Read Mousgoum 2 Samuwel 14 Bible Online

2 Samuwel 14 - Mousgoum bible

2 Samuwel 14

¹Yowab n’ahiɗi Seruya a sɗa ɓa hiinini na meefeŋ na wiini pai David a n’a bunda.

²A yikitisi muni ktai a Tekuwa par, muni na yili gara a miɗiɗi: Za suku maiɗi muni zi groho ɵa, wa sapa zi tuwi suku, ku girda emel suku kai, za suku maiɗi muni na te fana war grohoni ɗifɗi yaw ɵa.

³Asakal par ku hala sini pai, ku miɗini nɵa nɵa. Yowab a miɗiɗi seŋ n’aga te muɗaŋ ɗa ta ta.

⁴Muni na Tekuwa par te hala sini pai aŋ miɗini. Te goɓo azumai, te pa arɗi azumai te miɗini wiini pai: Jaamus, zina pa ta.

⁵Pai a zilbiti: A zuku ɗa a maɗa? Te wiyini seŋ: Jaamus, ta mu divi na war greŋ, mafa ɗa a mra su,

⁶mu nafu gaiɗi ali sulu, seŋ a niya arbaɗi edi war basga, e ɵiɓi marɗi, ɗif n’a ɓirwiɗi edi aŋ kai, na ktai tini a yima tawalni ɗa,

⁷nɵa piɗi humuni na wiini epini e fikisi amai sa e miɗi: Siyisi ni n’a fuɗa tawalni ɗa, kapai mi fiɗiŋ edi maini n’a fuɗa tawalni ɵa. Nɵa ɗif n’aga a mula bulum a hina kir kai. Gaini hanɗa e firiyi e fiɗi na ktai n’a hina ta ɗa, e vidi yikini mafa edi midini afti par, pinzibani a hina kir kaalai.

⁸Pai a miɗiɗi wiiɗi muni ɗa: Hala wiiku aha, aga mu muɗa gaiɗi.

⁹Muni na Tekuwa par te miɗini wiini pai: Jaamus, meefeŋ hanɗa hinaŋ a pɵa mada ta gaiɗi pinzibaŋa, a pɵa midini pai gaini pinzibani kai zaŋ.

¹⁰Pai a muɗa: Ɗif n’a muɗuku li gaini seŋ hanɗa, ku kaŋsi sa, dawai zamai aga a muɗuku seŋ hanɗa kir kai.

¹¹Muni te miɗini: Jaamus, haŋa wala muku gaini Epiɗ-ɗai Alaw na wiiku, kapai ni n’a fuɗa ahiya n’a fuɗa tawalni ɗa, a riya girŋa ɗa amai kai. A fuɗa ahiya n’a hina ɗa edi kaalai. Pai a muɗa: Gaini EPIƊ-ƊAI na karni zaŋ, ayir na midini ahiku ktai kaw aga te ɓa edi kai.

¹²Muni te miɗini pra: jamus, hinaŋa mu muɗa seŋ zamai ktai pra. Pai a miɗiɗi: Muɗa wiiku.

¹³Muni te miɗini: Tuku ku za siɗi ɗai na wiini Alaw maini hanɗa nɵa buri maɗa? Pini na ku muɗaŋ na ɗa, tuku ku sɗa ɓa ku za na ɗa a meefeŋ, won hlai na ku hinasi Absalom aŋ wayasi aha kai, ku fuɗa hiiniku edi midini par su lai ɗa.

¹⁴Burini mri ɗa, tumu paŋ aga mu murumu paŋ, kal kal maini emel n’a ma li azumai ɗa a ɵata amai kai ɗa nɵa. Amma hiini na wiini Alaw a na maini na wiiku nɵa kai, a firiya ɓa ni na ku burgaŋ edi wuzani arku par gaigai ɗa a hinasi edi woni gamai kai.

¹⁵Na ɓa mu halasi tiyana aŋ miɗini seŋ na mu muɗaŋ hanɗa wiini pai n’Epin-geza ɗa, a na buri ɓa ɗai ɗa e miliŋa hunai pa ca, nɵa ta ɓa mariya mu miɗini wiini pai haw, ablaŋtaŋkai pai a kiɗa a za wala na ta mu miɗiŋni ɗe ɗa.

¹⁶Aga a kûrɗiyi edi ta gaini ahiya paŋ tini ɗif n’a firiya a vidiyi edi arbaɗi ɗai na wiini Alaw par ɗa.

