Read Mousgoum 2 Samuwel 4 Bible Online

2 Samuwel 4 - Mousgoum bible

2 Samuwel 4

¹Won hlai na Isboset n’ahini Sawul a ɵina ɓa Abner a mra si a Hebron su ɗa, a gɵera marwai ɗai na Izrayel paŋ hunai te yimiɗi lai.

²Isboset a nafu gaiɗi abakaini vok sulu: Na ktai yikini ɓa: Baana, na ktai ɗe yikini ɓa: Rekab lai. E ɗi alini Rimmon na Beerot par, war pinziba na wiini Benyamin. Buri ɓa Beerot te tala maini na ɓa te na midini afti na wiini Benyamin ɵa.

³Ɗai na Beerot ɗa e rivi a Gittaiim, e simni woni aŋ fuŋ, e hini woni ɵa haa girna.

⁴Yonatan n’ahini Sawul ɗa, ahini a nafu ktai, a za buza ɵim, yikini ɓa: Mefiboset, ezini gaini mri pini ca. Won hlai na labar a cosi a Yizreyel par ɓa Sawul gaini Yonatan e mri ca ɗa, muni na te sini simi mini ɗa, te tikaŋ te firiya te pra edi gaini, war pirmiɗi ɗa, Mefiboset a mula tiɗi par a kɵa azumai su, a za delai ta, a hina ɵa.

⁵Nɵa Rekab gaini Baa na n’alini Rimnon na Berot par e hili ahani Isboset girvudi n’arba. E niviŋ azumai waŋ war si zi mili na girvudi.

⁶E niyi aha war dalamni gaini algama tiɗi, e niviŋ amlai warɗi dilimi midini lini waŋ, e ɓiliŋ warni. Won hlai n’e fiɗiŋ su ɗa, e ɗûkli humokni daf, e pri edi gaini. E fini aŋ hili yaw warɗi futi na war huduk na Yurdan.

⁸E kinisi humokni Isbosek wiini pai David a Hebron, e miɗini: Jaamus, hanɗa a humokni Isboset n’ahini Sawul na gawku ɗa, n’a naka aŋ paya ɓa a fuɗuku edi ɗa. Girna EPIƊ-ƊAI a dara a vurga meefeŋ na Sawul gaini pinzibani e ziŋ suku ɗa.

⁹David a wiyiɗi seŋ wiiɗi alini Rimnon, Rekab gaini Baana: Gaini EPIƊ-ƊAI na karni n’a kurɗaŋasi mini gir paŋ par jaŋ;

¹⁰ni n’a kaŋasi labarni mri na wiini Sawul ɗa a hiina warni ɓa a saŋa na ɗa a labar na pɗem, mu sa futi buri e yimiŋ, e fiɗiŋ edi a Siglak. Hanɗa a vrak na mu siŋni pini labarni na pɗem ɗa.

¹¹A zi gama ɗa na ɓa, girna ɗai na maafanai e hili e fiɗi ɗif na tini war seŋ na meefeŋ kai ahani, amlai midini lini pra ɗa. Aga mu zilba felni tiɗi kai ɗi! Mu vidiɗi edi midiɗi yai par kai ɗi!

¹²David a sa futi wiiɗi ɗai buri e fiɗiɗi edi, e ɗûkli tiɗi gaini eziɗi edi daf daf. E higiɗi sini luwuŋ ɵimani avai na Hebron. Asakal par e tiki humokni Isboset ɗa, e piŋ war waŋ na wiini Abner a Hebron.