Read Mousgoum Lokwita n’avut na wiiɗi paakai 21 Bible Online

Lokwita n’avut na wiiɗi paakai 21 - Mousgoum bible

Lokwita n’avut na wiiɗi paakai 21

¹Asakalni wazagai hanɗa par, seŋ ktai a za maini nɵa, Nabot na Yizreyel par a nafu gaini vuwai zi luwuŋ zi vin war Yizreyel gobi ɵimani dalamni Akab pai na Samariya.

²Akab a miɗini wiini Nabot: saŋŋa vuwaiku ta mu bula sugoy woni buri ɓa aŋ ɵimani dalamŋa gobi ta, kapai mu suku vuwai zamai na pɗem ezini, na ɓa ku firiya ɗa a farai ɗe, mu suku faraini lai.

³Nabot a miɗini wiini Akab: vuwai na mu navaŋ tiɗi tamaiya par aŋ bulum hanɗa, ɓa mu suŋku ɗa, Alaw a tika barkaŋa edi.

⁴Akab a waya ahani war kwimi gaini hiy n’abai buri na Nabot na Yizrel par a miɗiŋni ɓa: mu tika mu hunuku vuwai na mu navaŋ aŋ bulum siɗi tamaiya par kai ɗa. A fana midini lini waŋ, a bunda arni amlai sini hlai sek pla, a firiya a suma wala kai.

⁵Yezabel na munini te hala amlai sini te zilbaŋ: ku za hiy, ku firiya ku suma kaalai ɗa buri maɗa?

⁶A wiyiɗi seŋ: buri ɓa mu haɗa kalaŋ gaini Nabot na Yizreyel par, mu zilbaŋ ɓa: a saŋa vuwaini zi luwuŋ zi vin ɗa ta, mu sini farai midini, ɵa kai ɗe mu sini vuwai zamai ezini lai. A wayaŋa seŋ ɓa: mu kiɗa mu hunuku vuwaiŋa zi luwuŋ zi vin ɗa kai.

⁷Yezabel na munini te miɗini: pai na Izrayel ɗa ku tuku zaw, ku tuku kai ɗi? Faka amai fak suma wiiku, pla hiiniku su, vuwai zi luwuŋ zi vin na wiini Nabot na Yizreyel ɗa ta aga mu suŋku.

⁸Te ɗo letre war yikini Akab ɗo ɗo, te tika tampon na wiini midini ta ta, te ɵinaŋ wiiɗi n’abakai n’arbaɗi ɗai gaiɗi zi pak na war fuŋ n’abai na wiini Nabot, n’e ɗa gaini aŋ fuŋ ɗa.

⁹Te ɗo warni letre maini nɵa: ɗiyi mefeŋ na wiini tikini sai zaw, Won hlai na ɗai e hilisi li ɗa a giɗima diŋgi ɗa a Nabot.

¹⁰Ki mili ɗai na maafanai sulu wuzani par sa arɗi sini sek n’e pi seŋ midini ɓa: ku muɗa miɗi na meefeŋ sini Alaw, sini pai lai. Asakal par ki yimiŋsi edi war fuŋ n’abai ɗa par, ki biliŋ gaini kriyit haa a mra.

¹¹Ɗai na war fuŋ n’abai na Yizraiel, abakai n’arbaɗi ɗai gaiɗi zi spak n’e ɗa war fuŋ n’abai ɗa, e zi pini miɗi na wiiɗi Yezabel kal kal maini na te ɗûŋɗi war letre na te ɵeniŋɗi nɵa.

¹²E ɗiyi mefeŋ na wiini tikini sai, e si gɗamni diŋgi tini Nabot ta.

¹³Ɗai na maafanai sulu e hilisi e simnisi wuzani par ca, arɗi sini sek, ɗai na maafanai e tiki piɗi e pi seŋ midini Nabot wuzaɗi ɗai maini nɵa: Nabot a muɗa miɗi na meefeŋ sini Alaw, sini pai lai? E yimiŋsiedi war fuŋ n’abai par e biliŋ gaini kriyit haa a mra.

