Read Mousgoum Lokwita n’avut na wiiɗi paakai 12 Bible Online

Lokwita n’avut na wiiɗi paakai 12 - Mousgoum bible

Lokwita n’avut na wiiɗi paakai 12

¹Robowam a hala a Sikem buri ɓa pinzibaɗi Izrayel na doogo e hilisi e ɗi woni kapai e tikiŋ aŋ pai.

²Amma Yerobowam n’ahini Nebat a ɵinasi labar hanɗa hlai n’aŋsi edi war Egipte, buri a pra edi woni wuzani pai Salmun, a sumnasi edi woni lai.

³Ɗai e ɵini pini Yerobowam, a halasi gaiɗi pinzibaɗi Izrayel na doogo paŋ, e miɗini wiini Robowam maini nɵa:

⁴apuku a yimiyi maiɗi bagakai ɵa, a tika sda zi gir midiyi lai, tiyana ɗa, na ɓa tuku ku ɵiyi smer li siyi agwi ɗa, aga mi hini aŋ ɗaiku ɵa.

⁵Robowam a wiyiɗi seŋ a muɗa: hili, ki zisi mefeŋ hu kapai ki wiyisi. Ɗai e hili wiiɗi.

⁶Pai Robowam a paya yel siɗi n’abakai n’e zika sda gaini Salmun n’epini par, a zilbiɗi: tiki ki firiyi ɓa mu wiyiɗi seŋ wiiɗi ɗai hanɗa ɓa maɵa ɗa?

⁷E wiyini seŋ ɓa: na ɓa girna ku ɵa suku li azumai siɗi su, na ɓa ku viɗi firyiɗi li amai, na ɓa ku miɗiɗi li seŋ na pɗem lai ɗa, aga e hini aŋ ɗaiku ɵa haa kureɗ.

⁸Amma Robowam a yima gadai na n’abakai e siŋni ɗa kai, a zilbiɗi marni n’e wili gaini n’e ɗa gaini war sda,

⁹a zilbiɗi: tiki ɗa ki miɗi maɵa lai ɗa, ki firiyi ɓa mi wuyuɗumu seŋ wiiɗi ɗai n’e hilisi e zilbiŋa ɓa mu ɵiɗi smer siɗi agwi, mu tika sda zi gir na apa a tikaŋ midiɗi edi agwi lai maɵa ɗa?

¹⁰Marni na gawlakai n’e wili gaini e wiyi seŋ ɓa: aga ku miɗiɗi wiiɗi ɗai n’e hilisi e muɗuku ɓa: apuku a tikiyi sda zi gir midiyi, amma tuku ku ɵiyi smer siyi agwi lai ɗa ɓa: ahi ta n’agwi ɗa, spakɗi a suwa graŋni apa ɗa.

¹¹Apa a tikiki gir miɗiki, tiyana par ɗa ta aga mu riya gir hanɗa amai, ni a ɵiɓiki gaini daɓala z'amur, ta mu ɵiɓiki gaini daɓala n’aŋ mini ɗa a kawai.

¹²Yerobowam gaiɗi ɗai na gaini paŋ e hilisi sini Robowam war mefeŋ n’ag'aŋ hu maini n’a miɗiɗi ɓa: e wiyisi sini war mefeŋ n’ag'aŋ hu ɗa nɵa.

¹³Pai Robowam a wiyiɗi seŋ wiiɗi ɗai gaini wûle na gdaŋ, a hina gadai na n’abakai e siŋni ɗa edi ta,

¹⁴A wiyiɗi seŋ gaini hiini na wiiɗi marni na gawlakai maini nɵa: apa a tikiki gir miɗiki, ta aga mu riya gir hanɗa amai, apa a ɵiɓiki gaini daɓala z'amur, ta aga mu ɵiɓiki gaini daɓala n’aŋ mini ɗa a kawai.

¹⁵Na ɓa pai ɗa a ɵina seŋ na wiiɗi ɗai kai ɗa, a wala n’a zaŋ ɗa a Alaw mal, kapai seŋ na EPIƊ-ƊAI a miɗiŋni wiini Yerobowam n’ahini Nebat war mini ɗif na mini Alaw Ahiyya na Silo par a va amai.

¹⁶Won hlai na pinzibaɗi Izrayel na doogo e tili ɓa pai a dara a ɵina seŋɗi kai ɗa, e wiyini seŋ e miɗi: arbaɗi na gaini David ɗa a maɗa? Wala ktai maa arbaɗi gaini ahini Isai hanɗa kai koo! Tumu Izrayel na war pinziba na doogo ɗa, wuyumu aha! tuku na war pinzibani David ɗa, za gaiɗi ɗai na war pinzibaku ɗa! wuyumu wiimu aha. Asakal par pinzibaɗi Izrayel na doogo ɗa e wiyi ahaɗi.

