Read Mousgoum 2 Samuwel 10 Bible Online

2 Samuwel 10 - Mousgoum bible

2 Samuwel 10

¹Mefeŋ agwi asakal hanɗa par, pai na wiiɗi Ammonitekai a mra, Hanun n’ahini a suma pai war balamni.

²David a hiina a muɗa: Aga mu za pɗem sini Hanun n’ahini Nahas maini n’epini a zaŋ sa ta ɗa nɵa. Nɵa a ɵiniɗi ɗaini aŋ ɵiɓini wuti burini mri na wiini epini. Ɗai na wiini David e hili e cû midini afti na wiiɗi Ammonitekai.

³Amma abakai na wiiɗi Ammonitekai e miɗini wiini Hanun n’epini gezaɗi: Ku hiina na ɓa David a ɵinasi ɗai na ɗa buri hormo na wiini apuku, buri e suku arai zi pi wiiku tuku lai ɗi? David a ɵiniɗisi ɗai na ɗa aŋ tili fuŋ n’abai ɗa, aŋ tili ezini hlai ɗa, kapai asakal par e tûûriŋ edi lai kai ɗi.

⁴Hanun a yimiɗi ɗai na wiini David ɗa, a faɗa galni muɗgi na miɗi ɗa edi, a ɗukla sapa na siɗi ɗa haa amai sini flesɗi ta ta, asakal par a birgiɗi.

⁵Ɗai e kinisi labar wiini David, David a ɵina ɗai siɗi buri ɓa ɗai hanɗa e ɗifu war siyer. Pai a miɗiɗi maini nɵa: Simnisi a Yeriko ca, haa muɗgi na miki a diya haw, kapai asakal par ki wiyisi aha.

⁶Ammonitekai e siɗi ɓa e bindi siɗi li haharai arni David pini sdaɗi n’e ziŋ ɗa. Nɵa Ammonitekai e piyisi ɗai aŋ zini piɗi arbaɗi ɗai na Siriya na war Bet-Rehob gaiɗi ɗai na Siriya, na Soba par lai. E zi paŋ askarai dubu caaɓa. E piyisi askarai dubu ɗaw pini pai na Maaka par, piɗi ɗai na Toɓ par askarai dubu doogo pi sulu lai.

⁷David a ɵina hanɗa, a ɵina Yowab gaiɗi askaraini na agulɗi a huna kai ɗa.

⁸Ammonitekai e niyisi edi, e giri siɗi mini hatam mini magala na wiiɗi kapitalɗi gar. Ɗai na Siriya na Soba par gaiɗi na Rehoɓ par, ɗai na Toɓ par gaiɗi na Maaka par lai e ɗisifu edi war basga par kiiɗi lai.

⁹Won hlai na Yowab a tala ɓa hatam aŋsi wuzani par lai, duɓani par lai ɗa, a viriɗi askarai n’e siɗi hatam gara na war Izrayel ɗa paŋ, a giriɗi wuzaɗi ɗai na Siriya gar.

¹⁰Piɗi askarai n’a hina, a tika Abisai na tawalni midiɗi ta, a giriɗi miɗi Ammonitekai gar lai,

¹¹asakal par a miɗini wiini tawalni maini nɵa: Na ɓa ɗai na Siriya e sûwiŋa li gaini gdaŋ ɗa, ku lawaŋa ɗuwal, na ɓa Ammonitekai e suwuku li gaini gdaŋ ɗe aga mu luwuku ɗuwal lai.

¹²Ɗiya gdaŋ, hutumumu gaini gdaŋmu buriɗi ɗaimu gaini fuŋ n’abakai na wiini Alaw na wiimu lai. EPIƊ-ƊAI a za maini n’a dara nɵa.

¹³Nɵa Yowab gaini vok na wiini e hili aŋ hitimi gaiɗi ɗai na Siriya, amma ɗai na Siriya ɗa e pri edi wuzaɗi.

¹⁴Won hlai na Ammonitekai e tiliɗi ɗai na Siriya e ɗa rivi ɗa, nagai lai e pri edi wuzani Abisai, e niyi aha war fuŋ n’abai ɗa. Nɵa Yowab a wayasi edi mini hatam na gaiɗi Ammonitekai par a halasi a Yeruzalem.

¹⁵Won hlai na ɗai na Sirya e tili ɓa ɗai na Izrayel e rɗi amai midiɗi li, e tipiɗi askarai na wiiɗi paŋ war hlai ktai.

¹⁶Hadadezer a ɵina ɗai aŋ siɗi miɗi wiiɗi askarai na Siriya n’e ɗa midini afti na anene duɓani ra Öfrata par ɗa, nagai e hilisi haa a Helam ta, abai na midiɗi ɗa a Sobak abaiɗi askarai na wiini Hadadezer.

¹⁷Ɗai e kinisi labar wiini David, David a tipiɗi askarai na Izrayel ɗa paŋ, e hiwi Yurdan ɗa amai, e hili a Helam. Ɗai na Siriya e girisi mini David aŋ hatam, e fiki hatam gaini lai.

¹⁸Ɗai na Siriya e pri edi wuzaɗi ɗai na Izrayel, David gaiɗi ɗaini e fiɗi plasai n’a gidiya Saret zi gaw miya muguzak, askarai na gaini plasai dubu doogo doogo puɗu lai. E zini wuruk wiini Sobak abaiɗi askarai na Siriya ɗa, a mra war hlaini dama.

¹⁹Won hlai na Paakai n’e ɗa pini Hadadezer ɗa paŋ e tili ɓa ɗai na Izrayel e rɗi amai midiɗi li, e piyi futi aŋ simni ɵeɗ gaiɗi Izrayel, e bindi aŋ ɗai na piɗi lai. Ɗai na Siriya e hûni gamai, e wiyisi aŋ zini piɗi Ammonitekai kir kai.