Read Mousgoum 2 Samuwel 13 Bible Online

2 Samuwel 13 - Mousgoum bible

2 Samuwel 13

¹Asakal hanɗa wala ktai a za maini nɵa, Absalom n’ahini David ɗa tawalni ktai te nafu, te wa juvi gara, yikiɗi ɓa, Tamar. Amnon n’ahini David na emini kiiɗi ɗa a firiyiti ta.

²Hiinini na midiɗi Tamar na tawalni ɗa a bundaŋ veglek. Amma a sɗa wala ktai n’a zaŋ siɗi kai, buri ɓa Tamar te ɓulmi na te fanaka gaini wus duk kai.

³Marmaini Amnon ktai a nafu, yikini ɓa Yonadab a ahini Simeya na tawalni David, a ɗif na yel gara.

⁴A zilbaŋ ɓa: Gorof par paŋ suku a yima edi kai ɗa, buri maɗa? A zuku tiɓ ɗa a maɗa? Amnon a wiyini seŋ: Mu firiyiti Tamar na tawalni Absalom na aruwaini apa ɗa.

⁵Yonadab a siŋkini yel ktai maini nɵa: ku fana midini liyku waŋ, ku za suku aŋ ɗif zi veglek, Won hlai na apuku a halaɗi li aŋ ɗuguluku ɗa, ku miɗini ɓa: A hinitisi Tamar na tawalku ɗa te halasi te suku simi, te ɗa simi hanɗa wuzani arku, arku siɗi ca, asakal par na dama te kuŋkusi, nɵa aga ku sumaŋ.

⁶Amnon a fana azumai waŋ, a za sini veglek ta, pai a halasi sini, Amnon a miɗini wiini pai: Za barka, ku hinitiŋasi Tamar na tawala te halasi te zaŋasi lagiya na agogoi sulu, te zaŋ ɗa ara sini ca, te kaŋŋasi te na mal, nɵa aga mu lumaŋ.

⁷David a ɵina ɗif piɗi Tamar a miɗiɗi: Ku hala ahani Amnon na tawalku kapai ku zini simi.

⁸Tamar te hala ahani Amnon na tawalɗi, a nafu azumai waŋ, te haɗa avdi, te likaŋ, te za lagiya na agogoi gaini wuzani arni, te daŋ lai.

⁹Asakal par te tika wala n’e di lagiya warni, te bundaŋ warni wala zamai wuzani arni, amma a firiya a suma kai. Amnon a muɗa: miɗiɗi wiiɗi ɗai n’amlai ɗa buri e niyi anene, ɗai n’amlai ɵimani ɗa paŋ e niyisi anene.

¹⁰Amnon a miɗiɗi wiiɗi Tamar: kaɗi lagiya ɗa amlai warɗi dilimiŋa sek kapai ku saŋŋa mu sumaŋ. Tamar te mula lagiya na te zaŋ ɗa, te kiŋni wiini Amnon na tawalɗi amlai warɗi delemini.

¹¹Won hlai na te na sini lagiya kapai a sumaŋ ɗa, a yimiti a miɗiɗi: Tawala, halasi fana gaya.

¹²Te miɗini: Tawala, a za kai, zaŋa gdaŋ mada kai, buri a wala n’a na za war Izrayel kai. Ku za wala na hi-hir hanɗa kai.

¹³Ta ɗa kapai mu ka siyer hanɗa wata ɗa? Tuku ɗe aga ku bunda warɗi Izrayel aŋ ɗif na nafani aŋ kai. Nɵa ku zilba pai ɗa ta, aga a bla edi suku ɓa ku tikaŋa kai ɗa kai.

¹⁴Amma a dara a yima seŋɗi kai. A yimiti, a cikiti azumai, a fana gaiɗi gaini gdaŋ.

¹⁵Asakal par, Amnon a bunda a firiyiti kir kai, miisi n’a bunda a miisiti ɗa a suwa diri n’a diriti ɗa. Amnon a miɗiɗi: fakaɗi ma par.

¹⁶Te miɗini: Zaw kai, birgi na ku burgaŋa maini hanɗa nɵa ɗa, meefeŋni ɗa a suwa meefeŋ na ku zaŋŋa avut ɗa pra. Amma a dara a yima seŋɗi kai.

¹⁷A yikasi gawla n’a za sda ahani ɗa a miɗini: Halasi birgitiɗi ahiyagwi hanɗa amlai ahaya par su, ku ɵa mini hlai ka lai.

¹⁸Gawla zi sda ɗa a birgitisi Tamar anene su, a ɵa mini hlai ka. Tamar te nafu gaiɗi sapai na pɗemi siɗi ɗik, n’e wiŋ siɗi ɗa e ɗi mairamai na ɓulamai n’e fini gaiɗi maɵagai kai hai.

¹⁹Tamar te ko alogodo midiɗi, te ɓisiti sapaiɗi zi mairam na pɗemi ɗa edi, te mulasi tiɗi midiɗi ca, te tikasi tuwi midiɗi ɗaw.

