Read Mousgoum 2 Samuwel 15 Bible Online

2 Samuwel 15 - Mousgoum bible

2 Samuwel 15

¹Asakal hanɗa par Absalom a paya saret ta, a paya plasai gaiɗi ɗai zi gɗam n’e rivi wuzani saretni yaw doogo doogo ɵim lai.

²Gorof par paŋ, Absalom a ɵa sini a hala a ɗiya ɵimani futi na te halasi aha war fuŋ n’abai sek ɗa, ɗif n’a cosi li, n’a firiya a hala aha sini pai buri a zitini sariya ɗa, a yikaŋ ta a zilbaŋ: tuku ku na war fuŋ n’abai na wata par ɗa? A wiyini seŋ: Yerima, mu na war pinziba na Izrayel na hanɗa par.

³Won hlai n’a wiyini seŋ li ɗa, Absalom a miɗini: Tala seŋku ɗa a futini, jreku a na lai, amma, ɗif na ahani pai n’aga a zuɓuraŋ muku aŋ kai koo.

⁴Absalom a muɗa zamai ɓa: Mu nafu aŋ ɗif zi ɗûkliti sariya midini afti hanɗa, nagai paŋ na sariyaɗi zi zi a na ɗa, aga e hilisi gaiɗi wuza paŋ, aga mu zitiɗi sariyaɗi war jre lai.

⁵Won hlai na ɗif a halasi li aŋ hurga azumai wuzani ɗa, a wûni tini, a ɗalaŋ ɗal, a kɵa amai wulani a firiyaŋ.

⁶Absalom a za maini hanɗa nɵa gaiɗi ɗai na Izrayel n’e hilisi ahani pai buri e ziɗi sariya ɗa paŋ. Absalom a bunda hiiniɗi ɗai na Izrayel sini sek gaini sda zi rhai hanɗa.

⁷Buza doogo doogo puɗu asakal hanɗa par, Absalom a miɗini wiini pai: Saŋa futi mu hala a Hebron aŋ va ɵinini-ha na mu ziŋni wiini EPIƊ-ƊAI ɗa amai.

⁸Won hlai na mu nasi ka a Gesur war Siriya ɗa, mu za ɵinini-ha wiini EPIƊ-ƊAI ɓa: Na ɓa a wayaŋa li aha war Yeruzalem ɗa, aga mu zini ɓaka a Hebron.

⁹Pai a miɗini: Ku hala jam, a faka a hala a Hebron.

¹⁰Absalom a ɵina ɗai edi arbaɗi pinziba na Izrayel ɗa paŋ a miɗiɗi: Won hlai na ki ɵini tuwini fana li ɗa, ki si labar edi ɓa: Absalom a suma pai li a Hebron.

¹¹Absalom a yika ɗai gaini a Yeruzalem par miya sulu, nagai e hili pini war siɗi kai, e siɗi wala n’a firiya a zaŋ ɗa kai.

¹²Won hlai n’Absalom a n’a za ɓaka ɗa, a ɵina pini Ahitofel na Gilo par, ɗif n’a sini gadai wiini David ɗa war fuŋ n’abai na Gilo, rigini-mi na wiiɗi a za abai ta, ɗai na pini Absalom ɗa ɗe e zi viya ta lai.

¹³Ɗif ktai a halasi a miɗini wiini David ɓa: Hiiniɗi ɗai na Izrayel ɗa a bunda pini Absalom sek pla.

¹⁴Nɵa David a miɗiɗi wiiɗi ɗaini n’abakai n’e ɗa gaini a Yeruzalem: Kumu sumu, ɵa kai ɗa Absalom aga a fuɗumu, ki pirmi witaw, kai ɗa aga a nuvumusi, aga a zumu gir, a vidiɗi ɗai na war fuŋ n’abai hanɗa edi lai.

¹⁵Ɗai n’abakai na wiini pai e miɗini: Na pai n’Epin-gezaki a muɗaŋ paŋ ɗa, tiyi mi ɗa gaini.

¹⁶Pai a niyasi edi gaiɗi pakataini paŋ gaini eziɗi, amma a hiniɗika falakaini n’edi par ca ca doogo aha buri e giɗimi dalamni pai ɗa.

¹⁷Won hlai na pai a niyasi edi gaini ezini, ɗaini e tipi pini, e hili e ɗiyi ɵimani dilimi na maiɗi duɓaɗi par kir kai ɗa ca.

¹⁸Ɗaini n’abakai paŋ e vigisi wuzani arni, keretekai gaiɗi Peletekai paŋ, askarai na Gat par miya ɵaara lai, e vigisi wuzani arni pai lai.

¹⁹Pai a miɗini wiini Ittai abaiɗi askarai na Gat par maini nɵa: Tuku ku halasi gaiyi buri maɗa? Waya ku hina gaini pai na hehe ɗa, buri ɓa tuku maa ku morkoi, e burgukusi edi midini aftiku par gaini birgi pra.

