Read Mousgoum Lokwita n’avut na wiiɗi paakai 9 Bible Online

Lokwita n’avut na wiiɗi paakai 9 - Mousgoum bible

Lokwita n’avut na wiiɗi paakai 9

¹Won hlai na Salmun a vada gaini rgini Dalam na wiini EPIƊ-ƊAI gaini na wiini dama ta, a vadda gaini wazagai n’a rgaŋ warni buri a zaŋ warɗi ta lai ɗa,

²EPIƊ-ƊAI a siŋka sini arni azi n’ag'aŋ sulu pra maini n’a siŋka sini arni war Gabawon ɗa nɵa.

³EPIƊ-ƊAI a miɗini: mu ɵina siiwaku gaini tuwiku ya, Dalam na ku rgaŋ hanɗa mu varaŋ ɗaw aŋ wiya kapai mu sumna woni haa kureɗ, aga mu tika hangala gaini hiiniŋa paŋ sini kureɗ lai.

⁴Amma tuku ɗa, na ɓa ku paya wuzani ara maini David n’apuku nɵa gaiɗi agul ktai war jre, ku za maini na mu guduku midini nɵa, na ɓa ku za pini gadai zi ɗû gaini zi ɗiyi na wiya lai ɗa,

⁵aga mu hiniti Paramai zi pai na wiiku na midiɗi Izrayel te kɵa kai maini na mu miɗini wiini David n’apuku ɓa: aga a sumna midiɗi Paramai zi pai na wiiɗi Izrayel ɗa a ktai arbaɗi pinzibani par ɵa ɗa ɵa.

⁶Amma na ɓa, tiki gaiɗi aliki lai ki bindi arki edi sa par li, na ɓa ki zi pini gadaiŋa gaini gadai zi ɗû na wiya na mu siŋki kai, na ɓa ki yimi li pini alawai na zamai, ki hûrgi azumai wuzani li lai ɗa,

⁷aga mu hûrɗiki tiki ɗai na Izrayel amai midini afti na mu siŋki par, Dalam na mu varaŋ ɗaw aŋ wiya hanɗa, aga mu bulaŋ edi wuzani ara par gaigai, Izrayel aga te bunda aŋ wala n’a nava kai, na pinzibaɗi ɗai paŋ aga e riyi pini.

⁸Dalam n’abai hanɗa, ɗif paŋ n’aga a vuga ɵimani ɗaw aga a bunda hiyak, hunai aga te yimaŋ, aga a zilba sini ɓa: EPIƊ-ƊAI a za sini afti hanɗa gaini Dalam hanɗa lai nɵa buri maɗa?

⁹Ɗai aga e wiyiɗi seŋ ɓa: buri ɓa e hini Epiɗ-ɗai Alaw na wiiɗi n’a kûrɗiɗisi tiyakaiɗi edi midini afti na war Egipte par edi mak, e zi bonu gaini alawai na zamai, e hûrgi azumai wuzani, e zi ɵeŋni lai. EPIƊ-ƊAI a hinasi gir hanɗa paŋ midiɗi buri hanɗa.

¹⁰Won hlai na buza na caaɓa a va amai, Salmun a vada gaini rgini Dalam na wiini EPIƊ-ƊAI gaini na wiini ni dama li lai ɗa,

¹¹pai Salmun a sini fuŋ n’abakai caaɓa midini afti na Galeliya par wiini Hiram pai na Tirus, n’a naka a sinisi luwuŋ Sedre gaini luwuŋ Sipre gaini or lai midini hazani ta ɗa.

¹²Hiram a halasi a Tirus par aŋ tala fuŋ n’abakai na Salmun a siŋni ɗa, amma a yima arni kai.

¹³A muɗa: tawala, ku saŋa na ɗa afuŋ n’abakai na maɵa maɵa ɗa. E sini yiki wiini hlai hanɗa ɓa afti na kabul a dara a muɗa: a nava kai. Yiki ni ɗa a hina sini ɵa haa girna.

