Read Mousgoum 2 Samuwel 19 Bible Online

2 Samuwel 19 - Mousgoum bible

2 Samuwel 19

¹Pai ɗa sirdaini a yimaŋ ɵuw ɵuw ɵuw. A niya amai midiɗi poriyo na te na amai midini mini magala ɗa aŋ tuwa. A niya amai sek ɗa a ɵa hama sini maini nɵa: Absalom n’ahiya ɗa! ahiya ɗa, Absalom n’ahiya ɗa, ta mu mra wiya azuku kai ɗa maɵa ɗa, Absalom n’ahiya ɗa, ahiya ɗa!

²E hili e miɗini wiini Yowab ɓa David a na tuwa, a na za groho na wiini Absalom ɗa lai.

³Yivai ni ɗa, rɗi n’amai na wiiɗi askarai ɗa a bunda aŋ tuwi, buri e ɵini ɓa pai ɗa, mri na wiini ahini ɗa a fiɗini sini gara.

⁴Yuvai ni ɗa, askarai e wiyisi aha war fuŋ n’abai sek ɗa war kuɗuhai, maiɗi askarai na siyer arɗi buri ɓa e prisi edi wuzani hatam nɵa.

⁵Pai ɗa a bara wala arni bar, a ɗuula gaini gdaŋni a muɗa: Absalom n’ahiya ɗa! Absalom ahiya ɗa! ahiya ɗa!

⁶Yowab a hala aha sini pai a miɗini: Ku tikiɗi siyer li wiiɗi askaraiku girna, wiiɗi nagai n’e pulukusi edi, tuku, aliku na maɵagai gaiɗi na falakai lai, falakaiku n’aha gaiɗi n’edi par ca ca paŋ lai.

⁷Ku diriɗi ɗa e ɗi nagai n’e diriku kai ɗa, n’e diriku ɗa ku diriɗi kai. Wala na ku zaŋ girna na ɗa a siŋka edi ɓa askaraiku gaiɗi abakaiɗi paŋ e ɗi wala kadai. Girna mu sɗa ɓa, na ɓa Absalom a nafu karni, na ɓa tiyi na zamai paŋ gaini mri kafa maa a fuɗuku suku tuku kai.

⁸Tiyana ɗa pa suku amai tiɓ, hala ku miɗiɗi seŋ ktai wiiɗi askaraiku kapai e nivi arai zi pi. Sla kai ɗa, mu huku wala ma gaini EPIƊ-ƊAI jaŋ, duvuk na ɗa, ɗif ktai maa aga a hina puku kai. Gir ni ɗa aga a za gdaŋ a suwa gir paŋ n’a zasi suku war agwiku par haa tiyana ta ɗa.

⁹Nɵa pai a fakasi amai fak, a halasi a sumna anene war faada ɗa dam. Asakarai na wiini paŋ e tipisi sini kafa. Askarai na wiini Absalom ɗa paŋ e pri edi, ɗif paŋ a lawa ahani sek sek.

¹⁰Woɗi paŋ arbaɗi pinzibaɗi Izrayel ɗa ɗai e ɗa sispi, e miɗi maini nɵa: Pai David a pulumusi edi war tiɗi gawmu par, a kurumu edi tiɗi Filistrekai par ɗa a ni lai. Tiya n’a pra edi midini afti par wuzani Absalom.

¹¹Absalom ɗa, tumu mu zuŋmu aŋ pai ta ɓa kapai a ŋa mudumu, tiyana gaw te baŋ li, mu biyumu zamai ɗa a maɗa? Mu wuyumu pai David aha kai ɗi?

¹²Pai David lai a ɵina piɗi paakai zi ɓaka Sadok gaini Abiyatar a miɗiɗi: Ki miɗiɗi wiiɗi n’abakai n’arbaɗi ɗai na Yuda ɓa: Pai a nava hiiniɗi pinzibaɗi Izrayel na war gal n’azumai sek ɗa buri wiyini n’aha ya, amma tiki n’amai sek ɗa, ki firiyi ki si hiiniki ɗa asakal piɗi marki par ɗi?

¹³Tiki ki ɗi tawalakaya, ki ɗi keɵke na sa, ki ɗi neŋ na sa lai, ki hini asakal piɗi marki war kitini miy na buri wiyinipai n’aha buri maɗa?