²⁰Tuku maa ku cosi na eɗibi eɗibi na hai, girna tar mu tupukusi gaiyi tap ɗa, ta maa mu sɗa hlai na mu hala woni sek na ɗa kai. A za kai waya aha a Yeruzalem gaiɗi ɗaiku ɗa, EPIƊ-ƊAI a za pɗem suku, a za yumni suku lai.

²¹Ittai a wiyini seŋ wiini pai a miɗini: Gaini EPIƊ-ƊAI na karni zaŋ, gaini pai n’Epin-geza zaŋ lai, woɗi paŋ n’aga ku hala, koo ɓa aŋ warni hlai ni a mri tekeɗeɗi ta aga mu hala woni lai.

²²David a miɗini Ittai: Pɗem, vugasi. Ittai na Gat par a vuga gaiɗi askaraini gaini dalamɗi paŋ.

²³Ɗai na Yeruzalem paŋ e tûwi abai gara, ɗai paŋ e vigi, pai lai a vuga war huduk na Sedron, ɗai paŋ e vigi warɗi futi na te ka edi war basga kaɗataŋ sek ɗa.

²⁴Pai zi ɓaka Sadok a nafu gaiɗi lai, gaiɗi levitekai zi libi Zunduk zi bonu n’Alaw, e tiki Zunduk na wiini Alaw azumai, Abiyatar a niya amai aŋ za ɓaka haa ɗai n’e niyisi edi warni fuŋ n’abai ɗa par e dibisi paŋ.

²⁵Pai a miɗini wiini Sadok: waya Zunduk na wiini Alaw aha war fuŋ n’abai ɗa, na ɓa EPIƊ-ƊAI aŋ gaya ɗa aga a wayaŋasi aga mu talaŋ gaini ara pra, mu tala hlai n’e tikiŋ warni lai.

²⁶Amma na ɓa a muɗa li ɓa, a firiya kir kai ɗi ɗe, a za sa wiini maini n’a dara nɵa lai.

²⁷Pai a miɗini wiini pai zi ɓaka Sadok: Zuɓura seŋ na mu na muɗuŋku ɗa, tuku ɗa ku waya aha war fuŋ n’abai ɗa wai, Ahimas n’ahiku gaini Abiyatar gaini Yonatan n’ahini lai, aliki na sulu hanɗa e wiyi gaiki.

²⁸Tili, ta aga mu baiya edi war basga dam, ɵimani hlai na ɗai e vigi woni ɗa haa mu nava labar aha par siɗi haw.

²⁹Sadok gaini Abiyatar e wiyisi Zunuk na wiini Alaw aha warɗi Yeruzalem, e simni woni lai.

³⁰David a tikiti futi na te hala amai siɗi huwuŋ zi luwuŋ Olive war tuwi, sapa midini bar, ezini azumai kadai ca. Nagai na gaini paŋ e biri sapa midiɗi bar bar, e hi amai sek war tuwi lai.

³¹E hilisi e miɗini wiini David: Ahitofel ɗa aŋ gaini Absalom, arbaɗi nagai n’e rgi miɗi aŋ zuku meefeŋ ɗa. David a muɗa: EPIƊ-ƊAI mu siiwuku, hina gadai na wiini Ahitofel a bunda aŋ seŋ zi dûûli pla kai ɗi!

³²Won hlai na David a co amai merfeŋɗi huwuŋ ɗa, Won hlai na ɗai e hûrgi azumai wuzani Alaw warni, a tala Husai na Arkit par a na halasi arni sek, sapa na sini gaini ɓisi edi ɓas ɓas, alogodo gaini kûmidini koko lai.

³³David a miɗini: na ɓa ku hala li gaya ɗa, ku kaŋasi mada na ɗa a guma meere.

³⁴Amma na ɓa ku waya li aha war fuŋ n’abai, ku miɗini li wiini Absalom ɓa: Jaamus, mu firiya mu bunda aŋ ɵeŋku, avut par mu nafu aŋ ɵeŋni apuku, amma tiyana mu ɵeŋ na wiiku. Nɵa aga ku kiɗa ku zina pa, ku pa seŋ arni Ahitofel lai, hlai n’a na sa gadai na meefeŋ mada ɗa.

³⁵Pra paakai zi ɓaka Sadok gaini Abiyatar e ɗa gaiku woni, seŋ na ku ɵinaŋ li ahani pai par ɗa ku miɗiŋɗi.

³⁶Aliɗi na sulu: Ahimas n’ahini Sadok gaini Yonatan n’ahini Abiyatar e ɗa gaiɗi, na ki ɵiniŋ paŋ ɗa ki ɵiniɗisi sa gaini.

³⁷Husai na marmaini David a waya aha war fuŋ n’abai war sarti na Absalom a niyasi aha war Yeruzalem ɗa.