¹⁴Paŋ ktai Hiram a sinisi or a za kilo dubu hu gaini gal.

¹⁵Pai Salmun a tika sda zi dewele midiɗi ɗai buri e rgi Dalam na wiini EPIƊ-ƊAI, Dalam na wiini ni dama, e ŋiɗi huduk n’arbani fuŋ n’abai na wiini David gaini mini tempel n’e sini yiki ɓa Millo ɗa amai, e rgiti zilaagai na siɗi Yeruzalem gaini fuŋ n’abakai maiɗi: Hatsor, Megido, Gezer lai,

¹⁶Faraw pai n’Egipte, a niya edi aŋ hatam, a tikiti Gezer, a fiɗiɗi Kananiyakai na warɗi edi, a ɵa afu piɗi lai. Asakal hanɗa a sitiɗi wiiɗi ahini na munini Salmun ɗa aŋ katu na wiini tikiɗi,

¹⁷Salmun a waya a rgiti Gezer amai, a rga fuŋ n’abakai na war Bet-Horon na azumai ɗa amai lai,

¹⁸a rgiti Baalat amai, a rgiti Tamar na war basga na kaɗataŋ lai, midini afti na Yuda,

¹⁹a rga fuŋ n’abakai na wiini, zi giɗimi wazagai zi simi, zi giɗimi wazagai zi hatam, gaini n’e mili plasai woni lai. Salmun a rga wazagai n’a firiya a zaŋ aha war Yeruzalem, war Liban, midini afti n’aŋ pini paŋ.

²⁰Pinziba zamai n’e hini arbaɗi aliɗi Izrayel maiɗi: Amoritekai, Hittitekai, Perezzitekai, Hibbitekai, Yebuzitekai ɵa ɗa,

²¹pinzibaɗi n’e hini ka duɓaɗi midini afti, na aliɗi Izrayel e fiɗiɗi edi kai ɗa, Salmun a tikiɗi sda zi dewele midiɗi, e hini aŋ bagakai ɵa haa girna.

²²Salmun a za ɗif na Izrayel ktai aŋ bege kai, nagai ɗa a miliɗi war askar aŋ ɗai zi hatam, aŋ ɗaini zi gɗam, aŋ abakaiɗi askaraini, aŋ ɗai n’e ɵi wuzani plasaini, aŋ abakaiɗi ɗai zi dibiri saret zi gaw gaiɗi zi dibiri plasai lai.

²³Lawanai e viri ɗai n’abakai n’e tili sda na wiini Salmun n’aŋ tiɗi ɗai zi sda miya ɵim gaini doogo doogo ɵim.

²⁴Ñiɗini huduk n’arbani fuŋ n’abai na wiini David gaini mini tempel ɗa n’e sini yiki ɓa: Millo ɗa, a za asakal n’ahini pai n’Egipte ɗa te zogosi war fuŋ n’abai na wiini David par aha war fuŋ na Salmun a zizinaŋ buriɗi zok ɗa.

²⁵A zi hu war buza dam, Salmun a za ɓaka ziyi gaini ɓaka zi ɵeɗ midini gûwiŋ zi yi ɓaka n’a zizinaŋ burini EPIƊ-ƊAI, a yan wazagai zi ɗûgûdi zi lûgûzi midini gûwiŋ zi yi ɓaka n’a nafu wuzani EPIƊ-ƊAI lai. Gaini hanɗa a siŋka sda na tempel a rga burini ɗa edi.

²⁶Pai Salmun a zizina hulomai n’abakai war Esiyon Geber na te na ɵimani Eilat, agoɗom wulani yem-ra na mekele, midini afti na Edom

²⁷Pai Hiram a mula ɗai na wiini n’e siɗi ezini hlai na agoɗom war hulum hanɗa gaiɗi ɗai na wiini Salmun,

²⁸e hili piɗi marɗi war Ofir e kinisi or kilo dubu doogo pi sulu wiini pai Salmun.