Read Mousgoum Lokwita n’ag'aŋ sulu na wiiɗi paakai 15 Bible Online

Lokwita n’ag'aŋ sulu na wiiɗi paakai 15 - Mousgoum bible

Lokwita n’ag'aŋ sulu na wiiɗi paakai 15

¹War buza n’ag'aŋ caaɓa pi muguzak, na Yerobowam pai na Izrayel aŋ warɗi pai ɗa, Azariyas n’ahini Amasiyas pai na Yuda ɗa a suma pai.

²A suma pai sek ɗa buzani doogo pi ɵaara, a buza warɗi pai buza doogo doogo ɵim pi sulu aha warɗi Yeruzalem. Emini yikiɗi ɓa: Yekoliya, te na Yeruzalem par.

³A paya payai na pɗem wuzani arni EPIƊ-ƊAI, kal kal maini Amasiyas n’epini nɵa.

⁴Gaini hanɗa paŋ ɗa hlai zi ɓaka ɗa a vada edi kai, ɗai ɗa siɗi aŋ zi ɓaka ɵa, aŋ yi wazagai zi ɗûgûdi zi lûgûzi woni hlai zi ɓaka ɵa.

⁵EPIƊ-ƊAI a hinasi veglek na gdaŋ midini pai, a bunda dugum haa sini mrini. A bunda a sumna kiini edi warɗi dilimi. Yotam n’ahini pai, abaini dalamni pai ɗa a hina a ɵa wuzaɗi ɗai ɗa a ni.

⁶Labar na midini sdani Azariyas n’a zaŋ paŋ ɗa, aŋ gaini ɗû war maktuɓ na wiiɗi paakai na Yuda kai ɗi?

⁷Azariyas a mra, a hala gaiɗi tamaini, e piŋ gaiɗi war fuŋ n’abai na wiini David. Yotam n’ahini a suma pai war balamni.

⁸War buza n’ag'aŋ doogo doogo hu pi mitwis na Azariyas pai na Yuda aŋ warɗi pai ɗa, Sakariyas n’ahini Yerobowam a suma pai midiɗi Izrayel a Samariya, a fana warɗi pai tile ɵaara.

⁹A paya payai na meefeŋ wuzani arni EPIƊ-ƊAI maini na tamaini e piyi nɵa. A hina tuwur na Yerobowam n’ahini Nebat a kiɗi aliɗi Izrayel warni aŋ ziŋ ɗa ktai ma edi kai.

¹⁰Sallum n’ahini Yabes a rga warni aŋ zini meefeŋ, a fuɗaŋ wuzani arɗi ɗai, a suma pai war balamni.

¹¹Labar na midini sda na Sakariyas a zaŋ ɗa aŋ gaini ɗû war maktuɓ na wiiɗi paakai na Izrayel ɗa.

¹²Hanɗa a seŋ n’EPIƊ-ƊAI a miɗiŋni wiini Yehu ɓa: alini ɗa haa sini pinziba n’ag'aŋ puɗu ta aga e simni midiɗi Paramai zi pai na wiiɗi Izrayel ɗa. A za nɵa lai.

¹³Sallum n’ahini Yabes a bunda aŋ pai war buza n’ag'aŋ doogo doogo hu pi ɵeeŋe na Azariyas pai na Yuda aŋ warɗi pai. A fana warɗi pai tile ɗaw aha war Samariya.

¹⁴Menahem n’ahini Gadi a halasi a Tirsa par amai a Samariya. A fuɗa Sallum n’ahini Yabes edi a Samariya, a suma pai war balamni lai.

¹⁵Labar na midini sdani Sallum, meefeŋ n’a rgaŋ warni sini Sakariyas lai ɗa aŋ gaini ɗû war maktuɓ na wiiɗi paakai na Izrayel.

¹⁶Nɵa Menahem a tuura fuŋ n’abai na Tifsa edi gaiɗi ɗai na warni paŋ, a turasi afti ɗa, a tikasi pini a Tirsa par haa a Tifsa ta. A tuuraŋ edi buri e milini mini magalaɗi edi kai. A ɓasa warɗi falakai zi ziyi kafa edi.

¹⁷War buza n’ag'aŋ doogo doogo hu pi ɵeeŋe na Azariyas pai na Yuda aŋ warɗi pai ɗa, Menahem n’ahini Gadi a suma pai midiɗi Izrayel war Samariya, a buza warɗi pai buza doogo.

¹⁸A paya payai na meefeŋ wuzani arni EPIƊ-ƊAI, haa sini mrini a hina tuwur na Yerobowam n’ahini Nebat a kiɗi aliɗi Izrayel woni aŋ ziŋ ɗa ktai ma edi kai.

¹⁹Pul pai na Siriya a halasi a tika afti na Izrayel, nɵa Menahem a sini arzaŋ kilo dubu doogo doogo hu kapai a zina pini, kapai paini te ɗiya gdeŋi.

