Read Mousgoum Lokwita n’avut na wiiɗi paakai 5 Bible Online

Lokwita n’avut na wiiɗi paakai 5 - Mousgoum bible

Lokwita n’avut na wiiɗi paakai 5

¹Salmun a ŋa midini aftiɗi paakai zamai na agogoi ɗa lai, sini Ra Öfrata ta par haa sini afti na wiiɗi Filistrekai, gaini haga na gaiɗi Egipte ɗa ta. Paakai na midini hlai hanɗa paŋ e hini azumai pini Salmun ɵa, e zini sda lai, e sini tar lai, haa sini mrini ta.

²Simi n’a ɓa war yuvai dam buriɗi pakataini Salmun gaiɗi ɗaini zi sda ɗa a na: semule kilo dubu ɵeeŋe, avdi na lehiɗ ɗe kilo dubu pi mitwis lai.

³Garakai na nur nur doogo, ɵaakai na war fara par caaɓa, adumai miya ɗaw, wazagai zamai n’e zini puɗu puɗu lai, zi baada lai maini: bariyam, hudre, akaar na gaini yogorai n’abakai na gaini futini lai ɗa e pɵiŋ kai.

⁴Salmun a ŋa midini afti na anene duɓani ra Öfrata par, siɗi Tifsa par haa a Gaza ta, paakai na war galni sek paŋ e hini azumai pini. A sumna jam gaiɗi ɗai na ɵimani paŋ.

⁵War mefeŋ na Salmun a na aŋ pai ɗa, ɗai na Yuda gaiɗi ɗai na Izrayel e ɗifu war ɵeɗ azumai Dan par haa amai Beer-Seba ta, ɗif paŋ a kiɗa a hirma luwuŋ zi vin gaini luwuŋ Fige maini n’a dara nɵa haa sini mrini Salmun ɗa ta.

⁶Salmun ɗa plasaini dubu doogo pi sulu, hlaini n’e kiɗi e giɗimi plasai warni dubu doogo doogo puɗu n’a gidiya saret zi gaw a na lai, ɗai zi dibiri plasai dubu pi sulu lai.

⁷Lawanai na doogo pi sulu na pai a miliɗi ɗa, ɗif paŋ war buza dam ɗa a kinisi simi wiini pai gaiɗi ɗai n’e simi sini par paŋ lai haa tile ɗaw, e hini simi a ɗukla kai.

⁸Amma orge gaini kuzum na wiini plasai, gaini farai zi libi zak ɗa, pini miɗi n’a sa siɗi ɗa, lawanai e kiŋ war hlai na pai aŋ woni ɗa.

⁹Alaw a sini yel n’abai gaini siɗi n’abai lai wiini Salmun, a milini hiinini edi midini wazagai viya haa a pɵa kai maini kaikai n’agoɗom nɵa

¹⁰Yel na wiini Salmun ɗa a suwa yel na wiiɗi ɗai na yalakai na piɗi futi na dawai par gaiɗi ɗai n’Egipte paŋ kafa.

¹¹Yelni a suwa ɗai paŋ, a suwa Etan na Ezra par, a suwa Heman gaini Kalkol, gaini Darda n’alini Mahol ɗa lai, Haa yikini a wa edi arbaɗi pinziba na ɵimani paŋ.

¹²Seŋ joro na wiini ɗa dubu hu, yama na wiini ɗa dubu gaini ɵim lai.

¹³A muɗa midini pinzibani luwoŋai paŋ, sini luwuŋ Sedre na war Liban par haa sini luwuŋ hizope n’a diya amai sini hlai ta, a muɗa midini wazagai na ezini puɗu puɗu, midini wala zi ɗufli, midini wazagai zi hidili gaini hilif lai.

¹⁴Paakai na midini afti paŋ n’e ɵini labarni yel na wiini Salmun ɗa e ɵinisi ɗai sini, ɗai na war pinziba zamai par lai e hilisi aŋ ziɓiri seŋ zi yel na wiini Salmun ɗa.

¹⁵Hiram pai na Tirus a naka a marmaini David gara. Won hlai n’a ɵina ɓa e tiki Salmun aŋ pai war balamni epini ta, a ɵiniɗisi ɗaini sini aŋ ɵiɓini wuti.

