Read Mousgoum Lokwita n’avut na wiiɗi paakai 20 Bible Online

Lokwita n’avut na wiiɗi paakai 20 - Mousgoum bible

Lokwita n’avut na wiiɗi paakai 20

¹Ben-Hadad pai na Siriya a tipiɗi askarai na wiini paŋ; paakai n’e zi bonu gaini e ɗifu doogo doogo hu pi sulu; plasai gaini saret zi gaw viya lai. A hala a cikiti Samariya a hitimiti lai.

²A ɵina ɗai aha war fuŋ n’abai hanɗa sini Akab pai na Izrayel,

³aŋ miɗini ɓa: Ben-Hadad a na muɗasi maini nɵa: arzaŋku, orku, falakaiku gaiɗi aliku na juvai gara ɗa lai e ɗi wiya.

⁴Pai na Izrayel ɗa a wiyini seŋ: pai n’epin geza, maini na ku daraŋ nɵa, ta mu wiiku, wazagaiŋa paŋ ɗa a wiiku lai.

⁵Ɗai na Ben-Hadad a ɵiniɗi e wiyisi e miɗi pra: Ben-Hadad ɓa, mu ɵinaɗika suku ɓa arzaŋku, orku, falakaiku gaiɗi aliku lai ku saŋŋasi sa.

⁶Nɵa ɗa, dawai haa sini ler n’a na ta ɗa, aga mu ɵeniɗiɗi ɗaiŋa aŋ tili war dalamku gaini dalamɗi ɗaiku n’abakai ɗa. Wazagai n’a na arku pɗemai paŋ ɗa aga e libiŋsi.

⁷Pai na Izrayel a diŋgiɗi n’abakai n’arbaɗi ɗai na midini afti paŋ a miɗiɗi: ki siɗi ɓa ɗif hanɗa a paya gaya na ɗa a seŋ. Won hlai n’a muɗaŋa ɓa: falakaiya lai, aliya lai, arzaŋŋa gaini orŋa lai mu siŋni ɗa, mu bula edi kai.

⁸N'abakai n’arbaɗi ɗai gaiɗi ɗai paŋ e miɗini ɓa: ku yima seŋni kai, ku ɗiya kaalai.

⁹Akab a miɗiɗi wiiɗi ɗai na Ben-Hadad a ɵiniɗisi sini ɓa: ki miɗini wiini epin geza na pai ɓa: wazagai n’a zilbaŋ ta avut sme ɗa aga mu zaŋ, amma n’a zilbaŋ tiyana na ɗa mu kiɗa mu zaŋ kai. Ɗai na e ɵiniɗisi ɗa e hili e kiini seŋ hanɗa.

¹⁰Ben-Hadad a ɵina sini Akab a miɗini ɓa: na ɓa mi hiliɗi li vokɗi ɗai n’e ɗi pa na ɗa, na ɓa ɗif paŋ a tika deeɓer tini ɗaw ɗaw maa e kiɗi e nivi paŋ kai. Na ɓa mu tûûriti Samariya edi kai ɗa, alawai e tikiŋa gir n’abai mada ta, na ɓa ku kaŋsi aŋ bulaŋ ɵa ɗa.

¹¹Paiɗi Izrayel a waya-seŋ a muɗa: miɗi wiiki, ɗif n’a gaŋa sini amai aŋ hala edi mini hatam sek ɗa, a kola sini maini ɗif n’a wayasi edi par, n’a rɗasi amai ya nɵa kai.

¹²Labar hanɗa a cosi sini ɗa Won hlai na Ben-Hadad a nafu aŋ ca gaiɗi paakai na marni amlai war gumu. A sa futi wiiɗi ɗaini a muɗa: hili hitimi, nagai e zinini siɗi sini fuŋ n’abai ɗa ta ta aŋ hatam.

¹³Nɵa ɗif na mini Alaw ktai a halasi a miɗini wiini Akab pai na Izrayel ɓa: EPIƊ-ƊAI a na muɗa maini nɵa: vok n’abai hanɗa, ku talaŋ ya ɗe, girna aga mu saŋ war tuku, kapai a yima muduku ɓa: Ta m’EPIƊ-ƊAI.

¹⁴Akab a zilbaŋ ɓa: aga a zina piyi ɗa asiya ɗa? A wiyini seŋ, EPIƊ-ƊAI a na muɗa maini nɵa: aga a za gaiɗi askarai na hahakai na lawanai e miliɗi gobi na ɗa. Akab a zilbaŋ pra: aga a tika pini hatam asiya ɗa? A wiyini seŋ ɓa: Ku tuku.

