Read Mousgoum 2 Samuwel 8 Bible Online

2 Samuwel 8 - Mousgoum bible

2 Samuwel 8

¹Asakal hanɗa par, David a rɗa amai midiɗi Filistrekai, a hiɗiɗisi azumai. David a vada spakɗi na midini afti na Izrayel ɗa edi.

²A rɗa amai midiɗi ɗai na Mowab, a miɗiɗi azumai midini afti meɗ meɗ, a mula sogom yaw a kataŋ, a yima sogom kaai kaai sulu, ɗai na warni ɗa a fiɗiɗi edi, a yima zamai kai, ɗai na warni ɗa e hini karɗi. Asakal par ɗai na Mowab e bindi aŋ ɗai na pini David, e sini tar lai.

³David a rɗa amai midini Hadadezer n’ahini Rehob pai na Soba, hlai n’a waisi aŋ tika afti na ɵimani ra na Öfrata par ɗa.

⁴David a mula plasai zi gidiyi Saret pini par dubu gaini miya muguzak, a mula askarai pini par dubu caaɓa lai. David a ɗukla ezini plasai n’a gidiya saret ɗa kafa, amma a hina zamai pini miya ɗaw aŋ wiini.

⁵Ɗai na Siriya na war Damas e liwiini ɗuwal wiini Hadadezer pai na Soba. Amma David a fuɗa ɗai piɗi dubu caaɓa pi sulu.

⁶David a mula lawanai midini afti na Siriya ca ca, ɗai na Siriya e bindi aŋ ɗai na pini, a tikiɗi tar midiɗi lai. EPIƊ-ƊAI a sini rɗi n’amai wiini David war hlai n’a hala woni paŋ.

⁷David a mula gulon zi or n’a naka tiɗi ɗai na wiini Hadadezer ɗa a kaŋ war Yeruzalem.

⁸Pai David a mulasi kiya viya aha war Beta gaiɗi Berotai, fuŋ n’abakai na wiini Hadadezer ɗa par.

⁹Toy pai na Hamat a ɵina ɓa David a rɗa amai midiɗi askarai na wiini Hadadezer ɗa.

¹⁰Nɵa a ɵina Yoram n’ahini sini pai David aŋ zini wuti buri rɗini n’amai war hatam na gaini Hadadezer ɗa, buri ɓa Hadadezer a nafu aŋ gawni. Yoram a kiini wazagai zi arzaŋ, zi or gaini zi kiya lai.

¹¹Wazagai hanɗa lai pai David a siŋni wiini EPIƊ-ƊAI, maini n’a zaŋ gaini or gaini arzaŋ na ɗai n’a rɗa amai midiɗi e kiŋsi ɗa nɵa, pinziba n’a rɗa amai midiɗi e ɗi hanɗa:

¹²Edomitekai, Muwabitekai, Ammonitekai, Filistrekai gaiɗi amalitekai lai. A za gaini wazagai na e miliŋsi mini gaw tini Hadadezer n’ahini Rehob pai na Soba par zila lai;

¹³Asakal na David a rɗa amai midiɗi ɗai na Siriya war huduk zi Manta, n’a fuɗa ɗai e zi dubu doogo pi mitwis ɗa, yikini a tika pini a wa gara

¹⁴A mula lawanai midini afti na Edom paŋ ca ca, midini afti na Edom paŋ a mula lawanai ca ca. Ɗai na Edom e hini azumai pini David. EPIƊ-ƊAI a sini rɗi n’amai wiini Davd, war hlai n’a hala warni paŋ.

¹⁵David a suma pai midiɗi Izrayel gaiɗi hlaiɗi paŋ. A ziti sariya wiiɗi ɗaini war jre, a ɗiya midini gadai zi ɗû lai.

¹⁶Yowab n’ahiɗi Seruya ɗa a abaiɗi askarai na wiini David, Yehosafat n’ahini Ahilud ɗa a mini pai,

¹⁷Sadok n’ahini Ahituɓ gaini Ahimelek n’ahini Abiyatar ɗa e ɗi paakai zi ɓaka, Seraya ɗa a sekreter,

¹⁸Benaia n’ahini Yehoyada a abaiɗi kretekai gaiɗi Peletekai n’e giɗimi pai ɗa, alini David ɗa e ɗi paakai zi ɓaka lai.