Read Mousgoum 2 Samuwel 20 Bible Online

2 Samuwel 20 - Mousgoum bible

2 Samuwel 20

¹Ɗif ktai a nafu a Gilgal, yikini Seba, n’ahini Bikri, na war pinzibani Benyamin. A ɗif n’a nafa kai. A yiba faana a muɗa: Wala ktai maa a tupumu gaini David kai, wala ktai zi bonu arbamu gaini ahini Isai hanɗa kai Tiki ɗai na Izrayel, ɗif paŋ a waya aha.

²Nɵa ɗai na Izrayel ɗa e yimi siɗi edi sini David par, e tiɓi pini Seba n’ahaini Bikri. Amma ɗai na Yuda ɗa, e hini gaini pai ɗa. E hili gaini agoɗom wulani ra Yurdan ɗa par, haa a Yeruzalem ta.

³Pai David a co a Yeruzalem, aha war dalamni zi pai ɗa. Pai a yikiɗi marmakaini na doogo n’a hiniɗisi ka aha aŋ giɗimi dalam ɗa. A miliɗi amlai war dilimi ktai ca, a zina piɗi war haajaɗi paŋ, amma a fana gaiɗi kir kai. E hini amlai woni ɵa haa sin mriɗi. E hini maiɗi falakai na war greŋ ɵa, paŋ ktai mofoɗi aŋ karni hai.

⁴Pai a miɗini wiini Amasa: Mu suku mefeŋ hu, ku yikiɗisi askarai na Yuda paŋ won na. Yivai ni ɗa, tuku ku na lai.

⁵Amasa a hala aŋ ykiɗisi askarai na Yuda ɗa, amma sarti na pai a kataŋ ta ɗa, a suwaŋ edi su.

⁶Nɵa David a miɗini wiini Abisai: Tiyana ɗa Seba n’ahini Bikri ɗa aga a zumu meefeŋ a suwa Absalom ɗa pra. Tuku ɗa, ku tika balamni ɗa, ku mula askarai puku, ku tika futi pini, ku hinaŋ a niya aha war fuŋ n’abai zi ɵaga, kapai a mula tumu kai.

⁷Asakarai na pini Yowabɗa e hili pini, gaiɗi Kretekai, Peletitekai, gaiɗi ɗai zi hatam paŋ lai. E fiki a Yeruzalem par, e tiki futi pin Seba n’ahini Bikri ɗa.

⁸Won hlai n’e cû gobi gaini ahi-fuŋ n’aŋ war Gabawon ɗa, e tili Amasa a na halasi wuzaɗi par. Yowab a wa sapa na wiiɗi asarai sini, a rga kaɵkar sini santir na wuzani ɓak, gai wi war sutoɗi ɗik. Won hlai n’a na hala ɗa, kaɵkar a kɵa azumai.

⁹Yowab a miɗini wiini Amasa: Tawala, maɵa ku na jam hek ɗi? Gaiɗi tini na wus ɗa a yima miɗigi na min Amasa, aŋ kɵa amai wulani aŋ firyaŋ.

¹⁰Amasa a tika hangalni sini kaɵkar n’aŋ tini Yowab, war tini na muni ɗa kai. Yowab a ɓulaŋ warni, aru na warni a niyasi edi, a mra mini. Yowab a ɓulaŋ zamai kir kai. Yowab gaini Abisai na tawalni e tiki futi pini Seba n’ahini Bikri.

¹¹Askar na pini Yowab par ktai a ɗiya midini kopoŋni Amasa ɗa zaw a muɗa: Ɗif n’aŋ pini Yowab par ɗa asiya ɗa? Ɗif n’aŋ pini David par ɗa asiya ɗa? A tikaɗi futi pini Yowab.

¹²Amasa a hina azumai waŋ aŋ bubula arni felni warɗi futi, won hlai na askar ɗa a tala ɗa a tala haa ɗa, ɗai e firiyi e hili kai ɗa, a hogo Amasa edi warɗi futi par hok, a blaŋ edi war vuwai ktai su, a bara sapa midini bar, buri ɓa ɗif paŋ n’a cosi li sini paŋ ɗa a ɗiya paŋ.