¹⁵Nɵa pai Akab a gûniɗisi askarai na hahakai na miya sulu gaini doogo doogo hu pi sulu na Lawanai e miliɗi ɗa gaiɗi askarai na dubu muguzak na wiiɗi Izrayel ɗa lai gun gun.

¹⁶Girvudi n’arba ɗa, Akab gaiɗi askaraini ɗa e fiki hatam, Won hlaini Ben-Hadad gaiɗi paakai na doogo doogo hu pi sulu n’e zi bonu gaini ɗa e ɗifu sa aŋ ci amlai war gumu.

¹⁷E niyi edi avut e ɗi askarai na hahakai ɗa. Ben-Hadad a ɵina ɗai aŋ tilisi wala n’a na za ɗa. E wiyisi e miɗini: e hilisi ɗa e ɗi askarai na Samariya par.

¹⁸Nɵa Ben-Hadad a miɗiɗi: na ɓa e hilisi na jam maa ki yimiɗisi karɗi yaw, war hatam maa, ki yimiɗisi karɗi yaw lai.

¹⁹Askarai na hahakai gaiɗi askarai na Izrayel n’e niyisi edi war fuŋ n’abai ɗa par ɗa,

²⁰ɗif paŋ a fuɗa gawni tini ktai ktai. Ɗai na Siriya e pri edi, aliɗi Izrayel e tiki futi piɗi. Ben-Hadad pai na Siriya a pra edi gaini plis gaiɗi ɗai zi plasai zamai lai.

²¹Asakal par pai na Izrayel a hala a fuɗa plasai, a tuura saretai zi gaw edi lai, a vidiɗi gdaŋɗi askarai na Siriya edi marwai.

²²Ɗif na mini Alaw a halasi sini pai na Izrayel ɗa a miɗini: ɗiya gdaŋ hala wuzaku, hiina pɗem midini wala n’aga ku zaŋ ɗa, buri ɓa buza na wuzamu ɗa pai na Siriya ɗa aga a wayasi a hitimuku pra.

²³Ɗai n’abakai na wiini pai na Siriya e miɗini: Alaw na wiiɗi ɗa a Alaw na sini huwuŋ, e suuwumu na ɗa, buri hanɗa. Tiyana ɗa na ɓa, mu hutumumu li gaiɗi ɗa war hlai na plas ɗa, aga mu rɗumu amai midiɗi.

²⁴Aga ku za ɗa maini nɵa, ku wiiɗi paakai n’e zi bonu gaiku edi war sdaɗi par, ku miliɗi lawanai war balamɗi ca ca.

²⁵Tuku mal, ku mula askarai zamai eziɗi nagai n’e mri mini hatam ɗa, ku wura plasai ezini marni ɗa, saretai ezini marni lai, mu hutumuɗumu war hlai na plas ɗa, aga mu rɗumu amai midiɗi. A yima seŋɗi, a za pini yel na wiiɗi lai.

²⁶Buza na te ga midiɗi maiɗi ɗa, Ben-Hadad a gûniɗi askarai na Siriya gun gun, a hala gaiɗi war Afek aŋ hitimiti Izrayel.

²⁷Pai Akab lai, a gûniɗisi askarai na wiiɗi Izrayel gun gun, a piyiɗi wala zi simi tiɗi lai e hili miɗi ɗai na Siriya ɗa. Aliɗi Izrayel e pisi edi wuzaɗi par nɵa con con sulu maini farani haakai nɵa, ɗai na Siriya ɗa e vi hlai na waŋ ɗa ta.

²⁸Ɗif na mini Alaw a halasi a miɗini wiini pai na wiini Izrayel ɓa: EPIƊ-ƊAI a na muɗa maini nɵa: ɗai na Siriya ɗa e miɗi ɓa, Ta EPIƊ-ƊAI ɗa mu Alaw na sini huwuŋ, mu na wiini hlai na plas kai. Nɵa ɗa aga mu sa vokɗi askarai n’abai hanɗa war tuku kapai a yima miɗiki ɓa Ta m’EPIƊ-ƊAI.

