Read Mousgoum Pi zi tiki 8 Bible Online

Pi zi tiki 8 - Mousgoum bible

Pi zi tiki 8

¹Midini Alaw a kɵa gaini Nowa, gaini wazagai n’ezini puɗu puɗu n’aha gaini na buza n’a na war hulum n’abai gaini paŋ lai. A hinasi smer a vuvuwa midini afti, yem a tika pini a waya azumai.

²Mini yem n’azumai par pini afti a, mini yem n’amai par a lai, faŋ zi ɵi a ɗiya zaw lai.

³Yem a yima edi midini afti par agwi agwi, haa mefeŋ miya gaini doogo doogo ɵim yem a vada edi midini afti par,

⁴war mefeŋ n’ag'aŋ doogo pi muguzak na wiini tile n’ag'aŋ muguzak, hulum n’abai a hiŋila amai midini huwuŋ Ararat.

⁵Yem a hina aŋ yima edi ɵa haa sini tile n’ag'aŋ doogo. War mefeŋ n’avut na wiini tile n’ag'aŋ doogo merfeŋni huwoŋai a cosi amai.

⁶Asakalni mefeŋ doogo doogo puɗu par, Nowa a mala fenetir n’a zaŋ arni hulum n’abai ɗa edi.

⁷A ɵina zeleke aŋ talasi hlai ɗa, a ɗufla a wayasi, a ɗufla a wayasi azi viya haa afti a huula amai.

⁸Asakal par a ɵina dere ɓa a talasi yem haw na ɓa a waya azumai ya ɗa.

⁹Amma dere te nava hlai na te tika eziɗi woni kai, te wayasi sini war hulum buri yem a na midini afti paŋ, a wa tini anene miɗi a wiyitisi amlai war hulum n’abai ɗa.

¹⁰A baiya haa mefeŋ muguzak, a ɵina dere edi midini afti pra.

¹¹Haa koskoi ta ɗa ɗere a wayasi gaini tini luwuŋ olive na hirnaŋ mini kaai, nɵa Nowa a sɗa ɓa yem a yima edi midini afti par ya.

¹²A baiya haa mefeŋ zamai muguzak, a ɵina dere pra, amma a wayasi sini kir kai.

¹³Amma war buza na miya ɵaara gaini ktai, war mefeŋ n’avut na wiini tile n’avut, yem a hina afti a hula amai. Nowa a yima midini hulum edi, nɵa a tala midini afti paŋ a na hûleŋ.

¹⁴War mefeŋ caaɓa pi muguzak na wiini tile n’ag'aŋ sulu afti a hula paŋ.

¹⁵Alaw a miɗini wiini Nowa:

¹⁶Niyasi edi war hulum par, tuku gaiɗi muniku, gaiɗi aliku gaiɗi falakaiɗi aliku lai.

¹⁷Wazagai n’ezini puɗu puɗu n’a na amlai gaiku paŋ, wala zi ɗufli, farai, wazagai n’agogoi n’a hidila midini afti paŋ, ku mulaŋsi anene, kapai a ɵara edi midini afti paŋ, a wa ali viya, a sisiɗa midini afti lai.

¹⁸Nɵa Nowa, a niyasi anene gaiɗi alini, munini gaiɗi falakaiɗi alini paŋ lai.

¹⁹Wazagai n’ezini puɗu puɗu, wala n’a hidila midini afti paŋ, wazagai zi ɗufli paŋ, wala paŋ a niyasi edi gaini pinzibani pinzibani.

²⁰Nowa a rga gûwiŋ zi yi ɓaka wiini EPIƊ-ƊAI, a yima arbani wazagai n’ezini puɗu puɗu na hilu gaini wazagai zi ɗufli na hilu lai, a za ɓaka zi yi gaini wiini EPIƊ-ƊAI midini gûwiŋ zi yi ɓaka.

²¹EPIƊ-ƊAI a yima ɓaka zi lûgûzi na pɗem, n’a ɵiɗiti agulni azumai ɗa, a hiina a muɗa: Aga mu tusa afti buriɗi ɗai kir kai, buri ɓa haa war pi zi tiki par agul te hoga ɗif sai war meefeŋ sek. Nɵa aga mu vada wazagai na karni edi maini na mu zaŋ na ɵa kir kai.

²²Na ɓa dawai sek, na ɓa afti a na ɗa, sûɗi gaini hiɗini seyem, smer gaini hlai z'afu, fat gaiɗi musai girvudi daiɗi duvuk aga a vada duk kai zaŋ.