Read Mousgoum Pi zi tiki 9 Bible Online

Pi zi tiki 9 - Mousgoum bible

Pi zi tiki 9

¹Alaw a ɓaka Nowa gaiɗi alini a miɗiɗi: Ki sisiɗi viya, ki bindi viya, ki vi midini afti.

²Wazagai na gaini ezini puɗu puɗu na midini afti gaini wazagai zi ɗufli n’arbani hlai n’amai paŋ aga a hûniki. Wazagai zi hidi na midini afti paŋ, gaini hilif na warni yem-ra n’abai paŋ lai aga a sa war tiki.

³Mu siki wazagai paŋ, maini mu siki evek zi gûɗi nɵa, wazagai na karni paŋ, wazagai zi hidili paŋ lai aga a sa siki aŋ walaki zi simi.

⁴Amma wala zi rûzi gaini n’a mra kiini, ki limiŋ kai buri ɓa felni a ma edi kai.

⁵Nɵa lai, burini felki n’a suŋfaki dama ɗa, aga mu zilbaŋ war tini wala n’ezini puɗu puɗu, war tini ɗif lai, asiya siya paŋ n’arbaki n’a fuɗa maini li aga mu zilba felni war tini.

⁶Ɗif n’a ma felni maini edi, maini aga a ma felni edi lai; buri Alaw a rga ɗif maini sini Ni n’Alaw nɵa.

⁷Amma tiki ɗa, ki sisiɗi viya, ki bindi viya, ki ɵiri edi midini afti, ki vi midini afti paŋ.

⁸Alaw a miɗini wiini Nowa gaiɗi alini:

⁹Mu dara mu za bonuŋa gaiki, gaini pinzibaki n’asakal sek ɗa lai.

¹⁰Gaini wazagai na karni n’a na gaiki paŋ: Wala zi ɗufli, farai, wazagai n’ezini puɗu puɗu n’edi buza n’a na gaiki, gulaini ɓa, wala paŋ n’a niyasi edi war hulum par gaiki, koo a wazagai n’edi buza.

¹¹Aga mu za bonuŋa gaiki, wala na karni ktai ma aga a ɓa mini yem n’abai nɵa kir kai, yem n’abai aga a biti yai kir kaalai.

¹²Alaw a muɗa: Wala n’a siŋka bonu n’arba gaiki gaini wazagai na krani n’a na gaiki lai haa sini pinziba na wuzaki sek haa kureɗ ɗa a hanɗa.

¹³Mu tika kraŋ na wiya amai arbani ɗugul kapai a za aŋ wala zi siŋki na wiini bonu n’arba gaiɗi yai.

¹⁴Won hlai na mu kasi ɗugul zi faŋ li amai par midini afti, won hlai na ɗai e tili kraŋ li amai arni ɗugul,

¹⁵mada aga a kɵa gaini bonu n’arba gaiki tiki gaini wazagai na karni paŋ, koo a na wata ɗi, yem aga a bunda aŋ yem n’abai n’aga a ɓulka wala edi kir kai zaŋ.

¹⁶Kraŋ aga a ɓasa amai arbani ɗugul, aga mu talaŋ kapai mada a kɵa gaini bonu n’a vada kai n’arba gaini wazagai na karni paŋ, wala na karni n’a na midini afti paŋ.

¹⁷Alaw a miɗini wiini Nowa: Hanɗa a wala n’a siŋka bonu na mu zaŋ arba gaiku, gaini wazagai na karni n’a na midini afti ɗa paŋ lai.

¹⁸Alini Nowa na e niyisi edi warni hulum n’abai ɗa par: A Sem, kam gaini Yafet. Kam ɗa a epini Kanaan.

¹⁹Nagai na hu hanɗa e ɗi alini Nowa, gaiɗi nagai afti paŋ a va gaini pinzibaɗi.

²⁰Nowa a ɗif zi hirim n’a pa luwuŋ zi vin avut.

²¹A ca vin n’a yimaŋsi sini luwuŋni par, a ciina gaini, a hina ganala amlai warni gumuni.

²²Kam n’epini Kanaan a tala epini a na ganala, a hala a virniŋɗi seŋ hanɗa wiiɗi tawalakaini na sulu na e ɗa anene.

²³Sem gaini Yafet e mili sapa na wiini Nowa, e miliŋ gaiɗi sulogoiɗi paŋ amai wulaɗi, e wiyi gaini duɓaɗi, e ŋûyi ganala na wiini epiɗi, arɗi gaini bindi edi sini par, e tili ganala na wiini epiɗi kai.

²⁴Won hlai na vin a ɵara arni par li, a ɵina labar na ahini n’arba a zaŋ sini ɗa,

²⁵A ɗuula a muɗa: Tusa a sumna midini Kanaan, a hina aŋ begeɗi bagakaiɗi tawalakaini.

²⁶A muɗa pra: Kol sini EPIƊ-ƊAI, Alaw na wiini Sem, Kanaan aga a sumna aŋ begeni.

²⁷Alaw a sini afti viya wiini Yafet, Yafet a sumna war gumu na wiini Sem lai, amma Kanaan a hina aŋ begeɗi!

²⁸Asakal yem n’abai par, Nowa a za buza miya hu gaini doogo doogo ɵim.

²⁹Buzani Nowa paŋ a za miya ɵeeŋe gaini doogo doogo ɵim, asakal par a mra.