Read Mousgoum Lokwita n’avut na wiiɗi paakai 17 Bible Online

Lokwita n’avut na wiiɗi paakai 17 - Mousgoum bible

Lokwita n’avut na wiiɗi paakai 17

¹Eliyas ɗif na war Tisbe par midini afti na Galaad par, a midini wiini pai Akab: gaini Epiɗ-ɗai Alaw na wiiɗi Izrayel na mu na aŋ ɵeŋni zaŋ, mu miɗiki na ɓa, buza n’aŋsi wuzamu zaw na ɗa maɗai aga a wa kaalai, faŋ a ɵa kaalai, sai na mu muɗa li.

²EPIƊ-ƊAI a miɗini wiini Eliyas:

³yima suku edi woni na par, hala piɗi futi na dawai par sek, ŋoya ɵimani arai na Kerit na te na war galni Yurdan piɗi futi na dawai par cok.

⁴aga ku ca yem warɗi arai hanɗa par, mu sa miɗi sini zelekekai buri a kukuɗi wala zi simi war hlai ni ɗa.

⁵Eliyas a hala a za maini n’EPIƊ-ƊAI a miɗiŋni nɵa, a hala a sumna warɗi arai na Kerit na te na war galni Yurdan piɗi futi na dawai par dam.

⁶Gorof par gorof par paŋ, koskoi koskoi paŋ, zelekekai e kinisi peŋ gaini neŋ, a ca yem warɗi arai par lai.

⁷Mefeŋ agwi asakal par, arai te hiɗika amai, buri faŋ n’a na ɵa kir kai ɗa.

⁸Nɵa EPIƊ-ƊAI a miɗini:

⁹faka amai, hala war Sarepta na te na midini afti na Sidon, ku sumna woni, mu miɗiɗi wiiɗi muni ktai ta, te muni na war greŋ t'aŋ woni, buri te zina puku gaini simi.

¹⁰A faka amai a hala war Sarepta, a co mini magala na wiini fuŋ n’abai ɗa; a niviti muni ktai woni, te muni na war greŋ te na paya luwuŋ zi yi. A yikiti a miɗiɗi: za barka, hala, sa si yem ma agwi, mu ca do kai ɗe!

¹¹Won hlai na te na hala aŋ piyiŋnisi ɗa, a yikiti pra a miɗiɗi: za barka payaŋasi peŋ tuku agwi lai.

¹²Te wiyini seŋ: gaini Epiɗ-ɗai Alaw na wiiku zaŋ, wala aŋ kai, aŋ ta ɗa a avudi war hulam nɵa agwi nɵa, emel warɗi argini agwi lai, mu paya luwuŋ na ɓa, mu hala mu daŋ yit, gaini ahiya mi simiŋ ta lai mi biyi mri wiyi kiɗi.

¹³Eliyas a miɗiɗi: ku huna kai, hala, za maini na ku muɗaŋ ɗa nɵa; amma war hanɗa par ku zaŋasi gamla pini par agwi ku kaŋŋasi ta, pini n’a hina ɗa, ku za ktai wiiku gaini ahiku lai.

¹⁴Buri Epiɗ-ɗai Alaw na wiiɗi Izrayel a na muɗa maini nɵa: avudi na war hilam nɵa agwi, emel warɗi argini agwi lai, warni ɗa, aga a vada kaalai, haa sini mefeŋ na ta EPIƊ-ƊAI, mu hina faŋ a ɵa midini afti ɗa ta.

¹⁵Te hala te zaŋ maini na Eliyas a muɗaŋ ɗa nɵa, na lai, Eliyas lai, ahiɗi lai simi a ɗûkiliɗi kai.

¹⁶Avudi na war hilam ɗa a vada kai, emel na warɗi a vada kaalai maini n’EPIƊ-ƊAI a muɗaŋ war mini ɗif na mini Alaw Eliyas ɗa nɵa.

¹⁷Asakal hanɗa par, ahiɗi muni na war greŋ n’emini dalam hanɗa a kɵa veglek, veglekni gdaŋ haa a fuɗaŋ su.

¹⁸Muni te miɗini wiini Eliyas: ɗif na wiini Alaw n’a tupumu tiɓ ɗa a maɗa? Ku halasi ahaya ɗa aŋ siŋka meefeŋŋa wiini Alaw lai, aŋ fuɗa ahiya edi lai ɗe!

¹⁹A wiyiɗi seŋ: kasi ahiku ɗa; a tikaŋ tiɗi par, a kaŋ warɗi dilimi n’amai n’a fana warɗi ɗa, a fanaŋ midini liyni waŋ.

²⁰Asakal par a siiwa EPIƊ-ƊAI a muɗa: Epiɗ-ɗai Alaw na wiya, muni na war greŋ na ti yimaŋa aha siɗi maini ɗif zi zak nɵa ɗa, ahiɗi ku fuɗaŋ na ɗa, ku firiya ku ziɗi meefeŋ wiiɗi na lai ɗi?

²¹Eliyas a fana midini arwagwi gaini mogoni azi hu a siiwa EPIƊ-ƊAI a muɗa: Epiɗ-ɗai Alaw na wiya, za barka, suŋfani arwagwi hanɗa ku wiyiŋnisi warni wai kai ɗi?

²²EPIƊ-ƊAI a ɵina siiwa na wiini Eliyas, suŋfani arwagwi a wayasi warni wai, arwagwi a tika pini a suŋfa.

²³Eliyas a tikasi arwagwi, a niyasi azumai gaini warɗi dilimi n’amai ɗa par a siŋɗi wiiɗi emini, a muɗa: tala, ahiku ɗa aŋ karni.

²⁴Muni te miɗini wiini Eliyas: tiyana ɗa, mu sɗa ɓa ku ɗif na wiini Alaw, seŋ na wiini EPIƊ-ƊAI na muku par ɗe a jre lai.