¹⁷Buri mu hiina ɓa, seŋ na pai aga a muɗaŋ ɗa, aga a waya hangalɗi ɗai azumai, buri pai n’Epin-geza a na maini ɵeŋ na wiini Alaw nɵa, a zuɓura na pɗem gaini na meefeŋ paŋ, Epiɗ-ɗai Alaw na wiiku a za gaiku.

¹⁸Pai a wiyiɗi seŋ wiiɗi muni ɗa: Mu dara mu zulbuku midini wala ktai, ku wayaŋa seŋ midini war jre. Muni te miɗini: Pai n’Epin-geza a zilbaŋasi wiini.

¹⁹Pai a zilbiti: Seŋ hanɗa, Yowab mini aŋ warni kai ɗe? Muni te wiyini seŋ: Gaiku tuku zaŋ, pai n’Epin-geza, ɗif a kiɗa a duuluku kai, a saŋa yel hanɗa mada ɗa a Yowab na ɵeŋku, na mu muɗaŋ paŋ na ɗa a halasi sini ni par.

²⁰Yowab na ɵeŋku a za hanɗa ɓa kapai n’a na hala kai ɗa a bunda, amma tuku pai n’Epin-geza, tuku yel gara, yel na wiiku maini ɵeŋ na wiini Alaw nɵa, ku sɗa n’a na za midini afti paŋ.

²¹Nɵa pai a miɗini wiini Yowab: Za maini na ku hiinaŋ ɵa, seŋ ɗa a vada li, hala kasi Absalom ɗa aha.

²²Yowab a goɓo azumai wuzani pai, a hurga azumai a zini tese wiini pai, a muɗa: Girna, ta ɵeŋku mu sɗa ɓa, mu nava yum li wuzani arku, tuku pai n’Epin-geza, buri ɓa tuku pai ku za sda gaini seŋ na mu miɗiŋni.

²³Yowab a faka a hala a Gesur, a kasi Absalom a Yeruzalem.

²⁴Pai a muɗa: A hala ahani sek, a halasi wuzani ara kai. Nɵa Absalom a hala ahani, a kiɗa a ɗiya wuzani pai kai.

²⁵Arbaɗi ɗai na Izrayel ɗa paŋ, ɗif n’a wa juf maini Absalom ɵa aŋ kai, azumai war bubur n’ezini par haa amai humokni ta, tirki nɵa sini kai.

²⁶Sini vidini buza paŋ ɗa a faɗa ayir na midini edi buri ɓa a suwa gma gara, e tikiŋ li midini kilo ɗa a suwa kilo sulu.

²⁷A wa ali na maɵagai hu, na muni ktai, na muni yikiɗi ɓa Tamar te wa juvi gara lai.

²⁸Absalom a sumna war Yeruzalem buza sulu, amma a kiɗa a hala wuzani pai kai.

²⁹Mefeŋ ktai Absalom a ɵina pini Yowab buri a firiya a ɵinaŋ sini pai, amma Yowab a dara a halasi aha sini kai. A ɵina pini azi n’ag'aŋ sulu pra, a dara a halasi kai.

³⁰Absalom a miɗiɗi wiiɗi ɗaini zi sda: Vuwaini Yowab zi orge n’a na ɵimani vuwaiŋa su ɗa, hili ki tiki afu pini ta. Ɗaini zi sda e tiki afu pini lai.

³¹Nɵa Yowab a hala sini Absalom aha ahani a zilbaŋ a muɗa: Ɗaiku zi sda ɗa, e tiki afu pini vuwaiŋa ɗa buri maɗa?

³²Absalom a wiyini seŋ: Buri ɓa mu ɵinaɗi puku ɓa ku halasi mu ɵunuku sini pai, ku zilbaŋ haw, mu halasi a Gesur par tiɓ buri maɗa, amma ku ɗiya kai. Mu nasi fu wiya na woni dam maa a suwa gaini barka. Tiyana ɗa mu firiya mu hala wuzani pai, na ɓa meefeŋŋa a na ɗa a fuɗaŋa wiini edi.

³³Yowab a ka miɗi na wiini Absalom wiini pai. Asakal par pai a ɵina pini Absalom a yikaŋsi, Absalom a halasi sini, a hurga azumai wuzani, a pa arni azumai midini afti. Pai a kɵa amai wulani a firiyaŋ.