¹⁴Ki hili, ki miɗini wiini Amasa ɓa a neŋ na sa, a keɵke na sa lai, EPIƊ-ƊAI a zaŋa nɵa, nɵa lai, na ɓa mu tikaŋ aŋ abaiɗi askaraiŋa war balamni Yowab haa kureɗ kai ɗa.

¹⁵David a wayasi hiiniɗi ɗai na Yuda paŋ sini, maini hiinini ɗif ktai nɵa. E ɵini pini pai e miɗini: A waisi aha, tuku gaiɗi ɗai na puku paŋ.

¹⁶Nɵa pai a wayasi, a cosi agoɗom wulani ra na Yurdaŋ. Ɗai na Yuda e hili mini pai a Gilgal kapai e zinisi pini aŋ bundasi ra yurdaŋ ɗa amai.

¹⁷Simey n’ahini Gera, na war pinzibani Benyameŋ na Bahurim par a purmasi gaiɗi ɗai na Yuda aŋ hili mini David.

¹⁸Ɗai na Benyameŋ par e ɗifu pini dubu ɗaw, gaini Siba ɗif zi sda n’ahani Sawul gaiɗi alini na doogo pi ɵim, bagakaini na caaɓa ɗa lai.

¹⁹Won hlai na hulum n’abai n’a libiɗisi pakataini pai a n’a bundasi ɗai anene kata sek ɗa, a za maini na pai a firiyaŋ nɵa. Won hlai na pai a bundasi ra Yurdaŋ ɗa li amai, Simey n’ahini Gera a bla sini azumai ezini.

²⁰A miɗini wiini pai: Epin-geza, ku ŋa meefeŋ na mu zaŋ ɗa mada kai, ku hina muduku a kɵa gaini meefeŋ na mu zaŋ suku, war mefeŋ na ku niyasi aha war Yeruzalem par kai ɗa. Ku tika muduku pini kai.

²¹Nkam, ta begeku mu sɗa ɓa mu za meefeŋ suku, amma girna ɗa, mu halasi muku maa wuzaɗi pinzibaɗi Izrayel na war gal n’azumai sek ɗa paŋ.

²²Abisai n’ahiɗi Seruya a muɗa: Seŋ na maafanai na Simey a naka a muɗaŋ sini ni n’EPIƊ-ƊAI a varaŋ aŋ pai na ɗa, a nava fiɗi n’edi buri hanɗa kai ɗa pini wiyi n’a wayasi na ɗi?

²³David a miɗini wiini Abisai gaini Yowab na tawalni: Aliɗi Seruya, wiiki woni ɗa a maɗa? A seŋki ɗi? Ki bindi ki pi seŋ ara maiɗi gawŋa nɵa buri maɗa? Girna aga mu fuɗa ɗif edi aha warɗi Izrayel kir kai. Tiyana na mu sɗa edi gaglai ɓa pai n’aha warɗi Izrayel muta ɗa?

²⁴Nɵa pai a ha wala mini wiini Simey a muɗa: Jre jaŋ, aga ku nava fiɗi n’edi kai.

²⁵Mefiboset na tiyni Sawul a halasi mini pai ɗa lai. Sin mefeŋ na pai a niyasi edi war Yeruzalem par haa sini mefeŋ n’a na wayasi aha sek jam na ta ɗa, mefeiboset a maka ezini edi kai, a zizina muɗugi na mini kai, a ma sapa na sini edi kaalai.

²⁶Won hlai n’a cosi wuzani pai a Yeruzalem, pai a miɗini: Mefiboset, ku hala gaya kai buri maɗa?

²⁷A wiyini seŋ: Pai n’epin-geza, a duulaŋa ɗa a ɗifŋa zi sda ɗa, mu hiina ɓa gdaŋŋa a suma hili na gaini azi kai na ɗa, mu ziziniti ablehöŋa ta kapai mu hala gaini pai ɗa lai, buri mu daŋlaŋ.

²⁸Ɗifŋa zi sda ɗa a halaɗi a muɗuku seŋ z'eles mada haa. Amma tuku pai n’epin-geza ɗa, ku na maini ɵeŋ na wiini Alaw nɵa. Tiyana ɗa, za maini na ku dara nɵa.

