Read Mousgoum Lokwita n’avut na wiiɗi paakai 14 Bible Online

Lokwita n’avut na wiiɗi paakai 14 - Mousgoum bible

Lokwita n’avut na wiiɗi paakai 14

¹War mefeŋni ɗa Abiya n’ahini Yerobowam a kɵa veglek su,

²Yerobowam a miɗiɗi wiiɗi munini: faka amai, bunda sapa na suku pla kapai ɗif a sɗa ɓa ku muniya nɵa kai, asakal par ku hala a Silo. Ɗif na mini Alaw Ahiyya n’a muɗaŋa ɓa aga mu suma pai midini pinzibaɗi Izrayel na doogo ɗa aŋ woni aŋ fuŋ dam.

³Ku mula peŋ tuku doogo gaini gato, kuluŋi z'emelni amumi ɗaw lai, ku hala sini, aga a muɗuku midini wala n’aga a za sini arwagwi ɗa.

⁴Munini Yerobowam te za maini nɵa, te faka te hala a silo, te co ahani Ahiyya. Amma Ahiyya ɗa a za wel gara ta, arni a muguza kai tini wel, a tala kir kaalai.

⁵Amma EPIƊ-ƊAI a miɗinika wiini Ahiyya ta ɓa, munini Yerobowam t'aŋsi warɗi futi te na halasi suku, te firiya te zilbuku midini ahiɗi n’a na veglek. Aga ku wiyiɗi seŋ nɵa nɵa; hlai na te cosi li ɗa aga te za siɗi aŋ muni zamai.

⁶Won hlai n’Ahiyya a ɵina eziɗi mini hlai par tar a muɗa: niyasi amlai, munini Yerobowam, ku za suku aŋ muni zamai buri ma ɗa? Labar n’aŋ ma buriku ɗa a labar na meefeŋ.

⁷Hala miɗini wiini Yerobowam ɓa: Epiɗ-ɗai Alaw na wiiɗi Izrayel a na muɗa maini nɵa: ku naka maiɗi ɗai na doogo ɵa, mu vuruku, mu tukuku aŋ pai midiɗi ɗaiŋa na Izrayel,

⁸mu tikiti pai tini pinzibani David par mu sutuku, amma ku za maini David na ɵeŋŋa n’a za pini gadaiŋa, a ɵina pa gaiɗi agulni paŋ, a za wazagai na agula a firiya burini lai ɗa nɵa kai.

⁹Ku za meefeŋ a sûwiɗi nagai n’e ɗika wuzaku par paŋ. Ku ɓulkaŋa agula gaini alawai zamai gaini wazagai zi rgi lai na ku zizinaŋ ɗa, ta ɗa ku bulaŋa duɓaku sek su.

¹⁰Buri hanɗa aga ku kasi gir midini pinzibani Yerobowam ɗa, aga mu vidiɗi maɵagai na war pinzibani ɗa edi warɗi Izrayel par koo ɓa a bege, koo ɓa a kempe; Aga mu vada pinzibani ɗa edi marwai maini zilgit n’e tûkûŋ edi kat ɗa nɵa.

¹¹Ɗai na war pinzibani Yerobowam n’aga e mri aha war fuŋ n’abai ɗa, a limiɗi ɗa a hirgakai, nagai n’aga e mri edi basga ɗa a simiɗi ɗa a wala zi ɗifli lai, hanɗa a wala n’EPIƊ-ƊAI a muɗaŋ ɗa.

¹²Tuku ɗɗa, faka amai waya aha, Won hlai n’aga ku tika azuku aha war fuŋ n’abai tar ɗa arwagwi ɗa aga a mra.

¹³Ɗai na Izrayel paŋ aga e tûwiŋ, aga e piŋ lai. War pinzibani Yerobowam ɗa, n’aga a nava waŋ zi pi ɗa a ni ktai, buri ɓa arbani pinzibani Yerobowam duk ɗa n’Epiɗ-ɗai Alaw na wiiɗi Izrayel a nava hiini na pɗem warni burini ɗa a ni tar.

¹⁴EPIƊ-ƊAI aga a tika pai zamai midiɗi Izrayel, ni aga a vidiɗi pinzibani Yerobowam ɗa edi, ma a za fu na girna, hadr tar.

