Read Mousgoum 2 Samuwel 6 Bible Online

2 Samuwel 6 - Mousgoum bible

2 Samuwel 6

¹David a tipiɗi askarai na Izrayel na tiɗi a pa edi kai ɗa pra, e zi paŋ dubu doogo doogo hu.

²A hala gaiɗi ɗai hanɗa a Baale-Yuda par kapai e tikisi Zunduk na wiini Alaw. Zunduk na yikini EPIƊ-ƊAI zi spak paŋ, n’a sumna amai midiɗi Kerubimkai aŋ midini.

³E tiki Zunduk na wiini Alaw ɗa midini Saret na hehe ta, e tikiŋsi ahani Abinadab par amai midini hlai na boŋor par. Uzza gaini Ahiyo n’alini Abinadab e ɵi wuzani Saret na hehe ɗa.

⁴E hilisi gaini ahani Abinadab par amai midini hlai na boŋor gaini zunduk na wiini Alaw warni ta, Ahiyo a ɵa wuzani su.

⁵David gaiɗi aliɗi Izrayel ɗa paŋ e siŋki firyiɗi edi wuzani EPIƊ-ƊAI gaini wazagai n’e zini yama gaini zi luwuŋ Sipre maini: gaŋgraŋ, adill, gaŋga, goŋzomai gaini kawai n’a wa lai.

⁶E cûsi sini luluf na wiini Nakon ta ɗa, ezini ɵaakai a sirɓa, Zunduk na wiini Alaw a firiya a kɵa, nɵa Uzza a wa tini aŋ cakaŋ amai.

⁷Nɵa EPIƊ-ƊAI a faka gaini hiy sini Uzza, a fuɗaŋ edi warni hlai ni ɗa burini sda zi dûûli n’a zaŋ ɗa. A mra woni, ɵimani Zunduk na wiini Alaw ɗa su.

⁸David a za hiy buri EPIƊ-ƊAI a mala baŋa gaini fiɗini Uzza. E sini yiki wiini hlai hanɗa ɓa: Peres Uzza, yiki ni ɗa a hina ɵa haa girna.

⁹War mefeŋ ni ɗa, David hunai te yimaŋ wuzani EPIƊ-ƊAI a muɗa: kapai Zunduk na wiini EPIƊ-ƊAI a sumna ahaya maɵa maɵa?

¹⁰David a firiya a sogosi Zunduk na wiini EPIƊ-ƊAI ahani war fuŋ n’abai na wiini David ɗa kir kai, a kaŋ ahani Obed-Edom na Gittite ɗa ta.

¹¹Zunduk na wiini EPIƊ-ƊAI a hina ahani Obed-Edom ɵa ta haa tile hu. EPIƊ-ƊAI a ɓaka Obed-Edom gaini dalamni paŋ.

¹²Ɗai e hilisi e miɗini wiini pai David: EPIƊ-ƊAI a ɓaka dalamni Obed-Edom gaini wazagaini paŋ buri Zunduk na wiini Alaw ɗa. Nɵa David a hala a zogosi Zunduk na wiini Alaw ahani Obed-Edom par aha war fuŋ n’abai na wiini David sek war firiyi.

¹³Won hlai na ɗai n’e libi Zunduk na wiini EPIƊ-ƊAI e ŋi eziɗi ɵaara tar ɗa David a za ɓaka gaini gari n’abai ktai, ahi ɵeŋ na nur nur ktai lai.

¹⁴David a dedema wuzani EPIƊ-ƊAI gaini gdaŋni paŋ. A rga wuzani gaini sapa zi leŋ na wiiɗi paakai zi ɓaka n’e yikiŋ ɓa Efod.

¹⁵David gaiɗi ɗai na Izrayel ɗa paŋ e libi Zunduk na wiini EPIƊ-ƊAI a Yeruzalem gaini leŋi leŋi gaini fana.

¹⁶Won hlai na Zunduk na wiini EPIƊ-ƊAI a ŋa gobi aŋ niya aha war fuŋ n’abai na wiini David ɗa, Mikal n’ahini Sawul te wasi wulaɗi arni fenetir te tala pai David a na pra amai, a dedema lai wuzani EPIƊ-ƊAI, te miisaŋ warɗi agulɗi.

¹⁷E ki Zunduk na wiini EPIƊ-ƊAI ɗa amlai, e tikiŋ war hlai n’e ziziniŋ burini, amlai war gumu na David a zizinaŋ burini ta. David a za ɓaka zi yi gaini ɓaka zi ɵeɗ wuzani EPIƊ-ƊAI.

¹⁸Won hlai na David a vada li gaini ɓaka zi yi gaini ɓaka zi ɵeɗ lai ɗa, a ɓikiɗi ɗai war yikini EPIƊ-ƊAI, Alaw zi spak paŋ.

¹⁹Asakal par a ɓurwiiɗi wala zi simi wiini faraɗi ɗai na Izrayel paŋ, wus kai, muni kai, ɗif paŋ a nava gamla ktai ktai, lagiya zi tumur ktai, lagiya z'alini luwuŋ zi vin na hûleŋ ktai lai. Asakal par ɗai e ɵiri, ɗif paŋ a waya ahani ahani.

²⁰David a hala aha aŋ ɵiɓa wuti wiini dalamni. Mikal n’ahini Sawul te halasi mini te miɗini: Pai na Izrayel, girna ku nava kol li koo, sapa kaw paɵaku kai arbaɗi bagakai na maɵagai gaiɗi na falakai blaŋ maini ɗif na nafani kai ɵa lai ɗa

²¹David a wiyiɗi seŋ wiiɗi Mikal: Mu dedema na ɗa wuzani EPIƊ-ƊAI n’a varaŋa, n’a daraŋa a suwa apuku gaiɗi pinzibani paŋ kapai a tikaŋa aŋ pai midiɗi Izrayel na ɗaini ɗa. Mu siŋka firyiŋa na ɗa wuzani.

²²Aga mu hosa sa azumai a suwa pra, haa ta dama mu sɗa sa ɓa mu ɓa hormoŋa edi ta. Amma arɗi bagakai na falakai na ku muɗa gaiɗi na ɗa, aga mu nava kol.

²³Mikal n’ahini Sawul te wa ahi kai haa te mra ɵa.