Read Mousgoum Lokwita n’avut na wiiɗi paakai 6 Bible Online

Lokwita n’avut na wiiɗi paakai 6 - Mousgoum bible

Lokwita n’avut na wiiɗi paakai 6

¹Pai Salmun a tika pini rgini tempel na wiini EPIƊ-ƊAI war buza n’ag'aŋ miya puɗu gaini doogo doogo mitwis asakalni niyi n’edi na wiiɗi aliɗi Izrayel war Egipte par. War tile n’ag'aŋ sulu na yikini ɓa Ziv na wiini buza n’ag'aŋ puɗu n’aŋ warɗi pai.

²Tempel na pai Salmun a rgaŋ burini EPIƊ-ƊAI ɗa, mogoni metir doogo doogo hu, brukni metre doogo, mogoni n’amai sek metre doogo pi ɵim.

³Deɓir na mini tempel ɗa mogoni ɗa a brukni tempel ɗa dama, a dara a muɗa metir doogo, brukni ɗa metir ɵim edi mini mogoni tempel ɗa lai.

⁴A zizina fenetir na gaini wala n’e piŋ sini gaini griyas arni lai.

⁵A rgiti dilimi na zi etaz hu, anene par sini tempel ɗawwa gaini pi amai sini tempel gaini hlai na sɗik tiɓ tiɓ, a ɓurwa arni ɗa aŋ dalam n’agogoi.

⁶Dilimi n’azumai pi ɗa, brukɗi metir sulu gaini gal, n’arba ɗa metir hu, na amai ɗa metir hu gaini gal lai. Deɓelemni aftini Tempel ɗa war etaz paŋ kiini kiini, a wula amai sek ɗa a faya amlai sek sek, kapai luwuŋ na midini ɗa a niya amlai arbani afti na wiini tempel ɗe kai.

⁷Rgini tempel ɗa a za gaini ali-fuŋ n’e ziziniŋsi Won hlai n’e gɵi ali-fuŋ woni par. Nɵa war rgini tempel hanɗa ɗif a ɵina tuwini marto kai, beŋel kai, kawai ktai kaalai.

⁸Porte na miɗi dilimi n’azumai ɗa a na war gal n’amai sek ɗa, e niyi amai war etaz n’arba ɗa gaiɗi n’amai ɗa midini ɓok ɗa ɗaw.

⁹Asakal n’a vada gaini rgini tempel ɗa li, Salmun a zizina warni n’amai gaini wazagai na javai gaini luwuŋ Sedre lai.

¹⁰A rgiti dilimi zi etaz ɗa sini tempel ɗa ɗawwa, etaz paŋ ɗa, mogoɗi n’amai sek metir sulu gaini gal gal, amalni luwuŋ Sedre na midini etaz ɗa a pa sini tempel ɗa tiɓ tiɓ.

¹¹Seŋ na wiini EPIƊ-ƊAI a muɗa sini Salmun maini nɵa:

¹²Tuku ku na rga tempel hanɗa buriya, na ɓa ku paya pini gadaiŋa zi ɗû, ku za pini gadaiŋa zi ɗiyi lai, na ɓa ku yima li gadaiŋa paŋ, ku za li pini lai ɗa, nɵa seŋŋa na mu miɗiŋni wiini David n’apuku buriku ɗa aga mu vaŋ amai.

¹³Aga mu halasi mu sumna arbaɗi aliɗi Izrayel war tempel hanɗa, aga mu hiniɗi Izrayel na ɗaiŋa edi kir kai zaŋ.

¹⁴Salmun a rga tempel hanɗa haa a vadaŋ.

¹⁵Sini n’amai ɗa a zizinaŋ gaini luwuŋ Sedre amai par haa azumai tiɓ, warni n’azumai ɗa a zizinaŋ gaini luwuŋ sipre lai.

¹⁶Asakal par a zizina warɗi dilimi n’amlai ɗa gaini luwuŋ Sedre lai, mogoni na haa amai ta ɗa metir doogo, a zizina warɗi gaini futini kapai te hina aŋ dilimi na wiini Zunduk zi bonu n’a yikiti zamai ɓa: hlai na sɗik gara.

¹⁷Anene par miɗi dilimi na sɗik gara ɗa e yikiŋ ɓa: hlai na sɗik.