¹⁵EPIƊ-ƊAI aga a ziɗi gir wiiɗi Izrayel, aga e bindi maini tai tai na yem a muguzaŋ nɵa. Aga a miliɗi ɗai na Izrayel edi midini afti na pɗem n’a siŋɗi wiiɗi tiyakaiɗi par, a ɵiriɗi edi war galni ra Öfrata na ktai par buri e zizini alawai zi luwuŋ zi pi, e divini agulni EPIƊ-ƊAI gaini.

¹⁶Aga a hiniɗi ɗai na Izrayel ɗa edi pini tuwur na Yerobowam dama a zaŋ, n’a kiɗi Izrayel aŋ ziŋ lai.

¹⁷Munini Yerobowam te faka amai te hala, te co a Tirsa. Hlai na te co mini magalaɗi ɗa, arwagwi ɗa a mra su.

¹⁸E piŋ tiɓ, asakal par ɗai na Izrayel paŋ e tûwiŋ maini n’EPIƊ-ƊAI a muɗaŋ war mini ɵeŋni, ɗif na mini Alaw Ahiyya ɗa nɵa.

¹⁹Labar zamai na midini sdani Yerobowam maini: gaw n’a zaŋ, ŋi n’a ŋa ɵa ɗa paŋ aŋ gaini ɗû war maktuɓ n’e yikiŋ ɓa, sda na wiiɗi paakai na war Izrayel ɗa.

²⁰Yerobowam a buza warɗi pai buza caaɓa pi sulu, asakal a hala gaiɗi tamaini. Nadab n’ahini a suma pai war balamni.

²¹Robowam n’ahini Salmun a suma pai war Yuda, a suma pai sek ɗa buzani doogo doogo puɗu pi ktai, a buza warɗi pai buza doogo pi muguzak aha warɗi Yeruzalem fuŋ n’abai n’EPIƊ-ƊAI a varaŋ arbani fuŋ n’abakai na warɗi Izrayel ɗa paŋ kapai a sumna warni, emini ɗa e yikiti ɓa: Naama te na war pinzibani Ammon.

²²Ɗai na war pinzibani Yuda ɗa, e zi wala na meefeŋ arni EPIƊ-ƊAI, meefeŋ n’e ziŋ ɗa a glasi hiy na wiini EPIƊ-ƊAI a suwa na wiiɗi tiyakaiɗi ɗa.

²³Nagai lai maiɗi tiyakaiɗi nɵa, midini hlai na boŋorai paŋ, pini luwoŋai n’a na guɗa zaw zaw ɗa paŋ, e zizini hlai zi ɓaka ta ta, e ɗiyi kriyit z'alaw amai zaw zaw, e pi luwuŋ z'alaw tiɓ tiɓ lai.

²⁴Falakai gaiɗi maɵagai zamai e ɗifu midini aftiɗi sa e zi sda zi zawar burini alaw na zamai. Nagai e zi wazagai na haharai kal kal maiɗi pinziba n’EPIƊ-ƊAI a birgiɗi edi wuzaɗi aliɗi Izrayel ɗa nɵa.

²⁵War buza n’ag'aŋ ɵim na Robowam aŋ warɗi pai, Sisak pai n’Egipte a halasi a hitimiti Yeruzalem.

²⁶A mula wazagai na pɗamai n’amlai war Dalam na wiini EPIƊ-ƊAI gaini na war dalam na wiini pai lai, a mulaŋ kafa, haa sini gamarai zi or na Salmun a zizinaŋ ɗa paŋ.

²⁷Pai Robowam a zizina gamar zamai zi kiya war balamni, a siŋɗi tiɗi abakaiɗi askarai n’e giɗimi mini magala na wiini ɗa.

²⁸Hlai paŋ na pai a na hala amlai war Dalam na wiini EPIƊ-ƊAI ɗa, askarai e milisi gamar ɗa yaw, asakal par e wiyiŋsi amlai warɗi dilimi na wiiɗi askarai n’e giɗimiŋ ɗa.

²⁹Labar zamai na midini, sda na Robowam a zaŋ ɗa aŋ gaini ɗû war maktuɓ n’e yikiŋ ɓa, sda na wiiɗi paakai na Yuda kai ɗi?

³⁰Robowam gaini Yerobowam e hini aŋ hitimi marɗi ɵa gamai.

³¹Hlai na Robowam a mra li ɗa, e piŋ gaiɗi tiyakaini war fuŋ n’abai na wiini David, emini ɗa e yikiti ɓa, Naama na war pinzibani Ammon par. Abiyam n’ahini a suma pai war balamni.