Read Mousgoum 2 Samuwel 24 Bible Online

2 Samuwel 24 - Mousgoum bible

2 Samuwel 24

¹Mefeŋ ktai EPIƊ-ƊAI a za hiy siɗi Izrayel pra, a zini pini David aŋ kiɗi war seŋ, a miɗini: Hala piɵiɗi ɗai na Izrayel gaiɗi na Yuda ɗa.

²Nɵa Pai a miɗini wiini Yowab abaiɗi askarai n’a na gaini ɓa: A hala a gunasi midini afti na wiiɗi Izrayel ɗa paŋ, a Dan war gal n’azumai par haa a Beer-Seba war gal n’amai sek ɗa ta, pɵeɗisi ɗai ɗa, kapai mu sɗa pɵaɗi ɗa.

³Yowab a miɗini wiini pai: Jaamus, a zuva ɓa Epiɗ-ɗai Alaw na wiiku a riyiɗi ɗai na puku ɗa amai azi miya, Epin-geza ku tala hanɗa gaini arku lai. Amma tiyana ku paya pɵaɗi ɗai ku tuku ɗa buri maɗa?

⁴Gaini hanɗa paŋ miɗi na wiini pai ɗa a suwa gdaŋni a suwa Yowab gaiɗi abakaiɗi askarai ɗa su. Yowab gaiɗi abakaiɗi askarai na wiini pai e hili aŋ pɵiɗisi ɗai na Izrayel ɗa.

⁵E vigi ra Yurdan ɗa amai vug, e tikisi piɗi a Arower par sini fuŋ n’abai n’a n’agoɗom war huduk par, arɗi a Gad sek, a Yazer ɗaw.

⁶E sûmidini afti na Galaad, e vigi midini afti na wiiɗi Hittitekai a Kades. E hili a Dan-Yaan gaini afti na ɵimani, e hili wuzaɗi a Sidon sek aŋ piɵiɗi ɗai ɗa.

⁷E niyi aha war fuŋ zi ɵaga na Tirus gaini fuŋ n’abakai n’a naka a wiiɗi Hivitekai gaiɗi Kananiyakai. E sirɓi war galni afti na Yuda n’amai sek a Beer- Seba aŋ piɵiɗi ɗai ɗaai.

⁸E gûnisi afti ɗa paŋ, e zisi tile ɵeeŋe gaini mefeŋ caaɓa kapai e cûsi aha warɗi Yeruzalem.

⁹Yowab a sa piɵiɗi wiini pai: Ɗai na Izrayel n’e kiɗi e hitimi e ɗa paŋ dubu miya mitwis, na Yuda n’e kiɗi e hitimi ɗa, e ɗa paŋ dubu miya ɵim lai.

¹⁰Asakal pɵiɗi ɗai par ɗa, agulni David a tika pini a ɓaraŋ: David a miɗini wiini EPIƊ-ƊAI: Mu za tuwur n’abai gara suku, tiyana ɗa, EPIƊ-ƊAI, ku za barka, saŋa ni burini meefeŋ hanɗa, buri mu za hanɗa maini ɗif zi dûûli ɵa.

¹¹Won hlai na David a ɵiyasi amai gorof par ɗa, seŋ na wiini EPIƊ-ƊAI hanɗa a muɗa sini ɗif na mini Alaw Gad n’a sini gadai ɗa, a miɗini:

¹²Hala ku miɗini wiini David ɓa, EPIƊ-ƊAI a na muɗa maini nɵa: Aga mu kasi gir wuzaku hu ku vara arbani par ktai kapai mu ɵinaŋsi muduku.

¹³Gad a hala sini David a sini labar hanɗa a miɗini: Ku hiina pɗem, ku vara ktai arbani wazagai n’aga mu muɗuŋku hanɗa, kapai mu wiyini seŋ wiini ni n’a ɵinaŋasi ɗa lai. Ku firiya ɓa wiyamai a za midini aftiku haa buza muguzak ɗa zaw, gawku siɗi puku yaw e birguku ɵa haa tile hu ɗa zaw, zaw vlak na mefeŋ hu midini aftiku ɗi?