²⁰Absalom na tawalɗi a zilbiti: Amnon na tawalku a fana gaiku aŋ gdaŋ ɗi? Tiyana ɗa, tawala ba ba, a tawalku, ɵa muduku su. Tamar te hina ahani Absalom na tawalɗi dam maiɗi muni na mafaɗi a ɵitisi su nɵa.

²¹Won hlai na pai David a ɵina seŋ n’a za ɗa paŋ ɗa, a za hiy abai gara.

²²Amma Absalom a muɗa seŋ gaini Amnon na tawalni kir kai, a tikaŋ warni ta, burini feŋ n’a fana gaiɗi Tamar na tawalni aŋ gdaŋ ɗa.

²³Buza sulu asakal hanɗa par, Absalom a yikiɗisi ɗai zi ɵi ayirni adumaini ahani a Baal-Hasor gobi gaini Efrayim. A yikiɗisi alini pai ɗa kafa lai.

²⁴Absalom a hala sini pai a miɗini: Girna m’aŋ gaiɗi ɗai zi ɵi ayirni adumai ahaya, ku za barka halasi miɗi fet hanɗa ahaya gaiɗi ɗaiku n’abakai ɗa.

²⁵Pai a miɗini wiini Absalom: Zaw kai ahiya, mi kiɗi mi hiliɗi paŋ kai, aga mi huwyuku kadai. Absalom a siika mini, pai a ɗiya kai, amma a hala sek ɗa a ɓakaŋ ta.

²⁶Absalom a muɗa: Na ɓa tuku ku hala hili kai ɗa, hina Amnon na tawala a halaɗi gaiyi. Pai a miɗini: A halaɗi ahaku tiɓ aŋ zi maɗa?

²⁷Absalom a siika mini, pai a hina Amnon gaiɗi alini na zamai ɗa paŋ e hili gaini.

²⁸Absalom a midiɗi wiiɗi ɗai n’e zi sda ahani: Ki tiki hangalki sini Amnon ta. Won hlai n’a ciina li, na agulni te va li gaini firiyi lai, hlai na mu miɗiki li ɓa ki fiɗi Amnon ɗa, ki fiɗiŋ, ki hûni, kai. Mu miɗiki na ɗa mu ta kai ɗi? Yimiti agulki, ki zi siki muhunokai kai.

²⁹Ɗai n’e zi sda ahani Absalom ɗa, e zi sini Amnon maini n’Absalom ɗa a miɗiŋɗi nɵa. Alini pai n’e hini ta ɗa e fiki amai e ɵi eziɗi midini plasaiɗi zi atoŋo, e pri edi.

³⁰Hlai n’e ɗisi war futi hai ɗa, David a ɵina labar ɓa: Absalom a fiɗiɗi alini pai ɗa edi kafa, ktai ma a hina kai.

³¹Pai a faka amai, a ɓasa sapa na sini edi, a fana azumai arni alogodo. Ɗaini n’abakai lai e ɗiyi amai gaini eziɗi ca ca, sapa na siɗi gaini ɓisi edi ɓas ɓas lai.

³²Yonadab n’ahini Simeya na tawalni David a tika seŋ a muɗa: Epin-geza a hiina ɓa e fiɗiɗi alini kafa ɗi ɗa, a na ɵa kai, a mra ɗa a Amnon ktai. Pini miɗi na wiini Absalom ɗa, seŋ hanɗa aŋ warni haa sini mefeŋ na Amnon a fana gaiɗi Tamar na tawalni aŋ gdaŋ ɗa par.

³³Pai n’epin-geza a hiina kai ɓa alini pai ɗa e mri kafa ɗi ɗa a na ɵa kai, a mra ɗa a Amnon ktai.

³⁴Absalom a pra edi su. Ɗif zi giɗimi a ɵa arni, a tala vok n’abai a na halasi duɓani par amai par paɵaɗi huwuŋ, e ɗa niyisi azumai warɗi futi na Horonaiim ɗa ɗaw. A halasi a miɗini wiini pai: Mu tala ɗai e ɗa e hilisi amai par paɵaɗi huwuŋ warɗi futi na Horonaiim ɗa.

³⁵Yonadab a miɗini wiini pai: E hilisi na ɗa e ɗi alini pai ɗa, a za ɗa maini na mu muɗuŋku ɗa nɵa.

³⁶A ɵa mini ɗa edi kai hai, alini pai ɗa e cûsi. E kɵi edi aŋ tuwi, e ɗûûli lai. Pai gaiɗi ɗaini n’abakai e tûwi gara lai.

³⁷Absalom a pra edi a hala ahani Talmai n’ahini Ammihur pai na geshur. Mefeŋ n’a zaŋ edi warni ta ɗa, David a za groho na wiini Amnon n’ahini.

³⁸Absalom n’a pra edi ɗa a sumnasi a Geshur haa buza hu

³⁹David, hiinini n’a ɵiɓa edi burini Amnon ɗa a wayasi sini, hiyni na sini Absalom ɗa ɗe a ɵaɗa azumai lai.