Read Mousgoum 2 Samuwel 22 Bible Online

2 Samuwel 22 - Mousgoum bible

2 Samuwel 22

¹David a muɗa seŋ n’aŋ war yama hanɗa wiini EPIƊ-ƊAI, war mefeŋ n’EPIƊ-ƊAI a plaŋsi edi tiɗi gawni par, tini Sawul par lai.

²A muɗa: EPIƊ-ƊAI a huwuŋ na wiya, a hlai zi ŋoyai na wiya, a Ni n’a plaŋa edi lai.

³Alaw wiya, tuku ku huwuŋ na mu ŋoya siɗi, tuku, ku gamar na wiya, ku hlai zi ŋoyai na mu ŋoya woni, ku fuŋ zi ɵaga na gdaŋ na mu ŋoya woni. Mu ŋoya suku, kapai mu nava pili n’edi tiɗi ɗai zi karai ɗa par.

⁴Won hlai na mu ɗuula li EPIƊ-ƊAI ɗa, mu nava rɗi amai midiɗi gawŋa. Kol sini EPIƊ-ƊAI.

⁵Mayaw na wiini mri a paŋa zumai, Yem zi ki na wiini ɓilki n’edi a mulaŋa hunai pa.

⁶Jaɓ na wiini hlaiɗi ɗai zi mri a gunaŋa azumai gun Azaw na wiini mri a nafu wuza gaini gini gaŋ.

⁷War girŋa mu ɗuula EPIƊ-ƊAI, mu yika Alaw na wiya. Amlai war tempel na wiini par, a ɵina wula, ɗuuwalŋa a wa haa ɵimani ta.

⁸Nɵa afti a muguza, a ziriya. Ezini hlai n’amai ɗa a gigiɗa amai, a ziriya wuzani hiy na wiini Alaw.

⁹Agiyiŋ a niyasi edi merfeŋni par, afu n’a yuvuga a niyasi edi mini par, morzoni na mekele keŋ a niyasi edi mini par lai.

¹⁰A yimasi hlai n’amai ɗa azumai kaaia, a niyasi azumai, ɗugul na murɗek a yimasi azumai pini ezini.

¹¹EPIƊ-ƊAI a sumna duɓani kerubim a ɗufla. A siŋkasi sini edi amai graŋni smer dam.

¹²A za gegeŋ ɗa aŋ dugoini ta, a guna sini azumai gaini ɗugul n’abakai, gaini ɗugul na murɗek.

¹³War gaglai n’a ŋala wuzani ɗa, morjo a ya lai.

¹⁴Amai war hlai n’amai par EPIƊ-ƊAI a ɓara, Alaw n’amai a ŋuriya,

¹⁵EPIƊ-ƊAI a ɵiɓiɗi gawni gaini ɓaraw, a ɵiriɗi edi, a hina faŋ a wulɗa, a miliɗi hunai piɗi.

¹⁶Pini yem-ra n’abai na azumai ɗa a sɗasi amai. Eziɗi yai zi tûûri ɗa a hinasi amai kadai lai, wuzani ɓarai na wiini EPIƊ-ƊAI, wuzani smer n’a niyasi edi merfeŋni par.

¹⁷Amai war hlai n’amai par, EPIƊ-ƊAI a wasi tini a yimaŋa, A tikaŋassi edi arni yem n’abai n’a na rɓaŋa ɗa par.

¹⁸A plaŋa edi tini gawŋa zi spak ɗa par, tiɗi nagai n’e diriŋa kai, na gdaŋɗi a suwaŋa par lai.

¹⁹E firiyi e biŋa war mefeŋ na mu naka war gir ɗa, amma EPIƊ-ƊAI a zina pa ta.

²⁰A kurɗaŋa, a blaŋa baŋa sa, a plaŋa edi nɵa, buri ɓa a daraŋa gara.

²¹EPIƊ-ƊAI a za sa nɵa pini jre na wiya, a vurgaŋa nɵa buri mu tetema wala na meefeŋ gaini ta kai.

²²Buri mu tikiti futi na wiini EPIƊ-ƊAI, mu hiniti edi maiɗi ɗai na maafanai nɵa kai.

²³Gadaini n’a ɗiyaŋ paŋ mu za pini paŋ, mu hina ktai edi pini kai.

²⁴Mu paya wuzani arni war jre, mu hina sa war meefeŋ ktai kaalai.

²⁵Nɵa EPIƊ-ƊAI a za sa pini jre na wiya, a vurgaŋa buri a tala wala na meefeŋ sa kai.

