Read Mousgoum Lokwita n’avut na wiiɗi paakai 11 Bible Online

Lokwita n’avut na wiiɗi paakai 11 - Mousgoum bible

Lokwita n’avut na wiiɗi paakai 11

¹Pai Salmun a mula falakai na war pinziba zamai par viya, asakal ahini pai n’Egipte par, a mula falakai na Muwabitekai, Ammonitekai, Edomitekai, Sidoniyakai gaiɗi na Hettitekai lai.

²E ɗi falakai na war pinziba n’EPIƊ-ƊAI a miɗiɗi wiiɗi aliɗi Izrayel gaini ɓa: ki tipi gaiɗi kai, ki hiniɗi e tipi gaiki kaalai, ɵa kai ɗa aga e bindi hiiniki sini alawai na wiiɗi ɗa, amma Salmun ɗa a tapa gaini pinziba ni mal tar, buri a firyiɗi falakai na war pinziba ni ɗa ta.

³Falakaini pai Salmun n’aha ca ca ɗa miya muguzak, n’edi ca ca miya hu lai. Falakaini ɗa e bindini hiini edi sini Alaw na wiini par.

⁴War sarti na Salmun a za li wel, falakaini ɗa e bindi hiinini sini alawai zamai, nɵa hiinini na midini Alaw na wiini a nafu ktai maini na wiini David n’epini ɗa nɵa kai.

⁵Salmun a hurga azumai wuzaɗi Astarte, alaw na muni na wiiɗi ɗai na Sidoniyakai, gaini Milkom alaw na hi-hir na wiiɗi Ammonitekai.

⁶Salmun a za wala na meefeŋ arni EPIƊ-ƊAI, a tikiti futi na wiini EPIƊ-ƊAI war jre maini David n’epini nɵa kai.

⁷War sarti ni ɗa, Salmun a rga hlai ktai zi ɓaka wiini Kemos alaw na hi-hir na wiiɗi Muwabitekai gaini Milkom alaw na hi-hir na wiiɗi Ammonitekai lai, a rgaŋ amai midiɗi huwuŋ na te na wuzaɗi Yeruzalem ɗa.

⁸A rga hlai zi ɓaka buriɗi alawai na wiiɗi falakaini n’edi par na zamai ɗa paŋ lai, kapai e yi wala zi ɗûgûdi zi lûgûzi woni, e zi ɓaka wiiɗi alawai na wiiɗi woni lai.

⁹EPIƊ-ƊAI a za hiy sini Salmun ta, buri ɓa Salmun ɗa a bunda hiinini sini alawai na zamai, paŋ ktai ni Alaw na wiiɗi Izrayel ɗa a siŋka sini arni maa haa azi sulu.

¹⁰A miɗini edi gaglai lai ɓa a yima pini alaw zamai kai sai pini Ni. Amma Salmun a za pini miɗi n’EPIƊ-ƊAI a miɗiŋni kai.

¹¹Nɵa EPIƊ-ƊAI a miɗini wiini Salmun: payaiku ɗa a bunda pla, bonu na mu zaŋ gaiku ɗa ku na za pini kir kai, gadai zi ɗû na mu suŋku ɗe ku na za pini kir kaalai. Tiyana ɗa aga mu tikiti pai edi tuku par, mu sitini wiini ktai arbaɗi ɗaiku zi sda.

¹²Amma aga mu za hanɗa suku tuku tar kai burini David n’apuku, aga mu tikiti edi tini ahiku par.

¹³Amma aga mu tika aftiku gaini hlaini kai, aga mu hinini afti na wiini pinziba ktai wiini ahiku burini David na ɵeŋŋa, buriɗi Yeruzalem na mu viriti lai.

¹⁴EPIƊ-ƊAI a faka ɗif ktai amai sini Salmun, yikini ɓa: Hadad a na war pinzibani Edom war pinzibaɗi pai lai.

¹⁵Wala hanɗa a za war mefeŋ na David a naka a hitima gaiɗi Edom ɗa, won hlai ni Yowab abaiɗi askarai na wiini, a fiɗiɗi aliɗi Edom na maɵagai paŋ edi, hlai n’a hala aŋ piɗi askarai na Izrayel n’e mri mini hatam ɗa.

¹⁶Yowab gaiɗi askarai na pini ɗa, e simni woni haa tile ɵaara, haa e vidiɗi aliɗi Edom na maɵagai ɗa edi kafa.

¹⁷Hadad a nafu agwi, a pra edi gaiɗi ɗai na Edom n’e dika aŋ ɗai zi sda na wiini epini, a hala war Egipte.

¹⁸E hili midini afti na Madiyaŋ par, e cû war basga na kaɗataŋ na Paran, e miliɗi ɗai zamai na Paran par piɗi, e cû war Egipte sini Faraw pai n’Egipte, pai a sini Dalam wiini Hadad, a tika gumani simini ɗa, a sini hlai zi simni lai.

¹⁹Faraw a nafu gaini Hadad pɗem, a sitini tawalɗi Tapnes na munini aŋ muni.

²⁰Tawalɗi Tapnes te wiini ahi wiini Hadad ktai yikini ɓa Genubat, Tapnes te yimaŋ gaiɗi, a wula ahani Faraw arbaɗi alini Faraw.

²¹Won hlai na aha war Egipte par Hadad a ɵina ɓa David a tapa li gaiɗi tamaini, Yowab n’abaiɗi askarai a mra su lai ɗa, a midini wiini Faraw: hinaŋa mu waya aha midini aftiŋa.

²²Faraw a midini: wala n’a na zuku aŋ gir ɗa a maɗa na kapai tizaw tar ku paya aŋ waya aha midini aftiku ɗa? Wala ktai n’a na zaŋa aŋ gir aŋ kai sme, kawɗi ɗa, mu waya fu aha ɵa.

