Read Mousgoum 2 Samuwel 21 Bible Online

2 Samuwel 21 - Mousgoum bible

2 Samuwel 21

¹War sarti na David a na aŋ pai ɗa, wiyamai te za, te za haa buza hu. David a zilba dirini EPIƊ-ƊAI. EPIƊ-ƊAI a miɗini: A za na ɗa burini Sawul gaiɗi pinzibani. Nagai e zi meefeŋ, won hlai n’e fiɗiɗi ɗai na Gabawon edi ɗa.

²Pai a yikiɗi ɗai na Gabawon, buri a haɗa kalaŋ gaiɗi. Ɗai na Gabawon ɗa, e ɗi pinzibaɗi Izrayel kai, amma e ɗi ɗai n’e hini pin pinzibaɗi Amoritekai. Ɗai na Izrayel, e hi wala miɗi ɓ'aga e fiɗiɗi kai. Gai hanɗa paŋ, Sawul pin diri n’a diriɗi ɗai na Izrayel gaiɗi na Yuda abai gara ɗa, a paya futi aŋ fiɗiɗi edi.

³David a miɗiɗi: N'aga mu za buriki ɗa a ma ɗa? Meefeŋ na Sawul a zaŋ siki na ɗa, mu zizinaŋ ɗa maɵa maɵa ɗa, kapai ki ɓikiɗi ɗai na wii alaw ta ɗa?

⁴Ɗai na Gabawon e wiyini seŋ: Seŋ n’a na arbaɗi gaini Sawul gaiɗi pinzibani ɗa, a wala n’a zizina gaini arzaŋ kaalai, or kaalai, gaini mri na wiini ɗif na Izrayel ktai kaalai. David a miɗiɗi pra, na ki firyiŋ paŋ ɗa, miɗiŋa, aga mu zaŋ buriki.

⁵Ɗai na Gabawon e miɗini: Sawul a firya ɓa a vidiyi edi, a rgaŋ warni ɓa a vidiyi edi midini afti na Izrayel par marwai.

⁶Arbaɗi alini par ɗa, ki siyi ɗai muguzak, tiyi aga mi rgiɗi amai sini luwuŋ wuzani arni EPIƊ-ƊAI, war Gibeya. Fuŋ n’abai na Sawul, pai n’EPIƊ-ƊAI a varaŋ ɗa a naka warni. David a muɗa: Aga mu siɗi war tiki.

⁷Pai a hina Mefibaal, n’ahini Yonatan na tiyni Saul ɗa karni. Buri ɓa a ha wala mini wiini Yonatan na marmaini, war yikini EPIƊ-ƊAI.

⁸Pai a miliɗi aliɗi Mispa n’ahini Ayya na sulu na te wiiɗi gaini Sawul: Armoni gaini Mefiboset, gaiɗi aliɗi Mikal n’ahini Sawul na ɵim na te wiiɗi gaini Adriyel n’ahini Barzillai na Mehoda par.

⁹A siɗi war tiɗi ɗai na Gabawon, nagai e rgiɗi amai sini luwuŋ amai midiɗi huwuŋ wuzani EPIƊ-ƊAI. Nagai muguzak paŋ e mri miɗi marɗi kafa, e fiɗiɗi edi war mefeŋ n’avut na wiini hiɗini seyem, war pi zi tiki na wiini hiɗini orge.

¹⁰Rispa n’ahini Ayya te mula sapa zi tuwi te zizinaŋ azumai wiiɗi na dama amai midiɗi huwuŋ, sini pini zi tiki na wiini hiɗini seyem n’avut par haa sini mefeŋ na faŋ a tika pini aŋ ɵa ta, girvudi te hina wala ɗufli a sumna zumai midiɗi kai, duvuk ɗe te hina wazagai na edi buza a halasi amlai siɗi sek kaalai.

¹¹Ɗai e hilisi e miɗini wiini David gaini sda na Rispa n’ahini Ayya na muni Sawul te zaŋ ɗa.

¹²David a hala a pini keɵkeni Sawul gaini na wiini Yonatan n’ahini tiɗi ɗai na Yabes na war Galaad par, buri ɓa, mefeŋ na Filistrekai e rɗi amai midini Sawul a Gilbowa ɗa, e rgi kopoŋni gaini na wiini Yonatan ɗa amai sini luwuŋ ɓak ɓak. Ɗai na Yabes e hili e miliŋsi war hlai na Bet-Seyan ɗa par war kuɗuhai.

¹³David a mulasi kɵkeni Sawul gaini na wiini Yonatan n’ahini a Yabes par, a mulasi keɵkeɗdi nagai na muguzak n’e rgiɗdi amai sini luwuŋ ɗa lai.

¹⁴Asakal par e pi keɵkeni Sawul gaini na wiini Yonatan n’ahini war waŋ na wiini Kis n’epini Sawul ɗɗa a Sela midini afti na wiini Benyameŋ. Na pai a muɗaŋ ɗa paŋ ɗai e ziŋ paŋ. Asakal hanɗa Alaw a tika pini aŋ za pɗem siɗi ɗai na midini afti ɗa.

¹⁵Hatam zamai a za arbaɗi ɗai na Izrayel gaiɗi Filistrekai pra. David gaiɗi askaraini e hili aŋ hitimiɗi. David a tala a nafu gaini kayai.

¹⁶Nɵa Yisbi-Benod na war pinzibani Rafa, a firiya a fuɗaŋ. Gumani kawai na miɗi kawai na wiini a za kilo hu, kaɵkar na hehe wuzani ɓak lai.

¹⁷Amma Abisai n’ahiɗi Seruya a liwiini ɗuwal, a fuɗa Filistre ɗa edi. Nɵa askarai na wiini David e miɗini buri a ha wala mini ɓa aga a hala edi mini hatam gaiɗi kir kai, kapai pai na wiiɗi Izrayel ɗa te mra kai.

¹⁸Asakal hanɗa pra, hatam zamai a za gaiɗi Filistrekai a Gob. War hlai ni ɗa, Sibbekai na Husa par a fuɗa Saf na war pinzibani Rafa.

¹⁹Hatam zamai a za gaiɗi Filistrekai a Gob pra. Elha n’aŋ n’ahini Yaare-Oregim na Betlehem par a fuɗa Goliyat na Gad. Luwuŋ na piɗi kawaini ɗa abai maini luwuŋ n’e hi sapa gaini nɵa.

²⁰Hatam a za a Gat pra, gaŋgalaŋ ktai na ali tini ɵaara ɵaara, alini ezini ɵaara ɵaara lai, a za paŋ caaɓa pi puɗu a nafu arbaɗi, a na war pinzibani Rafa lai.

²¹A kola sini midiɗi Izrayel, Yehonatan n’ahini Simeya na tawalni David a fuɗaŋ edi.

²²Ɗai na puɗu hanɗa e ɗi pinzibani Rafana Gat, David gaiɗi askaraini, E fiɗiɗi edi