¹³Won hlai n’e tikiŋ edi warɗi futi par ɗaw ɗa, ɗai paŋ e hili pini Yowab, aŋ tiki futi pini Seba n’ahini Bkri ɗa.

¹⁴Yowab a vuga midini afti na wiiɗi pini zibaɗi Izrayel ɗa paŋ, a hala haa war fuŋ n’abai na Abel-Bet-Maaka. Ɗai na Berit ɗa paŋ e tipi e hili gaini lai.

¹⁵E hili e ciki Seba aha war fuŋ n’abai na Abel-Bet-Maaka, e libi ezini fuŋ n’abai ɗa amai, e niyi amai sini ɵaga lai. Ɗai na e ɗi pini Yowab ɗa e hi ɵaga ɗa kapai a haɗa azumai.

¹⁶Nɵa muni ktai na yili te ɗuulasi aha war fuŋ n’abai ɗa par maini nɵa: Mu siiwiki, zi barka ɗiyi haw, ɗiyi haw. Ki miɗini wiini Yowab ɓa a torosi sa na mu dara mu miɗini seŋ.

¹⁷A halasi siɗi, muni te miɗini: Ku tuku Yowab ɗa tiɓ? A waya seŋ a miɗiɗi: Muta. Te miɗini: Slina seŋ na mu muɗuŋku ɗa. A waya seŋ a muɗa: Mu na ɵina.

¹⁸Nɵa te muɗa: A ɗipar ɗa, ɗai ɗa e miɗi ɗa ɓa: Hulumu, ɵbuɗumu ɗai na Abel, seŋ ɗa aga a vada.

¹⁹Tiyi ɗa mi ɗi ɗai zi ɵeɗ, ɗai na jre lai war Izrayel ɗa, tuku ku firiya ku vada fuŋ n’abai hanɗa edi warɗi Izrayel par, paŋ ktai fuŋ n’abakai na maini hanɗa ɵa ɗa a na gaŋ kai. Bulum na wiini EPIƊ-ƊAI ɗa, ku firiya ku vadaŋ edi ɗa buri maɗa?

²⁰Yowab a wiyiɗi seŋ: Zaw kai! Mu dara mu vadaŋ edi duk kai, mu dara mu fuɗa wala ktai edi kaalai.

²¹A na ɗa ɵa kai, ɗif ktai na midini hlai zi huwuŋ na wiini Efrayim ɗa par, yikini ɓa: Seba a ahini Bikri a faka amai sini pai, sini David, ku siŋyi ta, ni pal, aga mu hina fuŋki ɗa. Muni te miɗini wiini Yowab: Pɗem, aga mu bilikiɗi humokni amai par midini ɵagai ɗa par ɗaw.

²²Muni te hala te miɗiɗi wiiɗi ɗai gaini yel, e ɗûklisi humokni Seba n’ahini Bikri ɗa daf, e biliŋni wiini Yowab su. Nɵa Yowab a yiba faana, ɗai e yimi warɗi edi sini fuŋ n’abai par, ɗif paŋ a waya aha a waya aha. Asakal par Yowab a wayasi a Yeruzalem sini pai.

²³Yowab a abai na wiiɗi askarai na wiiɗi Izrayel ɗa paŋ, Benaya n’ahini Yoyada a abaiɗi kretekai gaiɗi Peletitekai n’e giɗimi pai ɗa.

²⁴Adoram a abai na midini sda zi dewele ɗa. Yosafat n’ahini Alihud ɗa a mini pai.

²⁵Seba a ɗif zi ɗû wazagai; Sadok gaini Abiyatar e ɗi paakai zi ɓaka.

²⁶Ira na war pinzibani Yayir ɗa, a pai zi ɓaka n’aŋ warni ɵeŋ na wiini David lai.