Read Mousgoum 2 Samuwel 11 Bible Online

2 Samuwel 11 - Mousgoum bible

2 Samuwel 11

¹Buza na midini maini par ɗa, war sarti na paakai e niyi edi aŋ hatam woni ɗa, David a ɵina Yowab gaiɗi askaraini, gaiɗi ɗai na Izrayel paŋ aŋ hitima gaiɗi Ammonitekai. E fiɗiɗi Ammonitekai edi, e cikiti Raba cak lai. Amma David a hinasi a Yeruzalem dam.

²Kuskoi ktai, asakal na David a vada gaini si n’amla li, a niya amai midini dalamni aŋ guna blaŋ blaŋ. Amai woni par a tiliti muni ktai te na ma siɗi, muni na ɗa juvi gara.

³David a yima labar midiɗi muni hanɗa, ɗai e sini labar ɓa: Te Batseba n’ahini Eliyam, na munini Uriya na Hittite par.

⁴David a ɵina ɗai piɗi aŋ yikitinisi. Te halasi ahani, a fana gaiɗi. Batseba, daiɗi te vadasi na ɗa a vidi hai, te zasi na siɗi edi hilu hai lai. Asakal hanɗa par te hala ahaɗi.

⁵Batseba te tika fel, te ɵina sini David aŋ miɗini ɓa te na ziya.

⁶David a ɵina pini Yowab ɓa a ɵininisi Uriya na Hittite par ɗa aha, Yowab a ɵiniŋnisi lai.

⁷Uriya a cosi sini, David a zilbaŋ: Yowab ɗa a na jam hek ɗi? Ɗai na Izrayel paŋ ɗa e ɗa wiiɗi jam lai kai ɗi? Labar na wiini hatam lai kai ɗi?

⁸David a miɗini wiini Uriya: hala aha ta, kapai suku amla agwi. Uriya a niyasi ahani pai par, pai a ɵinini katu pini.

⁹Amma Uriya a fana anene mini magala na wiini pai gaiɗi ɗai na wiini epin-gezani paŋ, a hala ahani kai.

¹⁰E hilisi e miɗini wiini David ɓa: Uriya ɗa a hala aha kai. David a miɗini wiini Uriya: Ku halasi a morkoi par, ku daba kaw aha ta kai ɗa buri maɗa?

¹¹Uriya a miɗini wiini David: Zunduk na wiini EPIƊ-ƊAI ɗa lai, ɗai na Izrayel gaiɗi na Yuda ɗa lai, e simni war gumu. Yowab n’epin-geza gaiɗi askarai na pini ɗa, e fini edi war basga. Kapai ta, mu hala aha mu suma lai, mu ca lai, mu fana gaiɗi muniya lai ɗa! Mu ha ma gaiku tuku zaŋ, aga mu za wala na maini hanɗa ɵa duk kai zaŋ.

¹²David a miɗini wiini Uriya: Pɗem, ku yiva girna dam, dawai dam lai kapai, asakal par mu hunuku ku hala wiiku. Uriya a sumna a Yeruzalem haa dawaini ta.

¹³David a yikaŋ ahani aŋ suma aŋ ca gaini, a ciinaŋ gaini ci. Uriya a niyasi ahani pai par koskoi gaini cini su, amma gaini hanɗa paŋ a hala aha kai, a fana gaiɗi ɗai na wiini epin-gezani ɗa.

¹⁴Dawaini Won hlai na hlai a sɗa li edi, David a ɗûti letre wiini Yowab ɗo, a ɵinitini tini Uriya.

¹⁵A ɗo warɗi maini nɵa: Ki ɗiyi Uriya ɗa edi mini hlai tar, hlai na hatam aŋsi woni par gdaŋ ɗa, asakal par tiki ki wiyi gaini duɓaki, ki hiniŋ kiini kapai gawni e zini wuruk a mra.

¹⁶Yowab, n’a sɗa fuŋ n’abai na Rabba ɗa ya a ɗiya Uriya Won hlai n’a sɗa ɓa askarai na warni par ɗa kurfakai gara.

¹⁷Maɵagai n’aha war fuŋ n’abai par, e niyisi edi, e ciki Yowab, e fiɗi ɗai viya piɗi ɗai na Izrayel, gaiɗi askarai na wiini David, Uriya na Hittite par kaw e fiɗiŋ su lai.

¹⁸Yowab a ɵina ɗif sini David aŋ sini labar midini hatam n’a za ɗa.

¹⁹A sini gadai wiini ɗif n’a ɵinaŋ ɗa maini nɵa: Won hlai na ku sini labar na midini hatam li wiini pai paŋ ɗa,

²⁰na ɓa ku tala pai a za hiy li, a muɗuku li ɓa: Tiki ki hili aha sini fuŋ n’abai ɗa gobi aŋ hitimi buri maɗa? Ki siɗi ɓa amai par midini ɵaga kaw ɗa, ɗai e kiɗi e ɵiɓisi nɵa kai ɗi?

²¹Abimelek n’ahini Yerubbeset ɗa a fuɗaŋ ɗa asiya ɗa? Te muni na te blasi ahi-fuŋ amai par midini ɵaga kai ɗi, a mra a Tebes maini hanɗa ɵa kai ɗi? Tiki ki hili aha siɗi zilaagai gobi tiɓ buri maɗi ɗa, aga ku miɗini ɓa: Uriya na Hittite par na ɗifku ni kaw a mra su lai.

²²Ɗif n’e ɵiniŋ a hala, a kiini labar na Yowab a miɗiŋni paŋ wiini David.

²³Ɗif a miɗini wiini David: ɗai hanɗa, gdaŋɗi a sûwiyi suwai, e niyisi haa edi piyi war basga, amma tiyi mi wiyiɗi gaini duɓaɗi haa mini fuŋ n’abai ɗa ta.

²⁴Ɗai zi ɓaraw ɗa e ɵiɓisi amai par midiɗi zilaagai ɗa, nɵa askarai na wiiku ɗa zamai e nivi mri, Uriya na Hittite par na ɗifku ɗa a na arbaɗi ɗai hanɗa lai.

²⁵David a miɗini wiini ɗif n’e ɵiniŋsi ɗa maini nɵa: Hala ku miɗini wiini Yowab ɓa: A huwya sini war seŋ hanɗa kai, gaw te ɓa ɗai maini hanɗa ɵa. Amma a zizina sini sini fuŋ n’abai hanɗa pɗem ta, sai a tuuraŋ edi. Ku sini arai zi pi maini hanɗa nɵa.

²⁶Won hlai na Batseba, na munini Uriya te ɵina ɓa mafaɗi a mra su ɗa, te tuwaŋ, te za grohoni lai,

²⁷asakal grohoni par ɗa, David a yimiti aha sini, te bunda aŋ munini te wiini ahi ktai. Amma wala na David a zaŋ ɗa a sini firiyi wiini EPIƊ-ƊAI kai.