Read Mousgoum Lokwita n’ag'aŋ sulu na wiiɗi paakai 16 Bible Online

Lokwita n’ag'aŋ sulu na wiiɗi paakai 16 - Mousgoum bible

Lokwita n’ag'aŋ sulu na wiiɗi paakai 16

¹War buza n’ag'aŋ doogo pi muguzak na Peka n’ahini Remaliya aŋ warɗi pai ɗa, Akaz n’ahini Yotam pai na Yuda a suma pai.

²Akaz a suma pai sek ɗa buzani caaɓa, a buza warɗi pai buza doogo pi ɵaara aha war Yeruzalem. A paya payai na pɗem wuzani arni Epiɗ-ɗai Alaw na wiini maini David na tiyni nɵa kai.

³A tika aziɗi paakai na Izrayel, a za wazagai na haharai maini pinziba n’EPIƊ-ƊAI a birgiɗi edi wuzaɗi Izrayel e ɗika e ziŋ ɗa nɵa, A ya ahini maa edi aŋ ɓaka.

⁴A za ɓaka, a ya wazagai zi ɗûgûdi zi lûgûzi lai war hlai zi ɓaka, amai midini boŋorai, pini luwoŋai n’a na goɗa paŋ lai.

⁵Nɵa Resin pai na Siriya gaini Peka n’ahini Remaliya pai na Izrayel, e hili aŋ hitimiti Yeruzalem. E siki Akaz aha sak, amma e kiɗi e rɗi amai midini kai.

⁶War sarti ni ɗa, Resin pai na Siriya a tikitisi Eilat, a binditisi aŋ wiiɗi. A birgiɗi Yudiyakai edi warɗi par, ɗai na Edom par e hilisi e zi fuŋ woni, e hini warɗi ɵa haa girna.

⁷Akaz a ɵina ɗai sini Tiglat-Pileser pai na Asiriya, a miɗini: ta mu ɗifku, m’ahiku, halasi kurɗaŋa edi tini pai na Siriya gaini pai na Izrayel ɗa par kruɗ kai ɗi? Buri e fikisi amai sa aŋ hitimiŋa.

⁸Akaz a mula arzaŋ gaini or n’amlai war tempel na wiini EPIƊ-ƊAI, gaini na war godai na ahani pai, a ɵiniŋni aŋ katu wiini pai na Asiriya.

⁹Pai na Asiriya a yima seŋni, ni gaini midini a hala aŋ hitimiti Damas a tikiti lai. A miliɗi ɗai na woni par a kiɗi war Kir, a fuɗa pai Resin ɗa edi lai.

¹⁰Pai Akaz a hala Damas aŋ nava gaini Tiglat-Pileser pai na Asiriya. A tala gûwiŋ zi yi ɓaka na woni ɗa a tala arni pɗem. A ɵinasi sini pai zi ɓaka Uriya buri a rga gûwiŋ na kal kal maini ɵa, gaini wazagai n’e ziziniŋ gaini kal kal maini ɵa lai.

¹¹Pai zi ɓaka Uriya a zizina gûwiŋ zi yi ɓaka ɗa. A zizinaŋ kal kal maini na pai Akaz a siŋkiŋnisi a Damas par ɗa nɵa, a tika pini aŋ za hanɗa wuzani hlai na pai Akaz maa a wayasi war Damas par kai hai.

¹²Won hlai na pai Akaz a wayasi a Damas par tar, pai a tala gûwiŋ zi yi ɓaka, a hala sini, a niya amai midini.

¹³A za ɓakani zi yi gaini ɓaka zi seyem, a ma vin azumai midini gûwiŋ zi yi ɓaka ɗa, a yama fel na wiini wazagai zi ɓaka zi ɵeɗ sini gûwiŋ zi yi ɓaka ɗa lai.

¹⁴Amma gûwiŋ zi yi ɓaka zi kiya n’a naka wuzani EPIƊ-ƊAI, arbani gûwiŋ na hehe gaini tempel na wiini EPIƊ-ƊAI ɗa a zogoŋ, a kaŋ war tini gûwiŋ na hehe war gal n’azumai sek ta.

¹⁵Asakal par pai Akaz a muɗa sini pai zi ɓaka Uriya maini nɵa: aga ku za ɓaka zi yi na gorof par gaini ɓaka na koskoi, ɓaka zi yi gaini ɓaka na wiini pai, ɓaka zi yi, ɓaka gaini vin zi mi azumai na wiiɗi ɗai paŋ lai midini gûwiŋ zi yi ɓaka n’abai ɗa. Fel na wiini wazagai zi yi aŋ ɓaka gaini fel na wiini wazagai zi ɓaka lai ku maŋ midini. Amma gûwiŋ zi yi ɓaka zi kiya ɗa aga mu sɗa futini ɗa.

¹⁶Pai zi ɓaka Uriya a za wala na pai a miɗini midini ɗa paŋ.

¹⁷Pai Akaz a ɗukla kawakai zi kiya na sini Saret ɗa edi, a mula dunbakai azumai, a tika daaia n’a naka midini garakai zi kiya doogo pi sulu azumai, a tikaŋ azumai midini alini fuŋ kadai ta.

¹⁸Burini pai na Asiriya ɗa, Akaz a bunda hlai na wiini Sabbat n’amlai war tempel na wiini EPIƊ-ƊAI gaini mini hlai n’anene par na pai a niya warni ɗaw lai.

¹⁹Labar na midini sda na Akaz a zaŋ ɗa aŋ gaini ɗû war maktuɓ na wiiɗi paakai na Yuda kai ɗi?

²⁰Akaz a mra, a hala gaiɗi tamaini, e piŋ gaiɗi war fuŋ n’abai na wiini David. Ezekiyas n’ahini a suma pai war balamni.