Read Mousgoum 2 Samuwel 7 Bible Online

2 Samuwel 7 - Mousgoum bible

2 Samuwel 7

¹Won hlai na pai a sumna li aha war dalamni zi pai, Won hlai n’EPIƊ-ƊAI a sini simni na ɵeɗ li gaiɗi gawni na ɵimani lai ɗa,

²mefeŋ ktai, pai a miɗini wiini ɗif na mini Alaw Natan maini nɵa: Tala, ta mu sumna amlai warɗi dilimi zi luwuŋ Sedre, amma Zunduk na wiini Alaw ɗa a na amlai war gumu zi sapa koo.

³Natan a wiyini seŋ wiini pai: Ku hiina wala na pɗem, hala za hanɗa, EPIƊ-ƊAI a na gaiku.

⁴Amma war duvuk hanɗa EPIƊ-ƊAI a miɗini wiini Natan maini nɵa:

⁵Hala miɗini wiini David na ɵeŋŋa ɓa EPIƊ-ƊAI a na muɗa maini nɵa: Ku rgaŋa tempel na mu sumna warni ku tuku kai.

⁶Haa sini mefeŋ na mu miliɗisi aliɗi Izrayel edi war Egipte par haa girna, hlai zi simni na wiya ɗa a gumu ɵa.

⁷Mefeŋ na mu zaŋ gaiɗi aliɗi Izrayel na ta na ɗa, mu miɗini ka wiini pinziba ktai na war Izrayel na mu varaŋ aŋ ɵa wuzaɗi ɗaiŋa na Izrayel ɗa ɓa: ku rgaŋa dalam zi luwuŋ Sedre kai buri maɗi ɗi?

⁸Tiyana aga ku miɗini wiini David na ɵeŋŋa ɓa Epiɗ-ɗai Alaw zi spak paŋ a na muɗa maini nɵa: Mu yumukusi edi war hlai zi simi farai par, pini adumaiku par ɓa kapai ku bunda aŋ pai midiɗi Izrayel na ɗaiŋa.

⁹Mu nafu gaiku woɗi paŋ na ku hala paŋ, mu vidiɗi gawku edi wuzaku, mu bunda yikuku a wa gara maiɗi ɗai n’abakai na midini afti ɗa ɵa.

¹⁰Aga mu siɗi hlai wiiɗi ɗaiŋa na Izrayel ta, mu miliɗi warni sa, e hini warni ɵa. Ɗif aga a migiziɗi kir kai, ɗai na maafanai aga e ziɗi gir maini na avut par,

¹¹maini na war mefeŋ na mu miliɗi gaŋgalaŋai midiɗi ɗaiŋa na Izrayel nɵa kir kai. Mu suku simni na ɵeɗ gaiɗi gawku paŋ. Mu zuku zaida na ɓa: Ta EPIƊ-ƊAI aga mu muluku fuŋ.

¹²Won hlai na mefeŋku a vada li, ku mra li, e puku li, ku hala li gaiɗi tamaiku ɗa, aga mu sa rɗi n’amai wiini ktai arbaɗi ali na warku par, aga mu sini spak aŋ ŋa gaini.

¹³Aga a rgaŋa tempel ɗa a ni, aga mu ɗiyiti paramaini zi pai gdaŋ haa kureɗ.

¹⁴Aga mu bunda aŋ epini, ni aga a bunda aŋ ahiya lai. Na ɓa a za meefeŋ li aga mu ɵeɓaŋ gaini amaraŋa maini api n’a ɵiɓa ahini nɵa.

¹⁵Amma pɗem n’arba gaini ɗa aga mu ɗiyaŋ ta maini na mu zaŋ sini Sawul wuzaku par ɵa kai.

¹⁶Asakalku tuku par, pai aga te suma war pinzibaku ɵa, paiku aga te muguza kaalai.

¹⁷Natan a miɗini seŋ n’EPIƊ-ƊAI a miɗiŋni gaini wala n’a siŋkiŋni arni wiini David.

¹⁸Pai David a halasi a sumna wuzani EPIƊ-ƊAI a muɗa: ALAW EPIƊ-ƊAI, ta mu siya ktai ɗa? Pinzibaŋa ɗa a na wa lai ɗa, na kapai ku zaŋa aŋ ɗif na maini na nɵa ɗa.

¹⁹A ni ta kai ALAW EPIƊ-ƊAI, pra ku za ɵinini-ha sini pinzibaŋa na asakala sek gaigai, ɗif ɗa e ziŋ ɵa lai ɗi, ALAW EPIƊ-ƊAI!

²⁰Ta David mu muɗuku zamai ɗa a ma! tuku ku sɗaŋa ya koo, ALAW EPIƊ-ƊAI.

²¹Ku va wazagai n’abakai na ku muɗa midini hanɗa amai, ku siŋkaŋŋa ara lai ɗa pini miɗi na ku muɗaŋ gaini diri na ku daraŋa lai.

²²ALAW EPIƊ-ƊAI, ku suwa abai gara, maiku muku kai, Alaw zamai aŋ kir kai sai ku tuku ktai, pini na mi ɵiniŋ gaini ɵemaii ɗa.

²³Pinziba ktai n’aŋ midini afti n’a kata gaiɗi Izrayel na ɗaiku nɵa a na ɗi? Pinziba n’Alaw na wiini a hala a plaŋsi edi tiɗi gawni par kapai a zaŋ aŋ pinziba na wiini, n’a hina yikini a wa gara lai a na ɗi? Tuku ku za wazagai n’abakai n’a bunda ɗif hiyak burini aftiku, wuzani arɗi ɗaiku. Na ku piliɗisi edi war Egipte par tini pinziba hanɗa gaini alawai na wiini par lai.

²⁴Ku bindiɗi ɗai na Izrayel aŋ ɗaiku gamai, tuku EPIƊ-ƊAI ɗe ku bunda aŋ Alaw na wiiɗi lai.

²⁵Tiyana ɗa, ALAW EPIƊ-ƊAI, ɵinini-ha na ku zaŋ wiya ta ɵeŋku gaini pinzibaŋa ɗa, ku hina muduku a wula gaini kai zaŋ, za maini na ku muɗaŋ ɗa nɵa.

²⁶Nɵa yikuku aga a wa haa kureɗ, ɗai aga e miɗi lai ɓa: Alaw zi spak paŋ ɗa a Alaw na wiiɗi Izrayel ɗa. Giɗimiti pai na ku sitini wiini pinzibaŋa ta na ɵeŋku ɗa haa kureɗ.

²⁷Ta ɵeŋku mu nava gdaŋ aŋ siiwuku maini hanɗa nɵa buri ɓa tuku dama EPIƊ-ƊAI zi spak paŋ, Alaw na wiiɗi Izrayel, ku muɗaŋa wiya ta ɓa: Aga ku mulaŋa fuŋ.

²⁸Tiyana ɗa, ALAW EPIƊ-ƊAI, Alaw ku tuku, tuku ku za eles kai, ku muɗaŋa seŋ na pɗem hanɗa li.

²⁹Tiyana ɗa, ɓikiɗi pinzibaŋa ta na ɵeŋku ta, kapai e ŋi kureɗ wuzani arku, buri ɓa ku muɗa ku tuku Epiɗ-ɗai Alaw, Won hlai na ku ɓaka pinzibaŋa ta na ɵeŋku li ɗa, ɓiki hanɗa aga a sumna miɗiki haa kureɗ.