¹⁶Asakal hanɗa par, Salmun a ɵina ɗai sini Hiram buri e miɗini maini nɵa:

¹⁷Ku sɗa ɓa David n’apa a kiɗa a rga tempel wiini Epiɗ-ɗai Alaw na wiini kai buri hatam na gawni e hitimiŋ na par lai na par lai ɗa haa EPIƊ-ƊAI a sini rɗi n’amai midiɗi paŋ.

¹⁸Amma tiyana, Epiɗ-ɗai Alaw na wiya a saŋa ɵeɗ arba gaiɗi ɗai na ɵima paŋ, gawŋa na mu hunaŋ aŋ kaalai, gir aŋ kaalai.

¹⁹Mu firiya mu rga tempel wiini Epiɗ-ɗai Alaw na wiya maini n’EPIƊ-ƊAI a miɗini wiini David n’apa ɓa: Ahiku n’aga mu tikaŋ war balamku midiɗi paramaiku zi pai ɗa, aga a rga tempel na wiya ɗa a ni.

²⁰Tiyana ɗa, mu siiwuku ɓa, ku miɗiɗi wiiɗi ɗaiku zi bili luwuŋ ɗa, buri e biliŋasi luwuŋ Sedre na Liban par, ɗaiŋa zi sda ɗa aga e tipi gaiɗi lai. Vrakɗi ɗaiku zi sda n’aga ku ɗiyaŋ ɗa aga mu vurguŋku. Buri ku sɗa ɓa ɗai n’e siɗi bilini luwuŋ maiɗi ɗai na Sidon nɵa ahaɗi e ɗi kai.

²¹Won hlai na pai Hiram a ɵina seŋ na wiini Salmun ɗa a firiya gara, a muɗa: girna kol sini EPIƊ-ƊAI n’a sini ahi zi yel wiini David aŋ ŋa midini vok na viya hanɗa.

²²Hiram a wiyini seŋ wiini Salmun, a muɗa: ɵeŋku a halasi sa ya, mu yimaŋ ya, aga mu suku luwuŋ Sedre gaini luwuŋ sipre na midini hazaku ta ɗa.

²³Ɗaiŋa zi sda ɗa aga e libiŋɗi a Liban par haa agoɗom wulani ra n’abai, aga e rgiŋ sini marni, e finiŋɗi agoɗom ɗaw haa war hlai n’aga ku siŋkaŋŋa ta, woni aga e piliŋ edi kapai ku mulaŋ wiiku. Amma tuku ɗa aga ku saŋa simi mini dalamŋa ɗa.

²⁴Nɵa Hiram a sini luwuŋ Sedre gaini luwuŋ sipre wiini Salmun midini hajani ta.

²⁵Buza, buza paŋ Salmun a sini wiini Hiram algama kilo dubu miliyon ɵaara, emel na wiini luwuŋ olive litir dubu mitwis.

²⁶EPIƊ-ƊAI a sini yel wiini Salmun maini n’a miɗiŋni nɵa. Hiram gaini Salmun arbaɗi jam, e zi bonu arbaɗi ta.

²⁷Salmun a mula ɗai dubu doogo doogo hu arbaɗi aliɗi Izrayel midini sda zi dewele.

²⁸Tile paŋ a ɵina ɗai dubu doogo war Liban aŋ zi sda hanɗa, e zisi edi tile ɗaw, e wiyisi aha e zi tile sulu lai. Adoniram a abai na midini sda hanɗa.

²⁹Salmun a nafu gaiɗi ɗai n’e libi zak dubu doogo doogo muguzak, zi gɵi kriyit dubu doogo doogo mitwis lai.

³⁰Ɗai n’abakai na dubu hu gaini miya hu n’e tili sda hanɗa, na lawanai e miliɗi pɵaɗi ɗa arɗi kai.

³¹Pai a sa miɗi buri e piyisi ali-fuŋ n’abakai n’e ziziniŋ gaini futini kapai e tûûri ezini tempel azumai gaini.

³²Ɗai zi sda na wiini Salmun gaini Hiram gaiɗi ɗai na Gebal par lai e zizini ali-fuŋ gaini luwuŋ n’e rgi tempel na wiini EPIƊ-ƊAI gaini.