Read Mousgoum 2 Samuwel 18 Bible Online

2 Samuwel 18 - Mousgoum bible

2 Samuwel 18

¹David a tala vokɗi askarai na pini blaŋ blaŋ, a miliɗi abakaiɗi askarai na ɗai piɗi dubu dubu gaiɗi na ɗai piɗi miya miya lai midiɗi ca ca.

²David a burwa arɗi askarai azumai hu: gal na ktai aŋ pini Yowab, na ktai aŋ pini Abisai n’ahiɗi Seruya na tawalni Yowab ɗa, n’ag'aŋ hu ɗa aŋ pini Ittai na Gat ɗa lai. Asakal par, David a miɗiɗi wiiɗi askarai na wiini: Ta aga mu niyaɗi edi gaiki lai.

³Amma askaraini e miɗini: Ku halaɗi gaiyi kai, buri ɓa, na ɓa mi pri edi kaw ɗa jaaɗi piyi kai, koo ɓa e fiɗiɗi galyi edi tekeɗeɗi ɗa, jaaɗi kai sam. Amma tuku ɗa, ku kata gaiɗi askarai dubu ɗaw. A pɗem ɓa tuku zinaɗi piyi aha war fuŋ n’abai ɗa par.

⁴Pai a wiyiɗi seŋ: Aga mu za maini na ki firiyiŋ nɵa. Pai a ɗiya ɵimani magala zaw, vokɗi askarai na miya miya gaini na dubu dubu a niyasi edi.

⁵Pai a sa miɗi wiini Yowab, wiini Abisai gaini Ittai lai maini nɵa: Mu siiwiki ki hiini buriya, ki zini meefeŋ wiini Absalom n’ahini kai, askarai paŋ e ɵini miɗi na pai a miɗiŋɗi wiiɗi abakaiɗi askarai burini Absalom ɗa.

⁶Askarai na wiini David e hili aŋ hitimi gaiɗi askarai na wiini Absalom. Hatam hanɗa a za arbani jur na wiini Efrayim.

⁷Vokɗi askarai na wiini David a rɗa amai midiɗi askarai na wiini Absalom. Mefeŋ ni ɗa, ɗai e mri viya e zi dubu caaɓa.

⁸Hatam a wa tini edi midini afti paŋ. Mefeŋ ni ɗa ɗai n’e mri arni jur ɗa viya, e sûwiɗi nagai n’e mri mini hatam ɗa.

⁹Hlai ktai, Absalom gaiɗi askarai na wiini David e nivi miɗi marɗi. Absalom a nafu midini plis z'atoŋo. Plis a niya gaini amlai pini luwuŋ ktai n’abai na tini gaini wi arni marni ɗik ɗik, ayir na midini a blasi sini tini luwuŋ ɗa, plis z'atoŋo na pini a lawa wiini ɗaw. Absalom a hina amai arbani hlai gaini higi lew.

¹⁰Askar na wiini David ktai a sɗaŋ ɓa, a hala a midini wiini Yowab: Mu talasi Absalom gaini higi amai tini luwuŋ n’abai ktai lew.

¹¹Yowab a miɗini wiini askar n’a na sini labar hanɗa: Ku sɗasi ɗa a ni mal! Ku fuɗaŋsi woni hlai ni kai buri maɗa? Ku zaŋ fu nɵa aga mu suku sulai z'arzaŋ doogo, santir yaw lai.

¹²Amma askar ɗa a wiyini seŋ wiini Yowab a muɗa: Koo ɓa ku saŋa fu sulai z'arzaŋ dubu ɗaw kaw aga mu tika ta amai sini ahini pai ɗa kai. Buri pai a muɗukusi wiiku gaini Abisai gaini Ittai lai wuzani aryi ɓa: Ki hini ɗif a zini meefeŋ wiini Absalom n’ahiya ɗa kai.

¹³Na ɓa mu wula fu na wili, mu fuɗaŋsi a fiɗi su gaini hiini na ɓa mu ɵina kai ɗa, pai aga a sɗa ɓa mu za na ɗa a eles, buuri ni a sɗa wala paŋ, tuku ɗe ku zina fu pa kaalai.

¹⁴Yowab a wiyini seŋ: Ku baŋa hlaiŋa edi meere kai, a mula kawakai hu, a hala a ɓula Absalom gaini sini agulni hlai n’a na amai gaini higi lew, amma karni hai.

¹⁵Asakal par asakarai n’e libi wazagai zi hatam na wiini Yowab e hiri Absalom amlai har e fiɗiŋ edi.

¹⁶Asakal hanɗa, Yowab a yiba fana, kapai hatam a ɗiya. Asakarai na wiini David e tiki futi piɗi askarai na wiini Absalom ɗa kir kai.

¹⁷E tiki kopoŋni Absalom ɗa, e biliŋ warni waŋ ktai n’abai amlai arni jur, e firi kiryit amai midini abai. Askarai na wiini Absalom ɗa e pri edi, ɗif paŋ a lawa ahani sek sek.