¹⁷E hini e siɗi Robowam aŋ pai ɗa e ɗi nagai n’e ɗa aŋ fuŋ midini afti na Yuda ɗa.

¹⁸Pai a ɵina Adoram abai na midini sda zi dewele siɗi pinziba na doogo ɗa, nagai e biliŋ gaini kriyit, e fiɗiŋ edi. Pai Robowam a niya amai midiɗi saretni aŋ lawa aha war Yeruzalem ciɗek ciɗek.

¹⁹Pinziba na doogo ɗa e ɓûrwi edi siɗi nagai na war gal n’amai sek ɗa arbaɗi a hina haa girna.

²⁰Won hlai n’aliɗi Izrayel na war pinziba na doogo e ɵini ɓa Yerobowam a wayasi aha ya, e ɵini pini e yikiŋsi war diŋgi na wiiɗi, e tikiŋ aŋ pai midiɗi; a hina pini pinziba na wiini David ɗa a pinziba na wiini Yuda tar.

²¹Won hlai na Robowam a cosi aha a Yeruzalem tar a tipiɗi pinzibani Yuda gaini Benyamin lai, a nava askarai zi hatam dubu miya gaini doogo doogo mitwis, kapai e hili e hitimi gaiɗi pinziba na doogo, e wiyiɗisi amlai pini pai Robowam n’ahini Salmun.

²²Amma EPIƊ-ƊAI a miɗini wiini Semaya ɗif na mini Alaw maini nɵa:

²³hala ku miɗini Robowam n’ahini Salmun pai na Yuda, ɗai na Yuda paŋ, na Benyamin paŋ gaiɗi ɗai zamai n’e hini lai ɓa:

²⁴EPIƊ-ƊAI a na muɗa maini nɵa: ki hili ki hitimiɗi tawalakaiki kai, asiya ɗi paŋ a waya aha, buri seŋ hanɗa mu zaŋ muta. E yimi seŋ na wiini EPIƊ-ƊAI, e hini hatam na gaini Yerobowam ɗa mak.

²⁵Yerobowam a rgiti Sikem amai, amai midini hlai zi huwuŋ na wiini Efrayim, a sumna warɗi lai. Asakal par a zogo woni par a hala a rgiti Penuwel amai.

²⁶Pai Yerobowam a hiina a muɗa: hlai mu talaŋ na ɗa, pai te kiɗa te waya sini pinzibani David sike,

²⁷na ɓa ɗai hanɗa, e ɗa e hili amai a Yeruzalem aŋ zi ɓaka amlai war Dalam na wiini EPIƊ-ƊAI ɵa yaw ɗa, hiiniɗi aga a waya pini epingezaɗi, Robowam pai na Yuda. Aga e fiɗiŋa edi su, e wiyi pini Robowam pai na Yuda wai lai kai.

²⁸Pai Yerobowam a hiina haa a rga ali garakai zi or sulu, a miɗiɗi wiiɗi ɗai na wiini ɓa: tiki ki hili amai a Yeruzalem ɗa a viya, ɵa ta. Tili, tiki na war pinziba na doogo ɗa, alawaiki n’e kûrɗikisi edi war Egipte par ɗa e ɗi na.

²⁹A ɗiya ktai ɗa a Betel zaw, na ktai ɗa a Dan zaw lai.

³⁰Hanɗa a tuwur na Yerobowam a zaŋ ɗa, ɗai e ziɓi pini ahini gari na ktai haa a Dan ta.

³¹Yerobowam a rga dalam n’e siiwi warni war hlai zi ɓaka ɗa, a mula ɗai arbani vok ɗa par a ziɗi aŋ paakai zi ɓaka, e ɗi ɗai na war pinzibani Levi par kaalai.

³²Yerobowam a ɗiyiti fet ktai war mefeŋ n’ag'aŋ doogo pi ɵim na wiini tile n’ag'aŋ mitwis, maiɗi fet n’e ɗa e ziti amai war Yuda ɗa nɵa, a za ɓaka midini gûwiŋ zi yi ɓaka ɗa a ni gaini midini, war Betel a za ɓaka wiini ali garakai n’a zizinaŋ ɗa, pra a miliɗi paakai zi ɓaka n’a viriɗi midini hlai zi ɓaka n’a zaŋ ta ta ɗa war sda.

³³War mefeŋ n’ag'aŋ doogo pi ɵim na wiini tile n’ag'aŋ mitwis, mefeŋ na Yerobowam dama a ɗiyaŋ pini hiinini, a ziti fet buriɗi pinziba na doogo ɗa, a za ɓaka midini gûwiŋ zi yi ɓaka n’a zizinaŋ ɗa a ni war suŋfani lai.