Read Mousgoum Lokwita n’avut na wiiɗi paakai 2 Bible Online

Lokwita n’avut na wiiɗi paakai 2 - Mousgoum bible

Lokwita n’avut na wiiɗi paakai 2

¹Won hlai na David a tala ɓa mrini a ŋasi gobi, a sini gadai wiini Salmun n’ahini maini nɵa:

²Aga mu hala edi warɗi yai par maiɗi ɗai na doogo n’e hili na ɵa, ɗiya gdaŋ, ɗiya aŋ wus,

³za pini wala n’Epiɗ-ɗai Alaw na wiiku a guduku midini, paya maini na Ni a firiyaŋ nɵa, za pini gadai zi ɗû na wiini, pini gadai na wiini, pini gadaini zi ɗiyi gaini wazagai n’a hitra midini paŋ, maini n’aŋ gaini ɗû war ɗû na wiini Musus nɵa. Nɵa wala na ku dara ku zaŋ paŋ aga a za. Na ku hiinaŋ warku paŋ aga a va amai lai.

⁴EPIƊ-ƊAI aga a va amai seŋ ni n’a muɗaŋa ɓa: na ɓa pinzibaku ɗa e piyi payai na pɗem, e piyi wuzani ara war jre gaini agulɗi paŋ, gaini suŋfaɗi paŋ ɗa, Paramai zi pai na wiiɗi Izrayel ɗa aga te hina tiɗi ɵa haa kureɗ.

⁵David a miɗini pra: ku sɗa wala na Yowab n’ahiɗi Seruya a zaŋŋa ya, wala n’a zaŋ sini Abner n’ahini Ner gaini Amasa n’ahini Yeter n’abakaiɗi askarai na wiiɗi Izrayel ɗa ya lai, a fiɗiɗi edi, a za wala na kadai tiɓ ɗa a zuva a za war mefeŋ zi ɵeɗ kai, fel hanɗa a dedeɓa sini santir na wuzani gaini harabak na zini lai, felɗi ɗai hanɗa a zilba war tini.

⁶Za gaini yel na wiiku ɗa, amma ku hinaŋ haa wel a yimaŋ, kapai a mra gaini hangalni kai.

⁷Amma pinzibani Barzilai na Galaad par ɗa, ku za pɗem siɗi, ku pɵeɗi arbaɗi nagai n’e simi suku par ɗa buri ɓa e zi pɗem sa maini hanɗa nɵa, hlai na mu na ŋoya sa wuzani Absalom na tawalku ɗa.

⁸Amma Simey n’ahini Gera na midini afti na wiini Benyamin na war fuŋ na Bahurim par, aŋ tukuna, a muɗa seŋ na maafanai sa viya gara war mefeŋ na mu na hala war Maha naiim sek ɗa. Amma mefeŋ na mu wayasi edi par ɗa, a halasi sa agoɗom wulani Yurdan, mu hini wala maa gaini EPIƊ-ƊAI ɓa aga mu fuɗaŋ edi gaini kaɵkar kai.

⁹Tiyana ɗa ku yimaŋ maini ɗif na seŋ midini kai nɵa kai, buri ɓa tuku ku ɗif na yel, aga ku sɗa wala na ku zaŋ sini ɗa, gaini welni tekeɗeɗi ɗa sai ku fuɗaŋ edi.

¹⁰David a mra, e piŋ war fuŋ n’abai na wiini David.

¹¹Buza na David a zaŋ warɗi pai midiɗi Izrayel a na paŋ puɗu. A za buza muguzak war Hebron, buza doogo doogo hu pi hu war Yeruzalem lai.

¹²Salmun a sumna warɗi Paramai zi pai na wiini David n’epini, spakɗi paini a riya amai wuzani sek sek.

¹³Mefeŋ ktai ɗa, Adoniya n’ahiɗi Haggit a hala siɗi Batseba n’emini Salmun, na te zilbaŋ ɓa: ku halasi sa na ɗa jam tiɓ ɗi? Ni a wiyiɗi seŋ ɓa: jam kadai.

¹⁴Asakal par a miɗiɗi: ma gaiku agwi nɵa. Te miɗini, muɗa wiiku.