¹⁸Luwuŋ Sedre n’amai siɗi dilimi ɗa, e zizini ali luwoŋai gaini fler na gaini mili edi mal mal zi luwuŋ sini, siɗi dilimi paŋ ɗa a luwuŋ Sedre kafa, arni ɗif a tala ahi-fuŋ ktai maa kai.

¹⁹Amlai warɗi dilimi n’amlai ɗa, a zizina hlai na sɗik gara ɗa ta kapai e tiki zunduk zi bonu na wiini EPIƊ-ƊAI ɗa warni.

²⁰Miɗi dilimi na sɗik gara, na mogoɗi metre doogo, brukɗi metre doogo, modoɗi n’amai sek metir doogo lai ɗa na Salmun a ɵirɓa siɗi gaini or na gaini futini ɗa, gûwiŋ zi yi ɓaka n’e zizini sini gaini luwuŋ Sedre a nafu woni.

²¹Salmun a ɵirɓa warni tempel gaini or na gaini futini, a ga na jaɓ zi or miɗi dilimi na sɗik gara, n’a ɵirɓiti gaini or ɗa gaŋ lai.

²²A ɵirɓa tempel ɗa paŋ gaini or na gaini futini, tempel gaini hlaini. A ɵirɓa gûwiŋ zi yi ɓaka na mini hlai na sɗik gara gaini or lai.

²³Amlai warɗi dilimi na sɗik gara ɗa, a zizina Kerubimkai sulu gaini luwuŋ olive, mogoɗi n’amai sek metir ɵim ɵim.

²⁴Graŋni Kerubim ktai ɗa kil ɵim, na hanɗa ɗe kil ɵim lai. Mini graŋni na ktai par haa sini mini na hanɗa ta ɗa kil doogo.

²⁵N'ag'aŋ sulu ɗa, graŋni kil doogo lai. Kerubimkai na sulu hanɗa, abakaini maini marni ɵa, rgini maini marni ɵa lai.

²⁶Kerubim paŋ mogoni n’amai sek a za kil doogo doogo.

²⁷A ɗiyiɗi Kerubimkai na sulu amlai warɗi dilimi na sɗik gara ɗa ca, edi arba kal kal; na ktai graŋni na ktai a tikasi amai siɗi dilimi na par ta, na hanɗa ɗe graŋni a tikasi siɗi na par ta lai. Graŋɗi na sulu na sini marni sek ɗa ɗe a tika mini marni ta ta lai.

²⁸A ɵirɓa siɗi gaini or lai.

²⁹Sini tempel anene par lai, warni amlai lai a zizina Kerubimkai gaini goyor huura gaini fler na gaini mili edi mal mal.

³⁰A ɵirɓa warni tempel n’azumai ɗa gaini or, amlai lai, anene lai.

³¹Miɗi dilimi na sɗik gara ɗa, a zizina porte na tini sulu gaini luwuŋ Olive, luwuŋ n’e piŋ ɵimani gaini n’amai par midini ɗa a za gal n’ag'aŋ ɵim na wiini brukni afti ɗa.

³²Sini porte na sulu zi luwuŋ olive ɗa, a zizina Kerubimkai, gaini goyorni huura, gaini fler na gaini mili edi mal mal lai, a ɵirɓa sini gaini or, a yima or sini Kerubimkai gaini goyorni huura pra.

³³A zizina porte mini tempel ɗa nɵa lai, luwuŋ n’e piŋ ɵimani na zi luwuŋ olive a za gal n’ag'aŋ puɗu na wiini brukni afti ɗa.

³⁴A zizina porte sulu gaini luwuŋ sipre, porte paŋ ɗa warni sulu sulu.

³⁵A zizina Kerubimkai gaini goyerni huura gaini fler na gaini mili edi mal mal lai sini, a ɵirɓa sini gaini or maini n’aŋsi amai par nɵa.

³⁶Asakal par a rga ɵaga siɗi pakatai n’aha ɗa, a rga giri hu gaini ali-fuŋ n’abakai, amai par midini ɗa, a za giri ɗaw gaini amal na wiini luwuŋ Sedre lai.

³⁷War buza n’ag'aŋ puɗu na Salmun aŋ warɗi pai, war tile na wiini ziv, e tûûri ezini tempel na wiini EPIƊ-ƊAI azumai.

³⁸War buza n’ag'aŋ doogo pi ktai, war tile n’ag'aŋ mitwis na yikini ɓa: Bul ɗa, sda na sini tempel ɗa paŋ ɗa a daba ta. Salmun a rgaŋ buza muguzak.