Read Mousgoum Lokwita n’ag'aŋ sulu na wiiɗi paakai 1 Bible Online

Lokwita n’ag'aŋ sulu na wiiɗi paakai 1 - Mousgoum bible

Lokwita n’ag'aŋ sulu na wiiɗi paakai 1

¹Asakal mrini Akab par, ɗai na Mowab e fiki amai siɗi pai na Izrayel.

²Mefeŋ ktai, pai Akaziyas a kɵasi amai par arni fenetir na wiiɗi delemini n’amai etas war Samariya, a nava wuruk n’abai. Nɵa a ɵina ɗai ɓa e hili e zilbi Baal-Zebub alaw na Ekron ɗa haw ɗa, aga a mra mini wuruk hanɗa zaw, a zuula ɗi?

³Amma ɵeŋ na wiini EPIƊ-ƊAI a miɗini wiini Eliyas na Tisbe par maini nɵa: faka amai hala miɗi ɗai na pai na Samariya a ɵiniɗi ɗa, ku miɗiɗi maini nɵa: aha war Izrayel ɗa Alaw aŋ kai ɗi, na kapai ki hili ki zilbi ɗa a Baal-zebub alaw na Ekron ɗa.

⁴Pini hanɗa, EPIƊ-ƊAI a na muɗa sini pai na Izrayel maini nɵa: li na ku niya amai midini na ɗa, midini par aga ku niya azumai kai. Fakat fakat, aga ku mra. Eliyas a hala wiini.

⁵Ɗai na pai a ɵiniɗi e wiyisi sini a zibiɗi: ki wiyisi nɵa maɵa ɗa?

⁶E wiyini seŋ: ɗif ktai a halasi miyi a miɗiyi: wiyi aha sini pai n’a ɵinikisi ɗa, ki miɗini ɓa: EPIƊ-ƊAI a na muɗa maini nɵa: aha warɗi Izrayel ɗa Alaw aŋ kai ɗi, na kapai ku zilba ɗa a Baal-zebub alaw na Ekron ɗa. Pini hanɗa li na ku niya amai midini na ɗa, amai par midini aga ku niyasi azumai kai, buri ɓa aga ku mra fakat fakat.

⁷Pai a zilbiɗi: ɗif n’a halaɗi miki, n’a miɗiki seŋ hanɗa a sɗa maɵa maɵa ɗa?

⁸E wiyini seŋ: ɗif ni ɗa, sapa na sini ɗa a z'ayirni adumai, santir na wuzani ɓak ɗa a z'amur lai. Nɵa pai a muɗa: a Eliyas na Tisbe par ɗi kai.

⁹Pai a ɵina abaiɗi askarai na ɗai pini doogo doogo ɵim gaiɗi ɗaini na doogo doogo ɵim na pini lai sini Eliyas. E niyi amai pini amai merfeŋɗi huwuŋ ɗa, Eliyas a nafu azumai dam abaiɗi askarai a miɗini: ɗif na wiini Alaw, pai ɓa ku niyaɗi azumai!

¹⁰Eliyas a wiyini seŋ wiini abaiɗi askarai: na ɓa mu ɗif na wiini Alaw mal ɗa, afu a niyasi amai war fuŋ-n’Alaw par a yuku edi gaiɗi ɗaiku na doogo doogo ɵim paŋ. Afu a niyasi amai par a yiɗi edi, ni gaiɗi ɗaini na doogo doogo ɵim ɗa.

¹¹Pai a ɵina abaiɗi askarai na ɗai pini doogo doogo ɵim zamai, gaiɗi ɗaini na doog doogo ɵim na pini lai, abaiɗi askarai a tika seŋ a miɗini: ɗif na wiini Alaw, niyasi azumai witaw.

¹²Eliyas a wiyini seŋ: na ɓa mu ɗif na wiini Alaw mal ɗa, afu a niyasi amai war fuŋ-n’Alaw par, a yuku edi, tuku gaiɗi ɗaiku na doogo doogo ɵim paŋ, afu a niyasi amai par a yiɗi edi, ni gaiɗi ɗaini na doogo doogo ɵim ɗa.

¹³Pai a ɵina abaiɗi askarai na ɗai pini doogo doogo ɵim zamai pra, gaiɗi ɗai na doogo doogo ɵim na pini ɗa lai. Abaiɗi askarai hanɗa gaiɗi ɗaini e niyi amai, Won hlai n’a co amai ɗa, a hurga zumai wuzani Eliyas a siiwaŋ a muɗa: ɗif na wiini Alaw, hiina burini sunfaŋa, gaini na wiiɗi ɗaiŋa na doogo doogo ɵim na e ɗi pa na ɗa lai ta kai ɗi!

¹⁴Abakaiɗi askarai n’e hilisi wuza ɗa, gaiɗi ɗai na piɗi lai, afu a yiɗi edi yit, tiyana ɗa hiina burini sunfaŋa ta ta kai ɗi?

¹⁵Sleŋ na wiini EPIƊ-ƊAI a miɗini wiini Eliyas, niya azumai hala gaini, ku hunaŋ kai, Eliyas a fakasi amai a halasi gaini azumai wuzani pai.

¹⁶A miɗini wiini pai Akaziyas ɓa: EPIƊ-ƊAI a na muɗa maini nɵa: buri ɓa ku ɵina ɗai aŋ zilbi Baal-Zebub, alaw na Ekron, mai na ɓa Alaw aha warɗi Izrayel kai ɵa ɗa, pini hanɗa, li na ku niya amai midini na ɗa, amai midini par aga ku niyasi azumai kai. Buri ɓa aga ku mra fakat fakat.

¹⁷Akaziyas a mra maini miɗi n’EPIƊ-ƊAI a muɗaŋ war mini Eliyas ɗa nɵa. Ahini kir kai ɗa, Yoram na tawalni a suma pai war balamni, war buza n’ag'aŋ sulu na wiini Yoram n’ahini Yosafat pai na Yuda.

¹⁸Labar na midini sda na Akaziyas a zaŋ ɗa aŋ gaini ɗû war maktuɓ na wiiɗi paakai na Izrayel ɗa kai ɗi?