Read Mousgoum Lokwita n’avut na wiiɗi paakai 15 Bible Online

Lokwita n’avut na wiiɗi paakai 15 - Mousgoum bible

Lokwita n’avut na wiiɗi paakai 15

¹War buza n’ag'aŋ doogo pi mitwis na Yerobowam n’ahini Nebat aŋ warɗi pai na Izrayel, Abiyyam a bunɗa aŋ pai na Yuda.

²A suma pai buza hu aha war Yeruzalem, emini yikiɗi ɓa, Maaka, t'ahini Absalom.

³A za tuwur n’epini a zaŋ ka wuzani par paŋ, a dara Epiɗ-ɗai Alaw na wiini gaiɗi agulni ktai maini David na tiyni nɵa kai.

⁴Burini David ɗa Epiɗ-ɗai Alaw na wiini a sini ahi ktai kapai a suma pai war balamni kapai pinzibaɗi pai ɗa a vada edi kai, Yeruzalem ɗe te hina aŋ fuŋ n’abai na wiini pai lai.

⁵A za nɵa buri ɓa, David a paya payai na pɗem wuzani arni EPIƊ-ƊAI haa sini mrini ta, a za wala ktai na meefeŋ kai sai a seŋ na wiini Uriya na Hittite ɗa tar.

⁶Robowam gaini Yerobowam e hini aŋ hitimi marɗi ɵa gamai.

⁷Labar na zamai midini sda na Abiyam a zaŋ paŋ ɗa, aŋ gaini ɗû war maktuɓ n’e yikiŋ ɓa sda na wiiɗi paakai na Yuda kai ɗi, Abiyyam lai a za gaw gaini Yerobowam.

⁸Abiyyam a hala gaiɗi tamaini, e piŋ war fuŋ n’abai na wiini David, Asa n’ahini a suma pai war balamni.

⁹War buza n’ag'aŋ caaɓa na Yerobowam aŋ warɗi pai na wiiɗi Izrayel ɗa, Asa a bunda aŋ pai na Yuda

¹⁰A ŋa buza doogo doogo puɗu pi ktai aha warɗi Yeruzalem, edini yikiɗi ɓa Maaka t'ahini Absalom.

¹¹Asa a paya pɗem arni EPIƊ-ƊAI maini David na tiyni nɵa.

¹²A birgiɗi maɵagai gaiɗi falakai zi zamar burini alawai na zamai ɗa edi midini afti par, a tuura alawai zi rgi na tamaini e rgiŋ ɗa edi.

¹³Hormaɗi edini zi muni n’amai ɗa a tikaŋ edi ɗaw, buri te rga alaw zi rgi na hi-hir na wiiɗi alaw na muni n’e yikiti ɓa, Akera, Asa a yaŋ edi war huduk na Sedron.

¹⁴Haa sini mrini ta, Asa a dara EPIƊ-ƊAI gaiɗi agulni paŋ, amma paŋ ktai hlai zi ɓaka na wiiɗi alawai na zamai ɗa a vada edi paŋ kai.

¹⁵Asa a kasi like na ni gaini epini e siŋni Alaw ɗa maini arzaŋ or gaini wazagai n’e zi sda gaini war tempel amlai war Dalam na wiini EPIƊ-ƊAI.

¹⁶Asa pai na Yuda gaini Basa pai na Izrayel e hini aŋ gaw gaiɗi marɗi gamai.

¹⁷Mefeŋ ktai, Basa pai na Izrayel a hala aŋ hitima gaiɗi Yuda, a rga ɵaga siɗi Rama kapai Asa pai na Yuda gaiɗi ɗaini e niyisi woni ɗaw kai.

¹⁸Asa a mula arzaŋ gaini or n’a hina amlai war Dalam na wiini EPIƊ-ƊAI, gaini na wiini pai lai a siŋɗi tiɗi ɗaini n’abakai buri e kiŋni wiini Ben-Hadad n’ahini Tabrimon, n’ahini Hesiyon pai na Siriya n’a na war Damas, a siɗi miɗi miɗi maini nɵa:

¹⁹Apuku gaini apa e zi ka bonu arbaɗi, tuku gaya ta ɗa hulumu wuzamu gaini bonu hanɗa, arzaŋ gaini or a na agwi aŋ katu. Hala ɗuukulasi bonu n’a na arbaku gaini Basa pai na Izrayel ɗa ɗaf, kapai a yimaɗi warni edi sa par kaai.