²⁹Kadai tiɓ ɗa, pakatai na wiini apa ɗa e nivi ɗa a fiɗi n’edi, gaini hanɗa paŋ ku pɵaŋa arbaɗi nagai n’e simi suku par ɗa. Wala na mu zilbaŋ katawai ɗa a maɗa? Na mu paya zamai ɗa a maɗa?

³⁰Pai a miɗini: ku muɗa seŋ hanɗa kir kai. Mu ɗiyaŋ ya ɓa, tuku gaini Siba aga ki ɓûrwi vuwai na wiini Sawul ɗa arbaki.

³¹Mefiboset a miɗini wiini pai: Koo ɓa Siba a mula vuwai ɗa aŋ wiini paŋ kaw seŋ aŋ kai. Pai n’epin-geza a cosi aha jam ya suwi.

³²Barzilai na Galaad par a halasi a Rogelim par, a vuga ra Yurdan amai gaini pai ktai, kapai asakal par won hlai n’e cû anene kata a ɓurwa gaini.

³³Barzilai a za wel gara ta, buzani a za doogo doogo mitwis. A ɗif na gaini wala tini, won hlai na pai a sumnasi a Mahanayim ɗa, a zina pini war wazagai paŋ.

³⁴Pai a miɗini wiini Barzilai: Halasi gaya war Yeruzalem, aga mu zina puku war haajakaiku paŋ.

³⁵Amma Barzilai a wiyini seŋ wiini pai: Buzaŋa a hina katawai gama ɗa, na kapai mu hala amai a Yeruzalem gaini pai ɗa!

³⁶Buzaŋa girna doogo doogo mitwis, mu kiɗa mu za ɓraw arbani wala na pɗem gaini na meefeŋ ɗa kai. Wulaɗi maɵagai gaiɗi falakai n’e zini yama ɗa, mu sɗa pɗemni kir kai. Mu halaɗi aŋ huwyuku kadai meere buri maɗa, pai n’Epin-geza?

³⁷Mu bundaɗi anene kata tin Yurdan par gaiku plaha suwi. Ku huwya suku buriya viya ɵa kai.

³⁸Hinaŋa mu waya war fuŋŋa n’abai ɗa, aŋ mra woni, kapai e piŋa ɵimani yeɵ na wiini apa gaini na wiiɗi ama lai. Amma Kimham, n’ahiya ɗa, aga a hala gaiku, pai n’Epin-geza, za sini paŋ maini na ku dara ɵa.

³⁹Pai a muɗa: Himham ɗa a hala gaya, aga mu za sini maini na ku furya ɵa; na ku firya ɓa mu zaŋ suku ɗa, aga mu zaŋ.

⁴⁰Won hlai na ɗai paŋ e vigi ra Yurdan ɗa li gaini pai lai ɗa, pai a goba Barzilai, a ɓakaŋ lai. Asakal par Barzilai a waya aha midini aftini.

⁴¹Pai a tikiti futi a Gilgal sek, Kimham a hala gaini. Ɗai na Yuda paŋ gaini galɗi ɗai na Izrayel ɗa e hili pini pai David.

⁴²Amma ɗai na Izrayel ɗa e hilisi sini pai e miɗini: Tawalakaiyi na Yuda par e yumuku, e vigisi ra Yurdan ɗa gaiku gaiɗi ɗai n’ahaku lai buri maɗa?

⁴³Ɗai na Yuda e wiyiɗi seŋ wiiɗi ɗai na Izrayel ɗa maini nɵa: Buri ɓa pai ɗa a zigelyi; ki zi hiy na buri hanɗa ɗi? A siyi simi miyi na ɗa a pai ɗi? A siyi ka katu ɗi?

⁴⁴Ɗai na Izrayel e wiyiɗi seŋ wiiɗi ɗai na Yuda: pai ɗa wiyi azi doogo a sûwiki tiki, nkam, David ɗa a wiyi a sûwiki tiki. Tiki ki yimiyi maiɗi ɗai na nafaɗi kai ɵa buri ma ɗa? Hiini na ɓa mu puyumusi paimu ɗa a halaɗi avut siyi tiyi par kai ɗi? Nɵa ɗai na Yuda e miɗi gdaŋ e sûwiɗi ɗai na Izrayel ɗa pra.