¹⁴E ɵini siɗi Yezabel ɓa, Nabot ɗa e biliŋ gaini kriyit haa tiya n’a mra su.

¹⁵Won hlai na Yezabel te ɵina ɓa e bili Nabot gaini kriyit haa tiya n’a mra su ɗa, te miɗini wiini Akab: faka amai, hala tika vuwai zi luwuŋ zi vin na wiini Nabot na Yizreyel n’a firiya ɓa, koo gaini faraiku tuku yaw maa a wuruŋku a wûri kai ɗa. Buri ɓa Nabot aŋ karni kir kai a mra su.

¹⁶Won hlai na Akab a ɵina ɓa Nabot a mra su ɗa, a faka amai a hala war vuwai zi nluwuŋ zi vin na wiini Nabot na Yizreyel kapai a tikaŋ aŋ wiini.

¹⁷EPIƊ-ƊAI a miɗini wiini Eliyas na Tisbit par:

¹⁸Faka amai hala sini Akab, pai na Izrayel war Samariya. Aŋ war vuwai zi luwuŋ zi vin na wiini Nabot, a hala aŋ woni aŋ tikaŋ.

¹⁹Ku miɗini ɓa: EPIƊ-ƊAI a na muɗa maini nɵa: ku fuɗa ɗif su lai, tiyana ku firiya ku mula wazagaini pra ɗi? Ku miɗini ɓa: EPIƊ-ƊAI a na muɗa maini nɵa: hlai na hirgakai a ha na felni Nabot woni ɗa, aga a hinga felku tuku dama woni lai.

²⁰Akab a midini wiini Eliyas: gawŋa, ku tikitisi futi li pa pra; Eliyas a wiyini seŋ: nkam, mu tikitisi futi puku buri ɓa ku za wala na meefeŋ arni EPIƊ-ƊAI.

²¹EPIƊ-ƊAI a na muɗa maini nɵa: aga mu kasi gir muduku, aga mu huzuku edi, aga mu vidiɗi pinzibaku na maɵagai ɗa edi kafa, na bagakai gaiɗi na kempekai lai na war Izrayel ɗe paŋ.

²²Aga mu bunda pinzibaku kal kal maini pinzibani Yerobowam n’ahini Nebat ɗa nɵa, maini pinzibani Basa n’ahini Ahiya ɗa nɵa lai, burini meefeŋ na ku zaŋ ɗa, buri ɓa ku kiɗi ɗai na Izrayel war tuwur lai.

²³EPIƊ-ƊAI a na muɗa buriɗi Yezabel maini nɵa: hirgakai a limiti Yezabel azumai eziɗi ɵagai na Yizreyel.

²⁴Ɗif na war pinzibani Akab paŋ n’a mra aha war fuŋ n’abai ɗa, hirgakai aga a lumaŋ, na ɓa a mra edi basga ɗa, wala zi ɗufli n’arbani hlai n’amai aga a sumaŋ lai.

²⁵Ɗif zamai n’a sa sini edipini meefeŋ wuzani arni EPIƊ-ƊAI maini Akab nɵa aŋ kai, buri ɓa munini te kaŋ aŋ za meefeŋ.

²⁶A za sda na haharai viya gara, hlai a hurga azumai wuzaɗi alawai na zamai kal kal maiɗi Amoritekai n’EPIƊ-ƊAI a birgiɗi edi wuzaɗi aliɗi Izrayel ɗa nɵa.

²⁷Won hlai na Akab a ɵina seŋ hanɗa, a ɓasa sapa na sini edi, a wa sapa zi tuwi sini a tika sai; a fana gaini sapa hanɗa sini ɗik, a hala ɗa ezini a tika amai pini kai.

²⁸EPIƊ-ƊAI a miɗini wiini Eliyas na Tisbit par maini nɵa:

²⁹Tala, Akab ɗa a wayasi hiinini ɗa sa wai, a hosa sini azumai, buri hanɗa, aga mu hinasi gir midini war mefeŋ na ni a na karni kai, aga mu kaŋsi gir hanɗa midini pinzibani war mefeŋ na ahini a suma pai li ɗa.