²⁰Ben-Hadad a yima seŋni pai Asa ɗa, a ɵiniɗi abakaiɗi askaraini aŋ hitimi fuŋ n’abakai na war Izrayel, e milisi fuŋ n’abakai hanɗa: Iyyon, Dan, Abel-Bet-Maaka, afti na Kinerot gaini afti na Neftali ɗa paŋ lai.

²¹Won hlai na Basa a ɵina labar hanɗa tar ɗa, a ɗiya ɵaga zi rgi na sini Rama zaw, a wayasi a sumna a Tirsa.

²²Nɵa, pai Asa a diŋgiɗisi ɗai na Yuda paŋ faka, ɓraw arbaɗi kai, kapai e hili e milisi ali-fuŋ gaini luwuŋ na Basa a firiya a rga ɵaga na siɗi Rama gaini ɗa. Pai Asa a rga ɵaga gaini siɗi Geba na war Benyamin gaiɗi Mispa.

²³Labar zamai na midini sdani Asa, kurfukni na war hatam, sdani n’a zaŋ ɗa paŋ, fuŋ n’abakai n’a rgaŋ ɗa paŋ, aŋ gaini ɗû war maktuɓ n’e yikiŋ ɓa sda na wiiɗi paakai na Yuda kai ɗi, meefeŋ n’agwi ɓa, hlai n’a za wel ta ɗa, veglek a yimaŋ sini azini.

²⁴Asa a tapa gaiɗi tamaini, e piŋ gaiɗi tamaini war fuŋ n’abai na wiini David na tiyni. Yosafat n’ahini a suma pai war balamni.

²⁵Nadab n’ahini Yerobowam a bunda aŋ pai na Izrayel war buza n’ag'aŋ sulu na Asa aŋ warɗi pai, a suma pai midiɗi Izrayel buza sulu.

²⁶A paya payai na meefeŋ wuzani arni EPIƊ-ƊAI, a tikiti te futi na wiini epini ɗa, a kiɗi ɗai na Izrayel aŋ zi meefeŋ kal kal maini n’epini a kiɗi ɗai aŋ ziŋ ɗa nɵa.

²⁷Basa n’ahini Ahiyya na war pinzibani Isakar a rga warni aŋ zini meefeŋ wiini Nadab a fuɗaŋ a Gibbeton fuŋ n’abai na wiiɗi Filistrekai, war hlai na Nadab gaiɗi ɗai na Izrayel paŋ e cikiti Gibbeton,

²⁸Basa a fuɗa Nadab war buza n’ag'aŋ hu na Asa pai na Yuda aŋ warɗi pai, a suma pai war balamni.

²⁹Won hlai na Basa a suma pai ta tar ɗa, a fiɗiɗi pinzibani Yerobowam edi kafa, a hina ɗif ktai maa piɗi kai, maini n’EPIƊ-ƊAI a muɗaŋ war mini ɵeŋni Ahiyya na Silo par ɗa nɵa.

³⁰A za nɵa buri tuwur na Yerobowam a zaŋ, gaini n’a kiɗi ɗai aŋ ziŋ ɗa lai, wala hanɗa a glasi hiy na wiini Epiɗ-ɗai Alaw na wiiɗi Izrayel.

³¹Labar zamai na midini sdani Nadab ɗa, gaini wazagai n’a zaŋ paŋ ɗa aŋ gaini ɗû war maktuɓ n’e yikiŋ ɓa sdaɗi paakai na wiiɗi Izrayel ɗa kai ɗi?

³²Asa gaini Basa e hini aŋ hitimi marɗi ɵa gamai.

³³War buza n’ag'aŋ hu na Asa pai na Yuda aŋ warɗi pai, Basa n’ahini Ahiyya, a suma pai midiɗi Izrayel paŋ, a sumna war Tirsa haa buza caaɓa pi puɗu.

³⁴A paya payai na meefeŋ wuzani arni EPIƊ-ƊAI, a tikiti te futi na wiini Yerobowam, a za ɗa a tuwur na Yerobowam a kiɗi ɗai na Izrayel aŋ ziŋ ɵa kal kal.