Read Mousgoum 2 Samuwel 5 Bible Online

2 Samuwel 5 - Mousgoum bible

2 Samuwel 5

¹Nɵa pinziba na Izrayel ɗa, e hilisi sini David a Hebron e miɗini: Tiyi mi ɗi keɵkeku, mi ɗi neŋ suku lai.

²Haa avut par sini mefeŋ na Sawul a na aŋ pai kaw ɗa, ku kiɗi aliɗi Izrayel aŋ hatam ku tuku, ku wiyiɗisi aha ku tuku lai. EPIƊ-ƊAI a muɗuku ya lai ɓa aga ku ɵa wuzaɗi Izrayel na ɗaini ku tuku, aga ku za aŋ pai midiɗi Izrayel ɗa ku tuku.

³N'abakai n’arbaɗi ɗai na Izrayel e hilisi sini pai a Hebron, pai David a za bonu gaiɗi wuzani EPIƊ-ƊAI a Hebron, e viriŋ aŋ pai midiɗi Izrayel.

⁴David a suma pai sek ɗa buzani doogo doogo hu, a buza warɗi pai buza doogo doogo puɗu.

⁵A za buza a Hebron buza muguzak gaini tile ɵaara aŋ pai midiɗi Yuda, a za buza warɗi Yeruzalem doogo doogo hu pi hu aŋ pai midiɗi Izrayel gaiɗi Yuda paŋ lai.

⁶Pai David gaiɗi ɗaini e hitimiti Yeruzalem. E hitimi gaiɗi Yebuzitekai n’e ɗa woni ɗa, buri nagai e miɗini wiini David ɓa, aga ku tikiti Yeruzalem ɗa kai, ɗai na malva nai gaiɗi na daŋalaŋai maa e kuɗuku ta.

⁷David a tika hlai na gaini ɵaga sini na Siyon ɗa. Hlai ni ɗa, e bindi yikini ɓa fuŋ n’abai na wiini David.

⁸War mefeŋ ni ɗa David a muɗa, asiya ɗi paŋ n’a firiya a fuɗa ɗif na Yebus par, sai a vugasi mini hlai zi ki yem n’a na azumai pini afti ɗaw ɗa par. Ɗai nagai na danlaŋai gaiɗi na malva nai lai ɗa David a firyiɗi kai. A hina aŋ seŋ zi miɗi su ɓa: Ɗif na daŋelaŋ gaini zi melveŋ aga e niyi amlai warni tempel na wiini EPIƊ-ƊAI kai.

⁹David a sumna war hlai na gaini ɵaga sini ɗa, a sini yiki ɓa: Fuŋ n’abai na wiini David. Asakal par David a rga hlai zamai zamai edi par sini, sini huduk n’e ŋiɗiŋ amai, na yikini ɓa: Millo par arni aha sek.

¹⁰David a riya amai wuzani sek sek war spak, buri Epiɗ-ɗai Alaw zi spak paŋ a nafu gaini.

¹¹Hiram pai na Tirus a ɵinasi ɗai sini David gaini luwuŋ Sedre, ɗai zi kilɗi luwuŋ gaiɗi zi gɵi ali-fuŋ lai kapai e rgini dalam zi pai wiini David.

¹²Nɵa a yima midini David ɓa, EPIƊ-ƊAI a varaŋ aŋ pai midiɗi Izrayel, a siɗi spak wiiɗi paini buriɗi Izrayel na ɗaini.

¹³David a mula falakai zamai aha lai, zamai edi par ca ca lai, viya a Yeruzalem, hlai n’a halasi a Hebron par ɗa a wa ali na maɵagai gaiɗi na falakai viya.

¹⁴Yikiɗi a na maini nɵa: Samuwa, Sobah, Natan, Salmun,

¹⁵Yibar, Elisuwa, Nefeg Yaviya.

¹⁶Elisama, Eliyada gaini Elifelet lai.

¹⁷Filistrekai e ɵini ɓa e tiki David aŋ pai ta ɗa, gaini hlaiɗi paŋ e hili aŋ hitimiŋ kapai e yimiŋ. David a ɵina hanɗa a ŋoya war hlai zi ŋoyai na gaini ɵaga sini ɗa.

¹⁸Filistrekai e hilisi e pisi war huduk na wiiɗi Refaiitekai par tiɓ.

¹⁹David a zilba diri na wiini EPIƊ-ƊAI a muɗa: Mu kiɗa aŋ hala aŋ hitimiɗi Filistrekai ɗi? Aga ku siɗi war ta ɗi? EPIƊ-ƊAI a wiyini seŋ wiini David: Nkam hala aga mu siɗi war tuku.

²⁰David a hala a Baal-Perasin, woni a rɗa amai midiɗi Filistrekai, a muɗa: EPIƊ-ƊAI a ɓasaŋa baŋa arbaɗi gawŋa maini baŋa na yem a ɓasaŋ arni daŋ ɗa nɵa, nɵa e sini yiki wiini hlai hanɗa ɓa Baal-Perasin a dara a muɗa: Epin-gezani baŋa.

²¹E hini ka alawai zi rgi na wiiɗi woni, David gaiɗi ɗaini e miliŋsi.

²²Filistrekai e wiyisi azi n’ag'aŋ sulu pra, e pi war huduk na wiiɗi Refaiitekai tiɓ pra.

²³David a zilba dirini EPIƊ-ƊAI pra, EPIƊ-ƊAI a miɗini: Ku hitimiɗiɗi arɗi par kai, bundasi duɓaɗi par, ku luɓasi midiɗi midini luwuŋ n’e yikiŋ ɓa: Mukukuliye ɗa tar.

²⁴Won hlai na ku ɵina li ezini ɗif amai merfeŋni Mukukuliye ɗa, ku purma witaw tar. Buri ɓa a hlai na ta EPIƊ-ƊAI aga mu ɵa wuzaku aŋ fiɗiɗi askarai na Filistrekai woni ɗa.

²⁵David a za maini n’EPIƊ-ƊAI a miɗiŋni ɵa, a rɗa amai midiɗi Filistrekai ɗa a Geba par haa aha miɗi Gezer ta.