Read Mousgoum 2 Samuwel 3 Bible Online

2 Samuwel 3 - Mousgoum bible

2 Samuwel 3

¹Hatam n’arbaɗi ɗai na pini Sawul gaiɗi ɗai na pini David ɗa, a za mefeŋ viya. David a bunda gdaŋ wuzani sek sek, ɗai na wiini Sawul ɗa gdaŋɗi a yima edi sek sek lai.

²Alini David n’e wi a Hebron ɗa e ɗi hanɗa: Ahini n’abai ɗa a Amnon, ahiɗi Ahinowam na Zizreyel par;

³na wulani ɗa a Kileyab a ahiɗi Abigayil na munini Nabal na Karmel par. N'ag'aŋ hu ɗa a Absalom a ahiɗi Maaka n’ahini Talmai pai na Gesur.

⁴N'ag'aŋ puɗu ɗa a Adoniyas a ahiɗi Hagit, n’ag'aŋ ɵim ɗa a Sefatiya a ahiɗi Abital;

⁵n’ag'aŋ ɵaara ɗa a Yitreyam, a ahiɗi Egla munini David. Hanɗa e ɗi nagai na David a wiiɗi a Hebron ɗa.

⁶Won hlai na ɗai na wiini Sawul gaiɗi ɗai na wiini David e ɗa hitimi marɗi ɗa, Abner arbaɗi ɗai na wiini Sawul ɗa, spakni a riya amai sek sek.

⁷Marmaini Sawul ktai te nafu yikiɗi ɓa Rispa, t'ahiɗi Ayya. Mefeŋ ktai Isboset a zilbini mini Abner ɓa: Ku fana gaiɗi munini apa buri maɗa?

⁸Won hlai na Abner a ɵina seŋ hanɗa, a za hiy abai gara a muɗa: Ku talaŋa haa ɗa mu ɗif na amanaŋa aŋ kai, na ma aŋ gaiɗi ɗai na wiini David ɗa zaw. Haa girna ta mu ɗiya war jre gaiɗi pakatai na wiini apuku, gaiɗi tawalakaini gaiɗi marmakaini lai. Mu hunuku aŋ kɵi war tini David kai, amma girna ku zilbaŋa ma buri ɓa mu fana gaiɗi muni ɗa,

⁹girna ɗa, EPIƊ-ƊAI a tikaŋa gir n’abai mada ta, na ɓa mu va wala n’EPIƊ-ƊAI a za ɵinini-ha wiini David midini ɗa amai kai ɗa:

¹⁰Buri a ha wala mini ɓa aga a tikiti pai edi tini pinzibani Sawul ɗa par, a sitini Paramai zi pai wiini David midiɗi Yuda gaiɗi Izrayel paŋ, a Dan par haa Beer-seba ta.

¹¹Isboset a kiɗa a wiyini seŋ midini kai buri hunai pini wuzani ta.

¹²Abner a ɵina ɗai sini David war yikini dama, aŋ miɗini: Afti ɗa a wiini asiya ɗa? A miɗini pra: Za bonu gaya aga mu zina puku aŋ tipiɗi aliɗi Izrayel paŋ amai suku.

¹³David a wiyini seŋ: Pɗem aga mu za bonu gaiku, mu paya tuku par ɗa a wala ktai bas, won hlai n’aga ku halasi aŋ nava gaya ɗa, ku hinitisi Mikal n’ahini Sawul ɗa duɓaku kai.

¹⁴David a ɵina ɗai sini Isboset n’ahini Sawul, a miɗini: piyitiŋasi Mikal na muniya ta na mu tiyiti gaini amur na mini gûrgûle na piɗi Filistrekai na miya ɗaw na mu ɗuklaŋsi ɗa.

¹⁵Isboset a ɵina piɗi aŋ yimitisi ahani Paltiyel na mafoɗi n’ahini Laiis ɗa par.

¹⁶Mafoɗi a halasi piɗi haa Bahurim ta, piɗi su aŋ tuwi, amma Abner a miɗini: Faka waya aha. A waya aha lai.

¹⁷Abner a haɗa kalaŋ gaiɗi n’abakai n’arbaɗi ɗai na war Izrayel, a miɗiɗi: haa ɗipar kaw a nafu warki ɓa, a suma pai ɗa a David ɵa.

¹⁸Nɵa, an na ɗa a mefeŋ na ki zi wala woni ɗa. Buri ɓa: EPIƊ-ƊAI a muɗa midini David maini nɵa, aga mu kûrɗiɗi ɗaiŋa na Izrayel war tiɗi Filistrekai par, tiɗi gawɗi na zamai ɗa par lai gaini David na ɵeŋŋa ɗa.

¹⁹Abner a miɗiɗi seŋ hanɗa wiiɗi ɗai na war pinzibani Benyamin. Asakal hanɗa a hala a Hebron sini David aŋ miɗini midini wala na ɗai na Izrayel gaiɗi na war pinzibani Benyamin paŋ e rgi warɗi aŋ ziŋ ɗa.

²⁰Abner gaiɗi ɗai pini caaɓa lai, e hilisi sini David a Hebron, David a ziti fet n’amai burini Abner gaiɗi ɗai na pini ɗa.

