Read Mousgoum 2 Samuwel 1 Bible Online

2 Samuwel 1 - Mousgoum bible

2 Samuwel 1

¹Asakal mrini Sawul par, hlai na David a rɗa li amai midiɗi ɗai na Amalek, a wayasi a za mefeŋ sulu a Sikla.

²War mefeŋ n’ag'aŋ hu, ɗif ktai a halasi war kaŋ na wiini Sawul ɗa par. Sapa sini gaini ŋiriwi edi, alogodo gaini pûki amai midini lai. Won hlai n’a cosi wuzani David, a bla sini azumai, a hurga azumai wuzani.

³David a zilbaŋ: Ku halasi wata par ɗa? A miɗini: Mu prasi edi pini vokɗi askarai na wiiɗi Izrayel ɗa par.

⁴David a zilbaŋ pra: Hlai a na edi maɵa maɵa ɗa? Muɗaŋa haw, a miɗini: Askarai na Izrayel ɗa e pri edi yaw, ɗai e mri piɗi viya, Sawul na gaini Yonatan n’ahini paŋ e mri paŋ.

⁵David a miɗini wiini ɗif n’a sini labar ɗa: Ku sɗa ɓa Sawul a mra su, Yonatan n’ahini a mra su lai maɵa maɵa ɗa?

⁶Ɗif n’a sini labar a miɗini: Mu nafu amai midiɗi huwuŋ Gilbowa zaw, Sawul a bla sini miɗi kawaini su, buri ɓa saretai zi gaw gaini plasai na wiiɗi gawni a haɵaŋsi amai haɵ.

⁷Hlai n’a bundasi arni a talaŋa, a yikaŋa, mu ɵinini ka lai.

⁸A zilbaŋa ɓa: ta mu ɗif na wata par ɗa? Mu wiyini seŋ ɓa: Mu ɗif na war pinzibani Amalek.

⁹A muɗaŋa: Torosi sa gobi, fuɗaŋa, buri ara a na walaŋa, koo ɓa suŋfa aŋ wara ta hai kaw ɗa.

¹⁰Mu toro sini gobi, mu fuɗaŋ su, buri mu sɗa ɓa aga a kurɗa mini kɵini na azumai ɗa par kai. Asakal par mu tikitisi bogorai na midini tiɓ ɗaw, mu wasi kiya na wulani tini ɗa ku lai. Ta ɓa mu kuŋkusi ca.

¹¹David a yima sapa na sini a ɓasaŋ edi, ɗai na pini paŋ e zi nɵa.

¹²E ɵi hama siɗi, e tûwi, e simi wala kaalai, e ci yem kaalai haa koskoi burini Sawul gaini Yonatan n’ahini, gaiɗi ɗai na wiini EPIƊ-ƊAI, ɗai na Izrayel n’e mrisi mini gaw ɗa lai.

¹³David a zilba ɗif n’a kinisi labar ɓa: Tuku ku na wata par ɗa? A wiyini seŋ: Mu pinzibani Amalek, m’aŋ woni na aŋ zak.

¹⁴David a miɗini: Hunai puku kai, haa ku fuɗa ɗif n’EPIƊ-ƊAI a varaŋ edi ɗaw ɗa maɵa maɵa ɗa?

¹⁵David a yika ktai arbaɗi askaraini par a miɗini: Hala fuɗaŋ. Askar ɗa a fuɗaŋ edi.

¹⁶David a miɗini: Ku rga suku ya, felku a zilba war tuku, buri ku muɗa gaini muku ɓa: Ku fuɗa ɗif n’EPIƊ-ƊAI a varaŋ edi ɗa ku tuku.

¹⁷Asakal par David a ziti yamai zi tuwi ktai burini Sawul gaini Yonatan,

¹⁸a muɗa: Kapai e hitiriɗi ɗai na Yuda aŋ ɵiɓi ɓaraw, yama hanɗa aŋ gaini ɗû war maktuɓ na wiini Ɗif na jre ɗa.

¹⁹Kol na wiiɗi Izrayel, n’a mra amai midini huwuŋ, e mri ɵa maɵa maɵa ɗa gaŋgalaŋaiku ɗa!

²⁰Ki si labar hanɗa war fuŋ n’abai na Gat ɗa kai, ki miɗiŋ war futi n’agogoi na Askelon ɗa kai, q1 kapai falakaiɗi Filistrekai e firiyi pumu kai, kapai falakaiɗi gazɗaŋai hanɗa e pri amai kai.

²¹Huwuŋ na Gilbowa, maaɗai aga a wa muduku kai, faŋ aga a ɵa muduku kaalai. Vuwai z'alam aga a za amai muduku kaalai, buri ɓa gamar na wiiɗi gaŋgalaŋai a tika siyer ɗa woni, gamar na wiini Sawul ɗa e girdi emel sini kai.

²²Wuzaɗi gawɗi n’e fiɗiɗi edi ɗa, wuzani spakɗi gawɗi lai ɗa, ɓaraw na wiini Yonatan ɗa a waya duɓani kai, kaɵkar na wiini Sawul ɗa ɗe a wayasi kadai kaalai.

²³Sawul gaini Yonatan karɗi par ɗa e diri marɗi gara, mri a kiɗa a ɓirwiɗi edi kaalai, nagai kokolakai e sûwi muka agulɗi gdaŋ a suwa gurnai lai.

²⁴Falakai na Izrayel, tûwi Sawul, ni n’a naka a siki sapa na pɗamai aŋ wi siki, n’a za wazagai zi juf zi or sini sapaki lai ɗa.

²⁵Gangalaŋai ɗa, e mri edi mini hatam ɵa maɵa maɵa ɗa! Yonatan ɗa a mra amai midini huwuŋ ɵa maɵa ɗa!

²⁶Yonatan na marmaya, m’aŋ warni kwimi n’abai buriku, mu duruku gara, diri na ku daraŋa ɗa a suwa abai gara, a suwa diri na falakai e diri maɵagai gaini ɗa.

²⁷Gangalaŋai hanɗa, e mri ɵa maɵa maɵa ɗa, ɗai zi gaw hanɗa e vidi edi ɵa maɵa maɵa ɗa?