¹⁵Adoniya a muɗa: Tuku ku sɗa ɓa pai kadai tiɓ te wiya, ɗai na Izrayel ɗa paŋ e biyi ɓa aga mu simiti muta. A za ɵa kir kai, te sa sini Salmun na tawala, te sa sini nɵa pini dirini EPIƊ-ƊAI.

¹⁶Tiyana ɗa, mu firiya mu zilba wala tuku ktai, ku za barka, ku bla edi sa kai. Na te miɗini: muɗa wiiku.

¹⁷Adoniya a muɗa: mu siiwuku, ku miɗini wiini pai Salmun buri a sitiŋa Abisai na Sunem par aŋ muniya ta. Mu siɗa ɓa aga a bla edi suku kai.

¹⁸Batseba te wiyini seŋ: pɗem, ta dama aga mu hala mu talasi seŋ hanɗa gaini pai.

¹⁹Batseba te hala ahani pai Salmun aŋ miɗini gaini Adoniya. Pai a faka amai miɗi, a goɓo azumai, asakal par a wayasi azumai midiɗi paramaini dam, a siɗi Paramai war hlai zi hormo wiiɗi na ta lai.

²⁰Te miɗini: mu firiya mu zulbuku gaini wala ktai agwi nɵa, ku za barka ku bla edi sa kai. Pai a wiyiɗi seŋ: ama muɗa wiiku, aga mu bula edi suku kai.

²¹Te miɗini: mu kuɗumu mu sutumu Abisai na Sunem par aŋ muni wiini Adoniya na tawalku kai ɗe.

²²Pai Salmun a wiyiɗi seŋ wiiɗi emini a muɗa: ku muɗaŋa ɓa mu sitini Abisag na Sunem par ɗa wiini Adoniya maɵa maɵa ɗa? Na ɓa ɵa ɗa marya ku zilbitini pai ɗa marwai buri ɓa ni a tawala n’abai, sitini pai ɗa wiini ni gaiɗi nagai na pini ɗa, miɗi pai zi ɓaka Abiyatar, miɗi Yowab n’ahiɗi Seruya n’abaiɗi askarai ɗa.

²³Pai Salmun a ha wala mini gaini EPIƊ-ƊAI a muɗa: seŋ na Adoniya a tikaŋsi mini na ɗa, na ɓa mu fuɗaŋ pini kai ɗa, Alaw a tekaŋa gir n’abai mada.

²⁴Tiyana ɗa gaini EPIƊ-ƊAI n’aŋ a karni zaŋ, Ni n’a saŋa gdaŋ, a tekaŋa midiɗi Paramai zi pai na wiini David n’apa, n’a mulaŋa fuŋ lai maini n’a na muɗaŋ ɗa nɵa ɗa, girna haa Adoniya a nava fiɗi n’edi.

²⁵Nɵa Pai Salmun a ɵina Benaia n’ahini Yehoyada midini a fuɗaŋsi edi, Adoniya a mra maini nɵa.

²⁶Amma wiini pai zi ɓaka Abiyatar ɗa, pai a miɗini ɓa: faka hala war Anatot, midini aftiku ɗa, kadai tiɓ ɗa, mu fuɗuku gaini fiɗi, amma tiyana mu fuɗuku kai buri ku liba Zunduk zi bonu na wiini Epiɗ-ɗai Alaw wuzani David n’apa, pra gaini apa ki siɗi gir piɗi marki aŋ bonu lai.

²⁷Salmun a wa Abiyatar edi war sdani zi pai zi ɓaka na wiini EPIƊ-ƊAI par, nɵa seŋ n’EPIƊ-ƊAI a muɗaŋ sini pinzibani pai zi ɓaka n’abai Eli war Silo ɗa a va amai.

²⁸Labar hanɗa a co sini Yowab, nɵa a lawa a ŋoya amlai war gumu na wiini EPIƊ-ƊAI ɵimani gûwiŋ zi yi ɓaka cok. Yowab ɗa a naka warni gaini Absalom kai, amma tiyana ɗa a tapa seŋni gaini Adoniya sa.

²⁹E hilisi e midini wiini Salmun ɓa: Yowab ɗa aŋsi amlai war gumu na wiini EPIƊ-ƊAI, ɵimani gûwiŋ zi yi ɓaka gaini ŋûûyi cok. Nɵa Salmun a ɵina Benaia n’ahini Yehoyada midini ɓa: a hala, a fuɗaŋ edi.