²¹Abner a miɗini wiini David: Pai n’epin-geza, mu hala na ɗa aga mu tipiɗisi ɗai na Izrayel paŋ puku, e zi bonu gaiku, nɵa aga ku ŋa woɗi paŋ na ku dara. David a hina Abner a hala, a waya wiini aha jam.

²²Asakal par agwi ɗai na wiini David gaini Yowab e wiyisi edi mini hatam par, e kisi der na pini hatam par tiɗi viya. Sarti ni ɗa, Abner a nafu a Hebron gaini David kir kai. Buri ɓa David a hinaŋ a hala a zini wala na meefeŋ kai.

²³Won hlai na Yowab gaiɗi askarai na pini e cûsi aha ɗa, ɗai e hili e miɗini wiini Yowab ɓa: Abner n’ahini Ner a halasi sini pai ɗa ɗaw, amma pai a zini wala na meefeŋ kai.

²⁴Yowab a halasi sini pai a miɗini: Jaamus, ku za ɵa ɗa a maɗa? Abner a halasi haa ahaku ta, ku ɵaŋ su ɓa a hala wiini ɗa maɵa maɵa ɗa?

²⁵Tuku ku sɗa Abner n’ahini Ner ɗa ya, a halasi na ɗa aŋ duuluku, a tala na ɗa a ezini hlai gaini sda na ku na zaŋ ɗa lai.

²⁶Won hlai n’a niyasi ahani David par tar ɗa, a ɵina ɗai pini Abner aŋ yikiŋnisi. E yikiŋsi haa edi wulaɗi avai na Sira par, David a habar kai.

²⁷Won hlai na Abner a cosi a Hebron ɗa, Yowab a yimaŋ edi war baŋa kiini edi mini magala na mini fuŋ n’abai ɗa, maini n’a firiya a haɗa kalaŋ gaini kiiɗi sulu ɵa, woni a ɓulaŋ warni a fuɗaŋ edi ezini Asayel na tawalni ɗa.

²⁸Won hlai na David a ɵina hanɗa, a muɗa: Ta gaiɗi ɗai na midini aftiŋa paŋ ɗa, EPIƊ-ƊAI a sɗa ɓa, tiyi war seŋ na wiini Abner n’ahini Ner hanɗa kai.

²⁹Gir na pini meefeŋ hanɗa a kɵa midini Yowab gaini pinzibani, arbaɗi zamai fel a ka gaiɗi, na zamai dugum a yimiɗi, na zamai e wi hurofai maiɗi falakai ɵa, na zamai e bi mini hatam, na zamai mini wiyamai lai.

³⁰Yowab gaini Abisai na tawalni e fiɗi Abner edi buri a fuɗa Asayel na tawalɗi war hatam n’a za a Gabawon.

³¹David a miɗini wiini Yowab gaiɗi nagai n’e pini paŋ maini nɵa: Ɓisi sapa na siki edi, wi sapa zi tuwi siki, tûwi Abner. Pai David a ɵaɗi pini kopoŋni par su.

³²E pi Abner a Hebron, Pai a tuwa midini yeɵni gaini wulani amai, ɗai paŋ e tûwi gaini lai.

³³Asakal par pai a ziti yamai zi tuwi ktai burini Abner, a ziniti maini nɵa: Abner a mra maini ɗif na tatala ɵa maɵa maɵa ɗa?

³⁴Tuku Abner, tuku a nafu gaini rgi kai, zaŋ azuku gaini mili kaalai. Amma ku mra maini ɗif n’a kɵa war tiɗi gorɓolokai ɵa maɵa maɵa ɗa? Ɗai n’e ɗa ta ha e tûwi katawai a suwa pra.

³⁵Asakal par ɗai e hili sini David hlai na futi te nawa kai hai ɗa, e miɗini buri a suma wala agwi, amma David a haa wala mini a muɗa: Alaw a tikaŋa gir n’abai mada ta, na ɓa mu suma wala ktai li wuzani nûwiiɗi futi ɗa.

³⁶Won hlai na ɗai paŋ e ɵini seŋ hanɗa, a tala arɗi pɗem gara. Sda na David a zaŋ paŋ ɗa, ɗai e firiyiŋ gara.

³⁷Ɗai na Yuda gaiɗi ɗai na Izrayel ɗa paŋ e siɗi warni mefeŋni ɓa mri na wiini Abner n’ahini Ner ɗa tini pai warni kai.

³⁸Pai a miɗiɗi wiiɗi ɗai n’abakai, ki siɗi ɓa girna ɗa ɗif a mra su, ɗif n’abai a mra warɗi Izrayel su, ki siɗiŋ ɵa ya ɗi?

³⁹Ta girna ɗa, gaini emel n’e miŋŋa mada aŋ pai ɗa paŋ, mu fiɗiti agula su, amma ɗai hanɗa n’aliɗi Seruya ɗa aguɗi a bunda gdaŋ a suwa na wiya ɗa. Amma EPIƊ-ƊAI a sa sini asiya ɗi paŋ vrak na pini sdani na meefeŋ n’a zaŋ.