²³Alaw a fakasi ɗif zamai ktai amai sini Salmun yikini ɓa Rezon, a ahani Eliyada. A prasi edi ahani epin-gezani na yikini ɓa Hadadezer pai na Soba par.

²⁴A tapa ɗai pini, a bunda aŋ abaiɗi. David a tika pini a fiɗiɗi nɵa e pri edi war Damas e simni woni haa a suma pai woni.

²⁵Reson a hina aŋ gawɗi Izrayel ɵa haa sini mrini Salmun ta maini Hadad nɵa. Hlai n’a naka aŋ pai midiɗi Siriya ɗa a firiyiti Izrayel kai.

²⁶Yerobowam n’ahini Nebat, a nafu a ɵeŋ na wiini pai Salmun, a na war pinzibani Efrayim, midini afti na Sereda par. Emini yikiɗi ɓa Seruya, te muni na war greŋ, Yerobowam a faka amai sini pai.

²⁷Yerobowam a faka amai sini ɗa war mefeŋ na Salmun a nafu aŋ luba huduk n’arbani mini tempel gaini fuŋ n’abai na wiini David, n’e siɗi yiki ɓa Millo ɗa amai, hlai n’a nafu a na rga baŋa n’arɗi zilaagai na sini fuŋ n’abai na wiini David n’epini ɗa amai ɗa lai.

²⁸Yerobowam ni ɗa, a nafu a ɗif na gdaŋ na agulni a huna kai, a tala gawla hanɗa sini sdani n’a zaŋ ɗa, a tikaŋ aŋ abai midiɗi ɗai n’e zi sda zi dewele na war pinziba na wiini Efrayim gaini Manase ɗa.

²⁹War sarti ni ɗa, Yerobowam a niya edi war Yeruzalem par, ɗif na mini Alaw Ahiyya na Silo par a nava gaini war futi, kaput na hehe sini su, e ɗifu edi war baŋa kiiɗi sulu.

³⁰Ahiyya a yima kaput na hehe na sini su ɗa, a ɓasaŋ edi agogoi agogoi doogo pi sulu.

³¹Asakal par a miɗini wiini Yerobowam: mula pini doogo buri Epiɗ-ɗai Alaw na wiiɗi Izrayel a na muɗa maini nɵa: tala, mu firiya mu tikiti pai edi tini Salmun par, aga mu suku pinziba doogo.

³²Aga mu hinini pinziba pini ktai, hanɗa maa buri David na ɵeŋŋa gaiɗi Yeruzalem fuŋ n’abai na mu varaŋ arbani fuŋ n’abakai na war Izrayel paŋ ɗa lai.

³³Aga mu za nɵa buri e hiniŋa edi mak, e hûrgi azumai wuzani Astarte alaw na muni na wiiɗi Sidoniyakai, wuzani Kemos alaw na wiiɗi Muwabitekai gaini Milkom alaw na wiiɗi Ammonitekai lai. E tikiti futi na mu siŋkitiɗi kai, e zi wazagai na maafanai wuzani ara, e zi pini gaddai zi ɗû gaini gadai zi ɗiyi na wiya maini David n’epini Salmun ɗa nɵa kai.

³⁴Tini Salmun par ɗa, aga mu tikiti pai edi kai, buri ɓa mu tikaŋ aŋ pai ɗa ɓa kapai a ŋa haa sini mrini ta, hanɗa buri David na ɵeŋŋa na mu varaŋ, n’a za pini gadaiŋa na gaini gadai zi ɗiyi na wiya lai ɗa.

³⁵Amma aga mu tikiti pai edi tini ahini par, mu suku wiiku tuku pinziba doogo.

³⁶Wiini ahini ɗa, aga mu sini pinziba pini ktai, kapai kureɗ ktai arbaɗi pinziba na wiini David na ɵeŋŋa ɗa a ŋa wuzani ara aha warɗi Yeruzalem fuŋ n’abai na mu varaŋ kapai mu sumna warni.

³⁷Tuku Yerobowam, aga mu tukuku, aga ku ŋa aŋ pai woɗi paŋ na ku dara, midini pinziba na doogo na wiiɗi Izrayel ɗa.

³⁸Na ɓa ku za pini wazagai na mu muɗuku gaini paŋ, na ɓa ku tikiti futi na mu suŋkutuku, na ɓa ku za wala na jre wuzani ara, ku za pini gadai zi ɗû gaini gadai na wiya lai maini na David ɵeŋ na wiya a zaŋ ɗa nɵa, aga mu za gaiku, aga mu sutuku pai na wala a kiɗa a gigiɗiti kai maini na mu sitini wiini David ɗa nɵa, aga mu suku pinzibaɗi Izrayel na doogo ɗa.

³⁹Aga mu tikini siyer wiini pinzibani David ɗa, amma a hina ɵa gamai kai.

⁴⁰Salmun a paya futi buri a fuɗa Yerobowam edi, Yerobowam a pra edi war Egpite sini Sishak pai n’Egipte a hina woni ɵaa haa sini mrini Salmun.

⁴¹Labar zamai na midini Salmun, sdani n’a zaŋ ɗa paŋ gaini yelni lai aŋ gaini ɗû war maktuɓ na wiini sda na wiini Salmun kai ɗi?

⁴²Pai Salmun a ŋa midiɗi Izrayel gaini hlaiɗi kafa, buza doogo doogo puɗu aha warɗi Yeruzalem.

⁴³Asakal par Salmun a hala gaiɗi tamaini, e piŋ war fuŋ n’abai na wiini David n’epini, Robowam n’ahini a suma pai war balamni.