwa agwi, ku ɵa mini hulum ɗa edi kokoni, asakal, par ku za poriyo amlai war arni hu. Poriyo n’avut, n’ag'aŋ sulu, n’ag'aŋ hu lai.

¹⁷Ta aga mu kasi yem n’abai midini afti aŋ tuura wazagai zi rgi na karni gaini n’a suŋfa paŋ n’a na azumai midiɗi yai. Wazagai n’aŋ midini afti paŋ suŋfani aga a wa edi.

¹⁸Aga mu za bonuŋa gaiku tuku, ku niya warni hulum tuku gaiɗi aliku, gaiɗi muniku, gaiɗi falakaiɗi aliku lai.

¹⁹Arbani wazagai na karni paŋ, arbani wazagai par paŋ, ku mula warni hulum gaiku sulu sulu, muni gaini wus, muni gaini wus, kapai a hina karni.

²⁰Arbani pinzibani wazagai zi ɗufli par, arbani pinzibani farai, arbani pinzibani wazagai zi hidili par, sulu arbani hanɗa aga a ruvasi suku kapai a kurɗa.

²¹Tuku aga ku mula wazagai zi simi amlai puku viya, aga a hina aŋ simi na wiiku gaini na wiiɗi lai.

²²Nowa a za maini nɵa, a zaŋ kal kal maini n’Alaw a gdaŋ midini nɵa lai.