²⁶EPIƊ-ƊAI, tuku ku na jre gaiɗi nagai na jrekai, gaini ɗif na agulni a huna kai n’a na ɗikat ɗa, tuku ku na ɗikat lai.

²⁷Gaini ɗif na hilu, ku na hilu, ɗif zi rhai ɗa tuku ku sɗa yelni paŋ.

²⁸Tuku ku zina piɗi ɗai n’e ɗa siɗi gir ɗa, amma nagai n’e kûli siɗi, ku hûsiɗi azumai.

²⁹EPIƊ-ƊAI, tuku ku lampa na wiya, EPIƊ-ƊAI a giyha gegeŋ na sa edi.

³⁰Gaiku tuku, mu kiɗa mu tetemiɗi vokɗi askarai, gaini Alaw na wiya mu kiɗa mu priti zilaagai.

³¹Futi na EPIƊ-ƊAI a sikinitiŋa ɗa te na ɗikat, seŋ n’a muɗaŋa ɗe gaini futini lai. A gamar na wiiɗi nagai n’e ŋûyi sini.

³²Alaw ɗa asiya ɗa? Na ɓa a EPIƊ-ƊAI kai ɗa! Huwuŋ ɗa asiya ɗa? Na ɓa a Alaw na wiyi kai ɗa!

³³Ni n’a giɗimaŋa lai, a saŋa gdaŋ lai ɗa a Alaw, a ziziniteŋa futi wuza ɗa a ni.

³⁴A bunda aza kolek maiɗi biryimi nɵa, a ɗiyaŋa amai midini hlai na ɓoŋorai,

³⁵A hitraŋa min hatam, aŋ gidiya taŋ zi kiya ɗa lai.

³⁶Ku saŋa gamar zi kûri na wiiku, wiyini seŋ na ku wayaŋa ɗa a ɵaŋa amai.

³⁷Ku ɵaŋa baŋa sa su aŋ hili, hlai na mu hala ɗa, huhunai n’a za a huwyaŋa kai.

³⁸Mu lawa piɗi gawŋa, mu vidiɗi edi, mu vidiɗisi kai ɗa mu waisi kai.

³⁹Mu vidiɗi edi, mu siriɗi edi, e kiɗi e fiki amai kir kai, e hini azumai pini aza ca.

⁴⁰Ku vaŋa gaini gdaŋ burini hatam, ku hiɗiɗisi gawŋa azumai wuza.

⁴¹Ku birkiɗi gawŋa wuza, nagai n’e diriŋa kai ɗa, mu vidiɗi edi.

⁴²E ɗûûli, amma ɗif n’a zina piɗi aŋ kai, E ɗûû li EPIƊ-ƊAI, amma a wiyiɗi seŋ kai.

⁴³Mu siriɗi maini alogodo na smer a tikaŋ amai ɗa nɵa. Mu tiɵiɗi, mu kirpiɗi azumai maini dodoɓo na warɗi futi nɵa.

⁴⁴Ku kurɗaŋa edi mini fiki n’amai na wiiɗi ɗaiŋa par, ku hinaŋa aŋ ŋa midiɗi pinziba na zamai, pinziba na mu siɗiɗi avut par kai e bindi aŋ ɗaiŋa.

⁴⁵Won hlai na mu muɗa li tar, na morkokai e ɵini ma. E kûli sda na mu zaŋ ɗa.

⁴⁶Hunai te yimiɗi, Won hlai n’e niyisi edi warni hlaiɗi zi ŋoyai par, e ziriyi.

⁴⁷EPIƊ-ƊAI aŋ karni, kol sini Huwun na wiya, Alaw a nava kol, Ni a huwuŋ n’a kurɗaŋa.

⁴⁸Alaw n’a saŋa rɗi n’amai midiɗi gawŋa, a miliɗi ɗai azumai pa,

⁴⁹a plaŋa edi tiɗi gawŋa par lai. Tuku ku saŋa rɗi n’amai midiɗi nagai n’e fiki amai sa, ku plaŋa edi tiɗi ɗai zi girmis ɗa par.

⁵⁰Buri hanɗa, EPIƊ-ƊAI aga mu kuluku arbaɗi pinzibaɗi ɗai na zamai, Aga mu zina yama gaiku.

⁵¹EPIƊ-ƊAI a sa rɗi n’amai wiini pai n’a varaŋ, a za pɗem sini ni na emel a ma midini aŋ pai, sini David gaini pinzibani lai haa kureɗ.