¹⁸Won hlai n’a naka karni hai, Absalom a ɗiya ahi-fuŋ ktai amai zaw agoɗom war huduk na wiini pai, buri a hiina warni ɓa: Ahini na dawai sek e yikiŋ gaini a kai, nɵa a sa yikini wiini ahi-fuŋ n’a ɗiyaŋ amai ɗa. Haa girna, wala ni ɗa, e yikiŋ ɗa ɓa wala zi rgi na wiini Absalom.

¹⁹Ahimas n’ahini Sadok a miɗini wiini Yowab: Saŋa futi mu lawa, mu kiini labar na pɗem hanɗa wiini pai ta. Buri EPIƊ-ƊAI a zitini sariya na jre ya, a plaŋ edi war tiɗi gawni par ya lai.

²⁰Yowab a miɗini: A za kai, na ɓa ku ka labar girna ɗa, aga a tala pɗem kai. Yuvai zamai aga ku ka labar hanɗa wiiku, buri ɓa a mra na ɗa ahini pai.

²¹Yowab a miɗini wiini begeni na Etiyopiya par maini nɵa: Tuku ɗa, hala ku miɗini wiini pai gaini wala na ku talaŋ na ɗa. Begeni a hurga azumai wuzani, a faka a hala sini pai.

²²Ahimas n’ahini Sadok a miɗini Yowab pra: Koo ɓa a za ɗa a nawa ɗi kal. Za barka hinaŋa mu lawa pini ɗif na Etiyopiya ɗa. Yowab a miɗini: Luwi na ku lawa tiɓ ɗa a zi maɗa, marmayaŋ Labar hanɗa a labar na pɗem na ku kiɗa ku nava vrak pini kai koo!

²³Ahimas a wiyini seŋ: A za wala kai, mu lawa luwi bas. Yowab a miɗini ɓa: Lawa wiiku. Ahimas a faka gaini luwi a niya warɗi futi na war hlai na plas na war huduk na Yurdan, a co wuzani ɗif na Etiyopiya ɗa.

²⁴David a nafu gaini simni arbani mini magala na anene par gaini mini magala n’aha dam. Ɗif n’a giɗima hlai a niya amai midini dalam na plas na mini magala, amai midini ɵaga. A yima arni amai, a tala ɗif ktai a na lawasi kiini blaŋ.

²⁵Ɗif zi giɗimi mini hlai a ɗuula, kapai a zini zaida wiini pai. Pai a miɗini na ɓa a na kiini ktai ɗa a kasi na ɗa a labar na pɗem. Won hlai n’a ŋasi gobi,

²⁶ɗif zi giɗimi hlai a tala ɗif zamai a na lawasi pra, a miɗini wiini ɗif zi giɗimi mini magala: Ɗif zamai a na lawasi kiini blaŋ pra. Pai a muɗa: Ɗif hanɗa aŋ mini ɗa a labar na pɗem pra.

²⁷Ɗif zi giɗimi hlai a muɗa: Sini luwiini n’a lawa ɗa, mu hiina ɓa ɗif n’avut ɗa a Ahimas n’ahini Sadok. Pai a muɗa: A ɗif na pɗem gara, a kasi tuku na ɗa a labar na pɗem.

²⁸Won hlai na Ahimas a cosi wuzani pai ɗa, a ɗuula a miɗini: Wala na meefeŋ aŋ kai, a hurga azumai wuzani pai, a pa arni azumai a muɗa: kol sini EPIƊ-ƊAI, Alaw na wiiku n’a siɗi ɗai n’e fiki amai suku tuku, pai n’epin-geza war tuku.

²⁹Pai a zilbaŋ: Absalom n’ahiya ɗa a na pɗem hek ɗi? Ahimas a wiyini seŋ: Won hlai na Yowab a ɵiniyisi ta gaini ɵeŋku hanɗa na sek ɗa, mu tiliɗi ɗai e ɗa rivi arɗi marɗi pit pit, amma mu sɗa wala n’a za ɗa kai.

³⁰Pai a muɗa: Yima suku edi, ɗiya ɗi edi na. Ahimas a yima sini edi a ɗiya war hlai n’a siŋkiŋni lai.

³¹Won hlai ni tizaw, ɗif na Etiyopiya par a cosi a muɗa: Jaamus, ɵina labar na pɗem hanɗa: EPIƊ-ƊAI a zutuku sariya na jre li girna, a puluku li edi war tiɗi gawku paŋ par.

³²Pai a zilbaŋ a muɗa: Absalom ɗa a na jam hek ɗi? Ɗif na Etiyopiya par a waya seŋ a muɗa: A juva ɓa nagai n’e fiki amai sini pai n’epin-geza gaiɗi gawni paŋ ɗa a za siɗi maini n’a za sini gawla hanɗa nɵa.