Read Mousgoum 2 Samuwel 16 Bible Online

2 Samuwel 16 - Mousgoum bible

2 Samuwel 16

¹David a hala wuzani sek agwi ɗa, a nava Siba ɗif zi sda na wiini Mefiboset a na halasi arni sek, ablehökai wuzani sulu gaini gini gaŋ gaŋ peŋ duɓani miya sulu, alini luwuŋ zi vin na hûleŋ miya ɗaw, alini luwuŋ Fige miya ɗaw gaiɗi argini zi vin ɗaw lai.

²Pai a zilba Siba: Ku firiya ku za gaini wazagai hanɗa a maɗa? Siba a wiyini seŋ: Ablehökai ɗa a zina piɗi pakataiku war hiliɗi, peŋ gaini alini luwuŋ Fige ɗa a simi na wiiɗi askarai na puku, vin ɗa ɗe a wala zi ci na wiiɗi nagai na gdaŋɗi aga a vada edi war basga ɗa lai.

³Pai a zilbaŋ: Ahini Epin-gezaku ɗa aŋ wata ɗa? Siba a wiyini seŋ: A hinasi amai a Yeruzalem; buri a hiina warni ɓa: Girna ɗa, pinzibaɗi Izrayel aga e wiyitini pai na wiini epini ɗa.

⁴Pai a miɗini wiini Siba: tiyana par ɗa wazagaini Mefiboset paŋ ɗa a wiiku. Siba a hurga azumai a miɗini: pai n’Epin-geza, mu zuku tese burini pɗem na ku na zaŋ sa hanɗa.

⁵Won hlai na David a co a Bahurim a nava ɗif ktai a na niyasi aha par war fuŋ hanɗa a ɗif na war piɗi humunini Sawul, yikini ɓa Simey, a ahini Gera. Won hlai n’a na niyasi anene sek ɗa a muɗa: A muɗa seŋ na maafanai viya.

⁶A bla David gaiɗi ɗai n’abakai na pini gaini kriyit, paŋ ktai David a nafu amlai arbaɗi ɗai gaiɗi askarai na wiini, na zamai war hanɗa par, zamai war gal hanɗa par lai.

⁷Simey a miɗini maini nɵa: Faka edi sek! Faka edi sek! Ɗif zi fiɗi ɗai hanɗa! Ɗif na nafaku kai hanɗa!

⁸EPIƊ-ƊAI a na zilba felɗi ɗai na ku fiɗiɗi war pinzibani Sawul na ku tikiti pai tini par ɗa. EPIƊ-ƊAI a sitini pai hanɗa wiini Absalom n’ahiku ta, tiyana tuku ku hina li war gir, buri ku ɗif zi mi fel.

⁹Abisai n’ahiɗi Seruya a miɗini wiini pai: Ɗif na nafani aŋ kai hanɗa, a miɗini seŋ na meefeŋ wiini pai n’epin-geza ɵa buri maɗa? Za barka ɵaaɗi sini su, mu ɗuklasi midini edi daf.

¹⁰Pai a waya seŋ: Abisai gaini Yowab na tawalku ɗa, aliɗi Seruya: Jaaki ma! Na ɓa a na muɗa seŋ na meefeŋ sa, na ɓa a sini futi ɗa a EPIƊ-ƊAI buri a za hanɗa sa ɗa, n’aga a miɗini ɓa a za hanɗa nɵa buri maɗi ɗa asiya ɗa?

¹¹David a miɗini wiini Abisai gaiɗi ɗai n’abakai na pini paŋ ɓa: Na ɓa ahi na wara par mal a firiya a fuɗaŋa edi ɗa, pinzibani Benyamin, aga a za nɵa azi gama ɗa, na ɓa a miɗini a EPIƊ-ƊAI ɓa a za maini hanɗa nɵa ɗa,

¹²Ablaŋtaŋkai n’EPIƊ-ƊAI aga a tala girna, a bunda seŋ zi miɗi na maafanai n’a muɗaŋ sa girna ɗa aŋ pɗem ɗi ɗa.

¹³Won hlai na David gaiɗi ɗai na pini e ɗa hili wuzaɗi sek ɗa, Simey a ɵaɗi paɵaɗi huwuŋ ɵimani blaŋ, a hala lai, a muɗa seŋ na maafanai siɗi lai, a biliɗi gaini kriyit, a poko alogodo amai lai.

¹⁴Pai gaiɗi ɗai na pini e sû agoɗom wulani ra Yurdan gdaŋ warɗi kai, e simni woni ca haa siɗi amla.

¹⁵Absalom gaiɗi ɗai na pini paŋ e niyisi aha war Yeruzalem, Ahitofel a nafu gaiɗi lai.

¹⁶Won hlai na Husai na Arkite par, na marmaini David a co sini Absalom ɗa, a ɗuula a muɗa: Jaamus, wala a zuku kai, jamus, wala a zuku kai.

¹⁷Absalom a miɗini wiini Husai: Hanɗa a jreku na ku zaŋ sini David na marmaiku kiɗi ɗi? Ku hala pini marmaiku kai maɵa ɗa?

¹⁸Husai a miɗini wiini Absalom: Zaw kai, mu hina ɗa gaini ni n’EPIƊ-ƊAI gaiɗi na e ɗi na paŋ, ɗai na Izrayel paŋ e viriŋ ɗa, mu wiini pai ni ɗa, mu hina gaini.

¹⁹Ag'aŋ suluni pra, mu za fu sɗa ɗa gaini asiya ɗa, gaini ahini kai ɗi? Mu za ka sda gaini apuku haa girna, amma tiyana ɗa mu dara mu za sda gaiku tuku.

²⁰Absalom a miɗini wiini Ahitofel: Kiti miki arbaki midini wala n’aga mu zuŋmu ɗa.

²¹Ahitofel a miɗini wiini Absalom: Hala ku yimiɗi falakaini apuku n’a hiniɗika aha buri e giɗimi dalam ɗa, ku fana gaiɗi. Nɵa ɗai na Izrayel ɗa paŋ aga e siɗi ɓa ku za suku hi-hir arni apuku ta, ɗai n’e ɗi puku par aga e nivi gdaŋ lai.

²²E zitini dugoi wiini Absalom amai midini dalam ɗa tiɓ, Absalom a fana gaiɗi falakaini epini ɗa karɗi ɗai na Izrayel ɗa paŋ.

²³War mefeŋ ni ɗa, gadai na Ahitofel a saŋ li paŋ ɗa, a tala arɗi ɗai maini na ɓa a muɗaŋ ɗa a Alaw ɵa. David gaini Absalom e yimi gadaini n’a saŋ ɗa paŋ ɵa lai.