³⁰Benaia a niya amlai warni gumu na wiini EPIƊ-ƊAI a miɗini wiini Yowab ɓa pai ɓa ku niyaɗi anene, amma Yowab a wiyini seŋ: zaw kai, mu mra ɗa wonna. Benaia a wayasi a miɗini seŋ na Yowab a muɗaŋ ɗa wiini pai ta.

³¹Pai a wiyini seŋ ɓa: za sini maini n’a muɗaŋ ɗa ɵa, ku fuɗaŋ su, ku paŋ tiɓ lai. Kapai felɗi ɗai na sulu na Yowab a fiɗiɗi edi aŋ blaŋ ɗa a pɵa mada gaini pinziba na wiini apa ɗa kai.

³²EPIƊ-ƊAI aga a zilba felni tini ni dama ni n’a fiɗiɗi ɗai na sulu na jrekai e sûwiŋ, pɗemai e sûwiŋ lai edi gaini kaɵkar: Abner n’ahini Ner abaiɗi askarai na Izrayel gaini Amasa n’ahini Yeter abaiɗi askarai na Yuda lai, David n’apa ma a habar kai.

³³A zuva ɓa felɗi a zilba tini Yowab gaiɗi pinzibani lai haa kureɗ, amma David gaiɗi pinzibani, gaiɗi alini gaiɗi paakai n’aga e simi asakalni sek paŋ ɗa, EPIƊ-ƊAI a siɗi ɵeɗ haa kureɗ lai.

³⁴Benaia n’ahini Yehoyada, a hala a fuɗaŋ. E piŋ ahani war basga na kaɗataŋ na Yuda.

³⁵Pai a tika Benaia n’ahini Yehoyada aŋ abaiɗi askarai war balamni, a tika pai zi ɓaka Sadok war balamni Abiyatar ta lai.

³⁶Pai Salmun a ɵina pini Simey a miɗini: rgiti dilimiku ktai tiɓ aha war Yeruzalem, ku sumna warɗi dam, ku tika azuku edi war hlai zamai kai.

³⁷Ku yimaŋ muduku pɗem ɓa, mefeŋ na ku pra li huduk na Sedron edi ɗa aga mu fuɗuku, felku a zilba war tuku lai.

³⁸Simey a midini wiini pai: pɗem gara jaamus; na ku muɗaŋ na ɗa aga mu za maini nɵa. Simey a sumna aha warɗi Yeruzalem buza yaw.

³⁹Buza hu asakal par, ɗai zi sda na wiini Simey sulu e pri edi ahani Akis n’ahiɗi Maaka pai na Gat; e kinisi labar wiini Simey ɓa, ɗaini ɗa e ɗa a Gat.

⁴⁰Simey a faka amai, a zizina ablehöni a hala war Gat ahani Akis aŋ piyiɗisi ɗaini zi sda ɗa. Simey A hala a miliɗisi nɵa yaw tar, a wayasi lai.

⁴¹E hilisi e midini wiini pai ɓa: Simey aŋsi a Gat tiya n’a wayasi ya lai.

⁴²Pai a yikasi Simey a miɗini: mu huku wala ma gaini EPIƊ-ƊAI, mu zuku zaida lai ɓa, mefeŋ na ku tika zuku li war hlai zamai ɗa, aga mu fuɗuku edi, ku wayaŋa seŋ lai ɓa: pɗem gara jaamus, na ku muɗaŋ na ɗa aga mu za maini nɵa, a na ɵa kai ɗi?

⁴³Tuku ku za pini wala na ku haŋ muku wuzani EPIƊ-ƊAI kai, ku za pini gadai na mu suŋku kaalai ɗa buri maɗa?

⁴⁴Asakal par pai a miɗini wiini Simey: meefeŋ na ku ziŋni wiini David n’apa ɗa paŋ ku sɗaŋ kafa, nɵa EPIƊ-ƊAI a waya meefeŋku ɗa muduku.

⁴⁵Amma pai Salmun ɗa a nava ɓiki, pai na wiini David ɗa ɗe aga te ɗiya gdeŋi lai haa kureɗ.

⁴⁶Pai a sini futi wiini Benaia n’ahini Yehoyada, a niya anene gaini Simey a fuɗaŋ edi, Sini mefeŋ hanɗa par, pai na wiini Salmun gdaŋɗi a riya amai sek sek.