²⁰Menahem a ɗukla farai hanɗa aŋ tar midiɗi ɗai zi farai na warɗi Izrayel ta ta, kapai a yimaŋsi amai a siŋni wiini pai na Siriya, ɗif paŋ a vurga sulai zi arzaŋ doogo doogo ɵim ɵim. Pai na Siriya a yima sini edi midini aftini par a waya aha.

²¹Labar na midini sda na Menahem a zaŋ paŋ ɗa aŋ gaini ɗû war maktuɓ na wiiɗi paakaiɗi Izrayel ɗa kai ɗi?

²²Menahem a mra a hala gaiɗi tamaini, Pekahiya n’ahini a suma pai war balamni.

²³War buza n’ag'aŋ doogo doogo ɵim na Azariyas pai na Yuda aŋ warɗi pai ɗa, Pekahiya n’ahini Menahem a suma pai midiɗi Izrayel war Samariya, a buza warɗi pai buza sulu.

²⁴A paya payai na meefeŋ wuzani arni EPIƊ-ƊAI, a hina tuwur na Yerobowam n’ahini Nebat a kiɗi Izrayel woni aŋ ziŋ ɗa ktai ma edi kai.

²⁵Peka n’ahini Remaliya ɗif n’abai midini wazagai zi gɗam a rga warni buri a zini meefeŋ wiini pai. A fuɗa Pekahiya gaini Argob gaini Ariye lai war Samariya amlai warɗi dilimi ktai n’ahani pai. Ɗai e ɗifu pini doogo doogo ɵim, e ɗi na war pinzibani Galaad. A fuɗaŋ su a sumna aŋ pai war balamni.

²⁶Labar na midini sda na Pekahiya a zaŋ paŋ ɗa aŋ gaini ɗû war maktuɓ na wiiɗi paakai na Izrayel ɗa kai ɗi?

²⁷War buza n’ag'aŋ doogo doogo ɵim pi sulu na Azariyas pai na Yuda aŋ warɗi pai ɗa, Peka n’ahini Remaliya a suma pai midiɗi Izrayel war Samariya, a buza warɗi pai buza caaɓa.

²⁸A paya payai na meefeŋ wuzani arni EPIƊ-ƊAI, a hina tuwur na Yerobowam n’ahini Nebat a kiɗi aliɗi Izrayel woni aŋ ziŋ ɗa ktai ma edi kai.

²⁹War mefeŋ na wiini Peka pai na Izrayel, Tiglat-Pilezer pai na Asiriya a halasi a mula fuŋ n’abakai hanɗa: Iyyon, Abel-Bet-Maaka, Yanowa, Kades, Hatsor, afti na Galaad gaini na Galeliya gaini afti na wiini Neftali gaini hlaini paŋ lai. a kiɗi ɗai na war hlai hanɗa par warɗi Asiriya.

³⁰Oziyas n’ahini Ela, a rga warni aŋ zini meefeŋ wiini Peka n’ahini Remaliya, a fuɗaŋ, a suma pai war balamni lai, hanɗa a za war buza n’ag'aŋ caaɓa na Yotam n’ahini Azariyas aŋ warɗi pai.

³¹Labar na midini sda na Peka a zaŋ ɗa paŋ aŋ gaini ɗû war maktuɓ na wiiɗi paakai na Izrayel.

³²War buza n’ag'aŋ sulu na Peka n’ahini Remaliya pai na Izrayel aŋ warɗi pai ɗa, Yotam n’ahini Azariyas a suma pai war Yuda.

³³A suma pai sek ɗa buzani caaɓa pi ɵim, a buza warɗi pai buza doogo pi ɵaara. Emini yikiɗi ɓa: Yerusa t'ahini Sadok.

³⁴A paya payai na pɗem wuza ni arni EPIƊ-ƊAI, a za kal kal maini Azariyas n’epini ɗa nɵa.

³⁵Gaini hanɗa paŋ, hlai zi ɓaka ɗa a vada edi kai, ɗai siɗi aŋ zi ɓaka ɵa, aŋ yi wazagai zi ɗûgûdi zi lûgûzi war hlai zi ɓaka ɗa ɵa. A zizina mini porte n’amai na wiini tempel na wiini EPIƊ-ƊAI ɗa a ni.

³⁶Labar na midini sda na Yotam a zaŋ ɗa aŋ gaini ɗû war maktuɓ na wiiɗi paakai na Yuda kai ɗi?

³⁷War mefeŋ na wiini ɗa, EPIƊ-ƊAI a tika pini a ɵina Resin pai Asiriya gaini Peka n’ahini Remaliya pai na Izrayel lai aŋ hitima afti na Yuda.

³⁸Yotam a mra, a hala gaiɗi tamaini, e piŋ gaiɗi war fuŋ n’abai na wiini David na tiyni. Akaz n’ahini a suma pai war balamni.