Read Mousgoum 2 Samuwel 17 Bible Online

2 Samuwel 17 - Mousgoum bible

2 Samuwel 17

¹Ahitofel a miɗini wiini Absalom: Aga mu vara ɗai pa dubu doogo pi sulu, duvukna aga mu tika futi pini David aga mu tika futi pini David.

²Aga mu luɓa midini Won hlai n’a na gaini kiyi su hangalni gaini ɵiɓi ei tiɓ, aga mu milini hunai pini, ɗai na pini aga e pri edi lai, a hina li kiini ɗa aga mu fuɗaŋsi.

³Nɵa, aga mu wiyiɗisi ɗai paŋ suku. Kapai ɗai paŋ e wiyisi suku ɗa sai ku fuɗa ɗif na ku na payaŋ na ɗa edi, nɵa aga e simni ɵeɗ lai.

⁴Seŋ hanɗa a yima hiini Absalom gaiɗi na bakai n’arbaɗi ɗai na war Izrayel ɗa paŋ lai.

⁵Amma Absalom a muɗa: Ku yikasi Husai na Arkit par ta kapai mu ɵunumu na mini ɗa lai.

⁶Husai a cosi sini Absalom, Absalom a miɗini: Ahitofel a muɗa an na, an na. Mu zumu maini n’a muɗaŋ ɗa ɵa ɗi, tuku sa hiiniku lai haw ɗa.

⁷Husai a wiyini seŋ wiini Absalom: Yel na Ahitofel a saŋ girna na ɗa, ta a tala ara pɗem kai.

⁸Husai a muɗa pra apuku gaiɗi askarai na pini e ɗi ɗai zi hatam na agulɗi a huna kai. E ɗi tiyana masuwarai maini wala na edi buza na e yikiŋ ɓa Urs n’e mili alini yaw nɵa. Apuku a ɗif n’a sɗa hatam, aga a fana arbaɗi ɗai ɗa kai.

⁹A na ta ɗa, aŋ warni waŋ ktai, ɵa kai ɗe aŋ gaini ŋûyi war hlai ktai cok. Na ɓa ɗai e tiki piɗi li aŋ mri arbaɗi ɗaimu ɗa, labar aga a wa edi ɓa ɗai na pini Absalom ɗa gdaŋ te sûwiɗi su.

¹⁰Nɵa koo ɗif na agulni a huna kai maini gurnai ɵa kaw ɗa, gdaŋni aga a vada edi, buri ɓa ɗai na Izrayel paŋ apuku a ɗif zi hatam n’abai, askarai na kurfakai e ɗi pini lai.

¹¹Hiini na wiya a na maini nɵa: Tipiɗi ɗai na Izrayel ɗa suku, a Dan war gal na azumai par, haa a Beer-Seba war gal n’amai sek, aga e zi viya maini kaikai na agoɗom nɵa, asakal par tuku lai ku niya edi gaiɗi war hatam.

¹²Koo ɓa a ŋoya wata ɗi aga mu nuvuŋmu. Aga mu wumu tumu midiɗi maini maɗai n’a wa midini afti ɗa nɵa, ni gaiɗi ɗai na pini paŋ aga mu hunumu ɗif ktai maa piɗi kai.

¹³Na ɓa a ŋoya ɗa aha war fuŋ n’abai maa, ɗai paŋ e kisi sogom yaw yaw mu punmu sini fuŋ n’abai hanɗa mu supunmu agoɗam, ahi-fuŋ ktai maa a hina war hlaini kai.

¹⁴Absalom gaiɗi ɗai na Izrayel ɗa paŋ e miɗi: Hiini na wiini Husai na Arkit par ɗa pɗem a suwa na wiini Ahitofel ɗa. EPIƊ-ƊAI a firiya a tuura hiini na wiini Ahitofel na gaini futini ɗa edi kapai a zini meefeŋ wiini Absalom.