²⁹E fini miɗi marɗi mefeŋ muguzak. War mefeŋ n’ag'aŋ muguzak ɗa hatam a tika pini, aliɗi Izrayel e fiɗi piɗi askarai na Siriya ɗa ɗai dubu miya ɗaw war yuvai ktai.

³⁰Askarai n’e hini dubu caaɓa pi muguzak ɗa, e ɵiri aha war fuŋ n’abai na Afek ɗa, ɵaga a kɵa midiɗi su. Amma Ben-Hadad a pra edi, a niya aha war fuŋ n’abai a ŋoya amlai warɗi dilimi n’edi piɗi marɗi.

³¹Ɗaini n’abakai e miɗini: tiyi mi ɵini ɓa paakai na warɗi Izrayel ɗa, e ɗi paakai na hiini haw wara gara. Wumu sapa zi tuwi sumu sa, mu yumumu tumu amai mudumu yaw yaw lai, mu hulumu sini pai na Izrayel ɗa, ablaŋtaŋkai a kiɗa a hunuku karku ɗi.

³²E wi sapa zi tuwo siɗi, e yimi tiɗi amai midiɗi yaw, e hili sini pai na Izrayel e miɗini: Ben-Hadad na begeku a siiwuku na ɓa ku za barka, ku hinaŋ karni mak kai ɗe. Akab a miɗiɗi: aŋ karni ɗai ɗi? Na ɓa ɵa ɗa, tiyana ɗa a maya.

³³Ɗai n’e hilisi sini ɗa, won hlai n’e tili hiinini a na pɗem ɗa, e miɗini wiini Akab: a na ɵa, Ben-Hadad ɗa a maiku. Akab a miɗiɗi: Hili yikiŋŋasi. Ben-Hadad a halasi sini, Akab a tikaŋ amai warɗi saret na wiini mal tar ta.

³⁴Ben-Hadad a miɗini: Fuŋ n’abakai na apa a mulaŋ pini apuku par ɗa aga mu wuyuŋku, ku kiɗa ku halaɗi ku rga mangaza na abakai zi sikili wazagai na midini aftiku par war Damas maini na apa a naka a halaɗi a zaŋ war Samariya ɗa nɵa. Akab a miɗini: mu hunuku ku hala sek ɗa sai mu zumu bonu ta haw. Akab a za bonu gaini ta, a hinaŋ a hala.

³⁵Ɗif ktai arbaɗi ɗai na mini Alaw a miɗini wiini maini ɓa: EPIƊ-ƊAI ɓa ku fuɗaŋa, amma maini a dara kai.

³⁶Ɗif na mini Alaw a waya seŋ a miɗini wiini maini: buri ɓa ku ɵina mini EPIƊ-ƊAI kai ɗa, ku fakaɗi sa par na ɗa gurnai aga a fuɗuku, maini a fakaɗi sini par, gurnai a navaŋ a fuɗaŋ.

³⁷Ɗif na mini Alaw ɗa a nava ɗif zamai pra a miɗini: fuɗaŋa, ɗif a bulaŋ, a zini wukruk ta.

³⁸Ɗif na mini Alaw a hala a baiya pai warɗi futi; a rga sapa arni ɓak, ɗif a kiɗa a sɗaŋ kir kai.

³⁹Won hlai na pai a na vuga a ɗuula a muɗa: jamus, mu nasi fu edi mini hatam, askar ktai a kaŋasi ɗif ktai ta a muɗaŋa ɓa: mu tikini hangal wiini ɗif hanɗa, na ɓa a pra li edi ɗa, a fuɗaŋa ezini, ɵa kai ɗe mu vurga arzaŋ sulai dubu hu lai.

⁴⁰Won hlai na mu nafu gaini hûwyi blaŋ blaŋ ɗa, ɗif a pra e ɗi ta su. Pai na Izrayel a miɗini: sariyaiku ɗa tuku mal ku ziti ya.

⁴¹Ɗif na mini Alaw a mula sapa n’a rgaŋ arni ɗa edi, pai na Izrayel a sɗa ɓa a ktai arbaɗi ɗai na mini Alaw.

⁴²Ɗif na mini Alaw a miɗini: EPIƊ-ƊAI a na muɗa maini nɵa: ɗif na mu suŋku tuku aŋ fiɗi ɗa ku ɵaŋ su, buri hanɗa tuku aga ku mra ezini, ɗaiku ɗe eziɗi ɗaini lai.

⁴³Pai na Izrayel a waya aha war Samariya sek war kwimi gaini hiy n’abai.