¹⁴David a wiyini seŋ wiini Gad: M'aŋ war hunai n’abai, marya mu kɵumu war tini EPIƊ-ƊAI, buri ɓa hiinini haw na wiini abai gara, a suwa na mu kɵumu war tiɗi ɗai ɗa,

¹⁵Nɵa EPIƊ-ƊAI a ɵinasi vlak aha warɗi Izrayel, gorof par na wiiɗi yuvai hanɗa haa sini mefeŋ n’a ɗiyaŋ ta ɗa, a Dan war gal n’azumai par haa a Beer-Seba war gal n’amai sek ta ɗa, ɗai e mri dubu miya muguzak.

¹⁶Sleŋ na wiini EPIƊ-ƊAI a bunda arni siɗi Yeruzalem sek aŋ viditi edi, amma gir hanɗa a fiɗini sini EPIƊ-ƊAI. A miɗini wiini ɗif ɵeŋ zi tûûri hlai ɗa: Suwi! Ɗiya ɵa ta. Sleŋ na wiini EPIƊ-ƊAI ɗa a nafu ɵimani luluf na wiini Arafna na Yebus par ɗa.

¹⁷Won hlai na ɵeŋ na wiini EPIƊ-ƊAI a na fiɗiɗi ɗai edi, David a miɗini wiini EPIƊ-ƊAI: mu za tuwur ɗa muta, ɗaiŋa hanɗa e zi ɗa a ma lai ɗa, ku fuɗaŋa edi ɗa muta gaiɗi pakataiŋa ɗi kaalai!

¹⁸Mefeŋni dama Gad a hala sini David a miɗini: Hala rga gûwiŋ zi yi ɓaka wiini EPIƊ-ƊAI war luluf na wiini Arafna na Yebus ɗa.

¹⁹David a hala maini n’EPIƊ-ƊAI a miɗiŋni war mini Gad par nɵa.

²⁰Amai war lulufni par, Arafna a talasi pai gaiɗi ɗaini e ɗa hiliɗi sini sek, a niyasi edi miɗi, a hurga azumai wuzani pai, a pa arni azumai tiɓ.

²¹Arafna a zilbaŋ a muɗa: Pai n’Epin-geza a halasi ahaya ɵa jam tiɓ ɗi? David a wiyini seŋ: Mu halasi aŋ wura lulufku ɗa kapai mu rga gûwiŋ zi yi ɓaka wiini EPIƊ-ƊAI woni. Nɵa gir hanɗa aga a tika edi midiɗi ɗai par.

²²Arafna a miɗini wiini David: Pai n’Epin-geza, tikaŋ wiiku, za ɓaka zi yi na ku daraŋ wiini EPIƊ-ƊAI woni maini na ku dara nɵa. Slaakai na wiya maa aŋ tuku na, za ɓaka zi yi wiiku gaini, Saret na gaini juk aŋ tuku n’a luwuŋ zi yi ɗa lai.

²³Wazagai hanɗa paŋ mu siŋni wiini pai. A zuva ɓa Epiɗ-ɗai Alaw na wiiku a yima ɓaka hanɗa tuku par.

²⁴Amma pai a miɗini wiini Arafna: Zaw kai, sai mu wuraŋ tuku par gaini wûri. Mu kiɗa mu zini ɓaka na mu ɓa wala burini kai wiini Epiɗ-ɗai Alaw na wiya kai. David a wura luluf gaini garakai lai sulai z'arzaŋ doogo doogo ɵim.

²⁵David a rga gûwiŋ zi yi ɓaka wiini EPIƊ-ƊAI woni, a za ɓaka zi yi gaini ɓaka zi ɵeɗ midini. EPIƊ-ƊAI a za yum sini aftiɗi ɗa, gir n’abai n’a ɵinaŋsi midiɗi Izrayel a ɗiya lai.