¹⁵Husai a miɗiɗi wiiɗi paakai zi ɓaka Sadok gaini Abiyatar: Ahitofel a sa hiini wiini Absalom gaiɗi n’abakai n’arbaɗi ɗai na Izrayel nɵa nɵa, amma ta mu miɗiɗi nɵa nɵa lai.

¹⁶Tiyana ɗa, ɵini pini David witaw. Ki miɗini ɓa duvukna ɗa a yima ezini edi war hlai na ɗai e vigi woni n’edi war basga na kaɗataŋ ɗa kai, a sirɓa wuzani sek, ɵa kai ɗa gaiɗi ɗai na pini paŋ aga e nivi fiɗi n’edi.

¹⁷Yonatan gaini Ahimas e hinisi a Ein-Rogel ca, e tikiti ahiyagwi zi sda ktai ta, te kiɗisi labar n’aha war fuŋ n’abai ɗa par kapai nagai e kiŋni wiini pai David, e kiɗi e niyi aha war fuŋ n’abai ɗa kai kapai ɗif a sɗa siɗi kai.

¹⁸Paŋ ktai, gawla ktai a siɗiɗi ɓa, a hala a miɗini wiini Absalom ta. Nagai e hili witaw, e niyi ahani ɗif ktai a Bahurim, e niviti kiliŋi a pakataini tiɓ, e niyi azumai warɗi,

¹⁹muni te mulasi gna yaw, te baraŋ amai miɗi kiliŋi bar, te ko algama warni koko, a sɗa edi kir kai.

²⁰Ɗai na wiini Absalom e cûsi ahaɗi muni ɗa e zilbiti: Ahimas gaini Yonatan e ɗi wata ɗa? Muni te wiyiɗi seŋ: E vigi ra ɗa amai vig. E piyiɗi haa e niviɗi kai, e wiyisi aha a Yeruzalem

²¹Asakal n’e hili li, Ahimas gaini Absalom e niyisi amai warɗi kiliŋi par, e hili e sini labar wiini pai David e miɗini: Vigi ra Yurdan ɗa witaw, buri Ahitofel aŋsi aŋ muɗa gaiki nɵa nɵa.

²²David a faka gaiɗi ɗai na pini paŋ, e vigi ra Yurdan ɗa haa gorof ta ɗa e vigi kafa.

²³Won hlai na Ahitofel a tala ɓa ɗai e yimi hiini na wiini kai ɗa, a ziziniti ablehöni, a waya aha war fuŋni n’abai. A muɗa na mini wiiɗi ɗai na ahani ta ta, asakal par a rga sini amai a mra. Asakal par e piŋ war waŋ na wiini epini.

²⁴Won hlai David a co a Maha naiim, Absalom gaiɗi ɗai na Izrayel na pini ɗa e vigi Yurdan ɗa amai vig.

²⁵Absalom a tika Amasa aŋ abaiɗi asakarai war balamni Yowab. Kapai Amasa ni ɗa a ahini ɗif na Izrayel ktai na yikini ɓa Yeter n’a waŋ gaiɗi Abigal n’ahini Nahas na tawalɗi Seruya na emini Yowab.

²⁶Absalom gaiɗi ɗai na Izrayel e pi kaŋɗi midini afti na Galaad.

²⁷Won hlai n’a co a Maha naiim tar, Sobi n’ahini Nahas na Rabba fuŋ n’abai na wiiɗi Ammonitekai par gaini Makir n’ahini Ammiyel na Lodebar par gaini Barzzillai na war fuŋ n’abai na Rogelim na war Galaad par lai,

²⁸e kisi lit, tasakai, koloŋai z'afti, algama, Orge, avudi, seyem zi sisili, a nai sawal gaini a nai gaini seyem zi sisili,

²⁹gaini emelni ami, gaini fiyawni na wiini adumai gaini ɵaakai, emelni ɵaakai lai, e kiŋnisi wazagai hanɗa paŋ wiini David gaiɗi ɗai na pini ɗa kapai e simi. Buri e hiini ɓa: Ɗai hanɗa e siɗi gir viya tini wiyamai, tini kayai, gaini sai edi war basga na kaɗataŋ.